IRPHUTNA 35
35
Bethel-a Pathianin Jakoba sat a vur
1 #
Irp 28.11-17
Khanchu, Pathianin Jakoba kuang khan, “Thoiin lân, Bethel-a fe ro, kha hmuna khan omin lân; ni upa Esaua kuang rengata ni rotsan laia, ni kuanga inlâr Pathian ta hrangin maichâm siam ro,” a tia. 2Khanchu, Jakoba’n a in mihai kôla omhai kuang khan, “Nin kôla mi dang pathian biakhai kha paihai unglân; irthiang takin nin tukfamhai thûl roi. 3Thoi ei ta, Bethel-a fe ei ti, ki chardong le lungzîng laia ki kuanga om ngai Pathian ta hrangin maichâm siam ki ti,” a tia. 4Khanchu mi dang pathian an kut le mikuara kuarkâia an ibet ngaihai kha an sûta Jakoba an pêka; khanchu Jakoba’n Sekem kho kôla sesua thing bula a thupa. 5Khanchu an fea, an khua vêla mihaiin an lei chihaia, ite Jakoba nâihai chu irzûl ngam ta mahaia.
6Khaang khan Jakoba leh a kuanga om murdihai chu Kanaan ram Luz khua chu an tung ta, Luz khua chu atûna Bethel hmun hi a ni. 7Khanchu maichâm a siama, a upa kuang ata a rot lai khan Pathian a inlâr pena hmun a ni sikin a hmun chu El-Bethel a ti tâk a ni. 8Khan Rebeki donsuitu Debori chu a thia, Bethel hmun sesua thing hnuaia an phûma; khasikin a’rhming khom Alon-bakut an iti a ni ta.
9Khanchu Jakoba chu Padanaram ram rengata a hongin Pathian an lâr pe nôka, sat a vura. 10#Irp 32.28 Pathianin a kuanga khan, “Ni’rhming chu Jakoba a nia; atûn chu Jakoba nang ti ta no nihaia; Israel nang ki iti a ni ta.” 11#Irp 17.4-8 Pathian ngêtin a kuanga khan, “Kei Pathian Itinrêngthotheitu ki ni: irchi tam takin hong pung ro; irchi tep zoi loi rak, nam dang dang changin hon pungtir ni ta, nir chi ata rênghai khom la hong om an ti. 12Khan Abrahama le Isaka, ram ki ipêkhai hi, nang pe ki ta, ni thi tena khom nir chihai pe nôkhai ki ti,” a tia. 13Khanchu, Pathianin Jakoba chu a mâksan nôk tâka. 14#Irp 28.18-19 Khanchu kha hmun khan Jakoba’n lung a phuna, a chunga khan thilinhlanin, sahriak a buaka. 15Khanchu Jakoba’n Pathian leh an chongna hmun irthiang hi “Bethel” a iti a ni.
Rakili thina thu
16Bethel ata an fe nôka, khan Efrat khua tungna hrangin chu a la hla tala; Rakili chu nâiha’n a sê tâka. 17A sân a na pe tâka, a kurmanu’n, “Chi no ro, nâi dang ni inei nôk hrang a ni ta,” a tia. 18Khanchu, hiang hin a nia; a’rtha suaksanin a thi tâka, a nâi irhming khom Benonia#35.18: Benonia ti chu Hebrai chongin “Beidongna nâipa” tihna a ni. a tia; a pa khan chu Benjamina#35.18: Benjamina ti hi ‘Chang tianga nâipa, tihna le vânneina hrang’ tihna a ni. a tia. 19Khaangin Rakili chu lampuia Efrat lama an phûma (Efrat chu Bethlehem khua a ni.) 20Jakoba’n a thân chunga khan lung a phuna: atûn ten hin Rakili thân lungphun a ni ta.
21Khaangin Israel chu a fe maia, Mig-dal-eder khêla a puan in a zar nôk ta.
Jakoba nâihai
(1 Tsn 2.1-2)
22 #
Irp 49.4
Khanchu hiang hi a nia, Israel chu kha rama khan a om laiin; Reubena’n a pa dôngma meithâi Bilhaii kha a va zâlpuia; kha thu kha Israela’n a le’nhriat suaka.
Khan, Jakoba nâihai chu sômkhat inhni an nia: 23Leaii nâihai chu Reubena (Jakoba nâilutîr) Simona, Levia, Juda, Isakara, le Jebuluna hai an nia. 24Rakili nâihai chu Josefa le Benjamina an nia: 25khan Rakili suaknu Bilhaii nâi chu Dana le Naptali an nia. 26Khan Leaii suaknu Zilpaii nâi chu Gada le Asera an nia: hihai hi Jakoba nâihai Padanaram-ah a ineihai an ni.
Isaka thina thu
27 #
Irp 13.18
Khanchu Jakoba chu Kiriath-arba khua Abrahama le Isaka omna Mamre, a pa omna chu a tunga. (Kiriath-arba khua chu Hebron a ni.) 28Khan Isaka dam sûng kum chu irzakhat sômriat a nia; 29Isaka chu a’rtha’n mâksanin, upatak tar dêna damin a ithi a ni ta; a’rchipuihai laia hruaiin a om tâka; a nâihai Esaua le Jakoba’n an phûm ta.
Currently Selected:
IRPHUTNA 35: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
