IRPHUTNA 34
34
Jakoba nâinu Dinaii Sekema’n a châipui
1Khan, Leaii nâinu Dinaii, Jakoba ineipui chu, a ram mihai hmu nuamin a va lêng suaka. 2Khan Hiv mi Hamora kha, kha rama rêng nâipa Sekema’n a lei hmua, a chelthunga, a lei zâlpui tâka. 3Khanchu, a milung kha Jakoba nâinu Dinaii ringot an sâp tâka, kha dôngmatenu kha a sân an dita, chonghoi ta takin a chongpuia. 4Khanchu, Sekema’n a pa Hamora chu a hrila, “So dôngmate so ki dôngma hrangin ni ti pe ro,” a tia. 5Khan Jakoba’n a nâinu Dinaii chu Sekema’n a lei châipui ti an hriata, a nâihai lak ram tianga sahai enin an oma: a nâihai hong mâka chu a dâihreka.
6Khanchu, Sekem pa Hamora chu Jakoba chongpui hrangin a honga, 7Jakoba nâihaiin an inhriatin chu ram rengata an honga! khan Jakoba nâinu zâlpuiin Israelhai laia thil saloi tho loi hrang ti a ni sikin an char a donga, a sate’n an ning khom an mur pehaia. 8Hamora’n a chongpuihaia; “Ki nâipa Sekem lungrîl lak nin nâinu chunga a om rak tâka: lungkham takin nin luatir pe roi. 9Khanchu irlua irhlôm ta ei ti, nin nâinu nin luatir unglân, kin nâinuhai khom luahai nin ti. 10Khanchu kin kuang om nin ta; ram lak a la lian zapa, hi rama hin omin sin tho nin ta irfûk takin om nin ti,” a tia. 11Khan Sekema’n dôngmatenu pa le nuchahai kuang khan, “Nin ren unglân, nin inuam tak hril roi, nangni pe zel ki ti. 12Man le tui thilpêk chu nin inuam dôr ti roi nangni pe zel ki ti, i khom nisianlân nin farnu vai dôngma’n nin luatir ngêt roi,” a tia. 13Khan Jakoba nâi pasalhaiin an farnu Dinaii irhming a le’nsiat tâk sikin, Sekem le a pa Hamora chu vârtakin huang irtêlin an hrila, 14an kuanga khan, “Hi thil ser tanloi mi hi kin farnu pe thei no ni ung, kin pêkin chu kin irhming siatnabul a ni hrang sikin: 15hiang hin chong nin inkung vaiin kêng nin iti angin a ini thei hrang: nin laia pasal murdi’n ser tan unglân, keini angin om roi; 16khan vai kêng kin nâinuhai nin iluahai thei hrang, keini khomin nin nâinuhai kin iluahai thei hrang. Khanchu nin kuang om kin ta, irchikhat ei ini thei hrang an tia. 17Khannisianlân ser tan thua kin hê nin lâk no’n chu, kin farnu chu hruai kin ta, fepui kin ti,” an tia. 18Khan an thu kha Hamora le a nâipa Sekem chu a sate’n an lôma. 19Khanchu ruathartepa chu Jakoba nâinu an dit hrai sikin, kha thil kha zoro sôt loiin a tho zela: ama hi a pa in sûng mihai laia chu mi inza le ingîk tak a nia.
20Khanchu, Hamora le a nâipa Sekem chu, an khua dâimitzîng an va tunga an khuahai an hrilhaia, 21“So mihai son an nir fûkpui tâka, khasikin hi rama omin irvaihai sian, ram khom a la lian tôk sikin, an nâinu so dôngma’n nei ei ta, ei nâinuhai khom nei an ti. 22Khannisianlân irchi hmunkhat ei ni theina hrangin, ei kôla omin, ei irfûk theina hrangin, hi thil hi ei tho’n kêng ei irfûk thei hrang, ser tan nam an ini angin eini khom pasal murdi’n ser tan ni thei inlân. 23An sahai, an sumhai, an inei murdi ei ta a ichang ving hrang mo ni ma? khasikin an thu hi a sa ti puihai ei ti, khan kêng ei kuang an iom hrang,” an tia. 24Khanchu Hamora le a nâipa thu chu an khuaa mi murdi’n an zôma; pasal murdi’n an ser an tantirhai ving ta.
25Khanchu, hiang hi a hong nia, sûn thum tena, an irh pehai lai takin, Jakoba nâihai pasal hni, Dinaii nuchapa Simeona le Levia haiin an chemhai chôiin, dâihrekin an khua kha an rûna, pasal om murdi an thatpaihai vinga. 26A hnung taka Hamora le a nâipa Sekem khom chem ngaih takin an thathaia: Sekem in rengata Dinaii chu an hruai suaka. 27Jakoba nâihai mi that nasan chu an farnu irhming an insiat sikin, khua kha an irûn a ni. 28An belra pâlhai, an sehrât le an sakuartunghai an khuaa thil om murdi, le an loimâna neinunhai an lâk pehaia. 29An sum nei murdi, an nâitehai le dôngmahai chu an bukkhômhaia. 30Khan, Jakoba’n Simeona le Levia kuang khan, “Nangni’n hi rama omhai laia, Kanaan le Periz-hai laia hin ni hmumâkna sin nin thoa, ei tôm sikin pungkhôm an ta an ni idoi hrang a ni, ni that an ta ki’rchihai leh irhmang vingin kin iom hrang a ni,” a tia. 31Khan anni’n, “Kin farnu hi notizuar angin mo an ibe hrang?,” an tia.
Currently Selected:
IRPHUTNA 34: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
