IRPHUTNA 27
27
Isaka’n Jakoba sat a vur
1Khan hiang hi a hong nia, Isaka a tar tâka, ite hmu thei loiin a om tena chu a nâi Esaua a koia, a kuang, “Ki nâipa,” a tia. Esaua khan, “Hin ki om,” a tia. 2Khan Isaka’n, “Irngai ro a sân ki tar ta, ki thi hrang ni lak inhre ma ung; 3khasikin atûn hin lungkham takin ni timmatuahai, chôiin lân ram va chai ro, sakhi ni va kâp pe roh. 4Ki thi mân ngêt sat nang ki vur theina hrangin, ki indu tak anh suangin lân nin fatir ro,” a tia. 5Khan Isaka’n a nâipa Esaua a chongpui lai chu Rebeki’n a lei inhriata, khan Esaua chu sakhi kâp hrangin ram chai a fe tâka. 6Khan, Rebeki’n a nâipa Jakoba kuang, “Irngai ro, ni pa’n chu ni upa Esaua kuang 7sakhi ni va kâp pe’n lân ki thi mân nin fatirin lân, Pathian kuang sat nang ki vur theina hrangin nin fatir ro, a iti kin hriat. 8Khasikin, ki nâipa atûn hin thu nang ki pêk ang takin ki hê la’nlân, 9ni kêlhai laia va fe’n lân, a sa, a mar inhni hong chôi ro, khanchu ni pa indu lam takin nang suang pe ki ta: 10khan a thi mân ngêta sat nang a vur theina hrangin, fâk hrang kha ni pa ni va ipêk hrang a ni,” tiin a hrila. 11Khan, Jakoba’n a nu Rebeki kuang khan, “Irngai ro, ka upa Esaua chu mul tama irmul a nia, keima lak irmul ma ung. 12Ka pa’n ni le’nthem a ta a huang kêng ki ichang hrang, satvur dong nêkin khosâl tongin kêng omna ki ti,” a tia.
13Khan, a nu’n a kuang khan, “Ki nâi ni khosâl tong hrang chu keima’n la chang rong: ki hê lâkin lân ni va la pe ro,” a tia. 14Khanchu a fea, a va lâk pea; khanchu a nu’n a pa indu lam takin a suang pea. 15Khan Rebeki’n a upa silkai satak, in sûnga om kha a lâka, a nâipa Jakoba an nghâktira; 16khan kêl mulhai kha a kut leh a ring vêla an khop pea; 17khan a anh suang le bai kha Jakoba a pêka.
18Khan a pa kuang a fea, “Ka pa,” a tia. Khan ama’n, “Ki nâi hin ki om, ki nâi tu khôk mo nin ini?,” a tia. 19“Ni nâi ulianpa Esaua ki ni, ni ni itîr ang khan ki tho zoi ta: lungkham takin thoiin lân, sat ni vur hrangin, ki sakhi hme hi fa ta ro,” a tia. 20Khan Isaka’n a nâipa kuang khan, “Ki nâi itina mo ni va man inrang bâka?” a tia. Khan, ama’n, “Rengpa ni Pathianin hlo a nin chuka a ni,” a tia.
21Khan Isaka’n Jakoba kuang khan, “Ki nâi lungkham takin ni hong nâi ro, nang le’nthem rong, ki nâi Esaua chu ni inih ma ni,” a tia. 22Khan Jakoba’n a pa Isaka a va nâia; a le’nthema, “A’rhâi chu Jakoba a nia, a kut chu Esaua kut a nia,” a tia. 23Khanchu a upa Esaua kut angin a’rmul pe sikin inhre thei maka; khanchu sat a vur tâka; 24khan “Ki nâipa Esaua lele chu ni ni mo?” a tia. Khan ama’n, “O ki ni lele,” a tia. 25“Ni hong nai ual ro, khan kêng sat nang ki vur theina hrangin ni sakhi hme kha fa ta ki ti,” a tia. Khan a pêka, a fâk tâka: Uain khom a pêka a in tâka. 26Khan a pa Isaka’n a kuang khan, “Ki nâipa hong nâiin lân ni tum ro,” a ti pea, 27#Heb 11.20 khan a va nâia a tuma; khan ama’n a silkai mirim inhriatin sat a vur tâka.
“Irngai ro,
ki nâipa mirim hi Rengpa satvurna ram mirim ang a ni:
28Khanchu Pathianin irvân irdo leh irnêng satna le,
bu tamtak le uain tamtak nang pe ri se:
29 #
Irp 12.3
nam tinin ni sin thohai sianlân;
chi dang danghaiin chubai nang mûk ri sehai.
Ni urênghai laia rêng angin omin lân;
ni nu nâihaiin chubai nang mûk ri sehai:
Khua nang sâltu chu khosâlin om sianlân,
sat nang vurtu chu satvurin om ri se,”
a tia.
Esaua’n Isaka kuang satvurna a zong
30Khan, hiang hi a nia, Isaka’n Jakoba sat a vur zoiin chu Jakoba chu a pa kuang ata a lei suak zoi chakin, a upa Esaua chu sakhi sa pêlin a hong tunga. 31Ama khomin irhnik takin a suang pea, a pa kuang a hong chôia; a pa kuang khan, “Ka pa thoiin lân, satvurna ni pe hrangin, ni nâipa sakhi anh suang hi fa ta ro,” a tia. 32Khan a pa Isaka’n a kuang khan, “Tu mo ni ni?,” a tia. 33Khanchu Isaka chu a satêrenga inthingin a oma, “Sakhi kâpa, ki kuanga a hme hong chôia, ni hong tung mân ki lei fâka sat ki lei ivur tâk kha tu mo nin ini tâk? a ni khate, ama lak satvurin a lei iom hrang kêng a ni ta,” a tia. 34Esaua’n a pa thuhril kha an hriatin chu a milung siat chita inhriatin a chap khup khup a, a pa makunga khan, “O ka pa, kei hi, keima khom hi sat ni ni ivur ngêt hrang kêng,” a tia. 35Khan ama’n, “Ni sangpa’n a ni hong huanga, nangma dongtum satvurna chu nang a isutpai tâk kêng,” a tia. 36#Irp 25.29-34 Khan Esaua’n chu, “A’rhming khom Jakoba an tia, nin phua indik chu a ni hi te? hi voihni a ni khêl ta; ki nâilutîr nitna khom a ni lâk pea, irngai ro, atûn hin, ki satvur dongtum a ni sutpai nôk a ni ta,” a tia. Khan ama ngêtin, “Satvurna chu ni hôi viat ta mak che mo?” a tia.
37Khan Isaka’n hiang hin a tia, Esaua kuang khan, “Irngai ro, ama chu nangma rêng ni hrangin ki siama, a urêng murdihai khom a sinthotu hrangin ki pêk ta; bu le uain khom nei tah a ta; ki nâipa nangma hrangin imo nang ki ipêk ta hrang,?” a tia. 38Khan Esaua’n a pa kuang khan, “Ka pa satvurna chu inkhat vai mo a ini? O ka pa kei khom satvurna chu nin dong ngêt ro,” a tia. Khan, inring takin Esaua chu a chapa.#Heb 12.17
39 #
Heb 11.20
Khan a pa Isaka’n a kuang khan,
“Irngai ro,
ni omna hrang chu irnêng sa chu hlataka,
le irvân irdo khom hlataka,
a iom hrang a ni.
40 #
Irp 36.8; 2 Rng 8.20 Ni chemin a ni,
ni ihring hrang a ni,
ni sangpa sin ni hong itho pe hrang a ni,
khan, hiang hin,
ni zoro hnungkhôn tiang chu a ringkol chu ni ring ata ni ipai hrang a ni,”
a tia.
41Khan a pa satvurna sikin Esaua’n chu Jakoba kha en nuam ta maka; Esaua lungrîlin, “Ka pa lak idôr dam sôt ta no nia, a thi zoiin chu ki sangpa Jakoba chu thatpai ki ti,” a tia. 42Khan Esaua thuhril chu Rebeki an inhrila; khanchu mi a tîra, Jakoba an koitirhaia; a kuanga khan, “Irngai ro, ni upa Esaua’n ni chungchânga hin, nang that hrang tumin a om mai a ni. 43Khasikin, ki nâipa ki hê hi la’nlân, atûn thoiin lân, Haran khuaa ki nuchapa Labana kuang rot ta ro; 44ni upa ningmur a chum mâka chu a kuang lei va om ro; 45ni upa ningmur hi a chum tena, ni chunga a ithotum a’rnghil tena. Mi hong tîrhai ki ta; nang hong hruai nôk an ti. Itho sikin mo nin ruaia sûn khat sûngin nangni ki itheisam hrang?” a tia.
Isaka’n Jakoba Labana kuang a tîr
46Khan Rebeki’n Isaka kuang khan, “Hit nâinuhai nun hi ki hnônghai: Jakoba hin hiang rama dôngmate Hit nâihai ang hi dôngma’n a neihaiin chu keima hrangin ite a’rfêna om no ni” a tia.
Currently Selected:
IRPHUTNA 27: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
