IRPHUTNA 37
37
Josefa le a urênghai
1Khan Jakoba chu a pa omna Kanaan rama khan a oma. 2Hiang hi Jakoba irchihai thurchi chu a ni, Josefa chu kum sômhleisari mi a nia, a uhai kêl hôl a zuihaia; nâipang a la ni sikin, a pa dôngmahai Bilhaii le Zilpaii nâihai kôla a om ngai a ni. Khan Josefa’n an isêl lam a pa kuang an hrila. 3Khan a pa Israela’n Josefa chu a tar hnunga nâi a ni sikin a nâi danghai nêkin an ren uala: songkol khom satak takin an sui pea. 4Khan, an pa’n an ren ual bîk ti a uhaiin an inhriata; khanchu a sate’n an hnarsa tâka, chongbâi hoi zel irhmu ta mahaia.
5Khan Josefa’n irmang a neia; a uhai kuang a hrila: khatak ata kha an hnarsa ual nôk tâka. 6Ama’n chu “Irngaihoi takin ki’rmang hi ni’rngaipui roi, a tia: 7irngai roi, loia bu ei âta, keima bumût kha a thoia; nin bumûthaiin an irhuala; ki bumût kha chubai an hong mûka,” a tia. 8A uhaiin a kuang khan, “Nangma tê hin mo kin chunga roi ni irêl hrang?” an tia. Khanchu a’rmang thu a hril pehai khan a sân an hmumâk nôk ual tâka.
9Khan, zân khat chu irmang dang a phan nôka, a uhai a hrilhai nôka, “Irngai roi, irmang ki phan nôka; misa, le thahai, ârsi sômkhat inkhathai khin chubai an ni mûka,” a tia. 10Khan, a pa le a uhai a hrila, khanchu a pa’n hiang hin a’rchua a kuang khan, “Irmang ni iphan hi i zât irmang mo a ini? kei le ni nu le ni uhai hin mo khûksadelin chubai nang kin imûk hrang?” a tia. 11#Tîr 7.9 Khanchu a uhaiin an hnarsaa; a pa rêkin chu a thuhril kha a lungrîla a vong chiana.
Josefa an zuara, Aigupta rama a om
12Khan, a uhai chu Sekem-ah an pa kêl hôlin an fea; 13khan a pa Israela’n Josefa kuanga khan, “Ni uhai chu Sekem-ah kêng kêl hôl an ife? hongin lân, nang khom nang tîr ki ti,” a tia. Ama khomin, “Ni tîr ro,” a tia. 14Khanchu, “Va fe’n lân, ni uhai chu an dam le damloi thu, kêlhai khom va eninfelin lân, an thurchi ni hon hril nôk ro,” a tia. Khanchu Hebron phâi ata a tîr suaka Sekem chu a va tung ta. 15Khan, mi tu’n mani, loia a uhai zongin a chai lai kha a hmua: khanchu kha mi khan, “Imo ni izong?” tiin a’rdona. 16Ama’n, “Ka uhai ki izonghai, irngaihoi takin kêl an ihôlna hmun nin hril ro,” a tia. 17Kha pa khan hitak ata chu an lei suak nôk ta, “Dothan-a fe ei tih an iti chu kin hriat,” a tia. Khanchu Josefa chu a uhai kha a’rzûlhaia Dothan-a a hmuhaia. 18Anni khomin hlatak ata an lei hmua, khanchu a va tung mânin ama that hrang lam an lei ngaituaa. 19Irngai roi, so irmang neipa a hong; 20tho thatpai ei ta, khurpadop inkhata inthapai ei ti, khanchu ramsain a that ti ei ta. Khanchu a’rmang kha itin mo a om pe inhre ta a ti, an irtia. 21Khan Reubena’n a le’nhriata, “A that chu thatpai no ih,” tiin a lei sansuaka. 22Reubena’n chu a pa kuanga a hruai theina hrang lam zongin an kuang khan, “Thisen chu insuaktir no roi, ramchâr khurpadop inkhata intha unglân, nin kut chu ban no roi,” a tia.
23Khanchu hiang hin a hong nia, Josefa chu a uhai omna a va tungin chu; Josefa songkol rông satak kha an lei khekpai pea; 24khanchu an hruaia, khurpadopa an inthâka, kha khur kha tui om ta loi, a rong a ni. 25Khanchu bu nêkin an irbuka, an hong thîra, irngai roi, Ismaela khual fe mihai Gilead ram ata saringsei, mirimhoi, thinghnâi, hloi le Mura pêlin Aigupta ram fe hranghai an honga, 26khan Juda khan a urênghai kuang, “Ei sangpa ei thata, a thisen suak thup hin imo a’rfêna om hrang? 27tho kha nêkin ama that loiin Ismaela hai kuang son zuar ei ti; ei sangpa chu rîlbong khata nâi eini sikin,” a tia. 28#Tîr 7.9 Khanchu Midian irvai mihai an honga, Josefa kha khurpadop ata an kaisuaa, Ismaela hai kuang khan tangka sômhniin an zuara. Khanchu Josefa chu Aigupta rama an hruaipai ta.
29Khan Reubena kha a honga khurpadop a va ena, Josefa kha lei om pe ta maka, khanchu ningmurin a puan le diarhai a ir-ek seta. 30A urênghai kuang a va fea; “Tôite kha lei om ta ma! kei te kho tiang mo fe ta ning?” a tia. 31Khan Josefa songkol kha a lâka, kêlchal an thata, songkol kha kêl thisen an pola. 32Khanchu songkol rông Josefa ta chu, an pa kuang an chôia, “Hi hi kin hmu, ni nâipa songkol a ini mo eninfel ro,” an tia.
33Ama’n chu an hriat zôia, “Ki nâipa songkol teh ni a ti ro; ramsain a ithat kêng a ni ta hi te, Josefa chu a ifâk inhekchit ni ta a ti na,” a tia. 34Khanchu Jakoba chu a puan le diarkaihai a ir-ek seta, bora puan silin zoro sôttak a chûlpuia. 35Khan a nâi pasal le nupang murdi’n irtharngam an saka, khannisianlân a’rtha irngam pe thei maka, “Ki nâipa thâna chûl chûlin kei khom ki va ithi hrang kêng,” a tia. Khaangin an pa chu ama irngaiin a chap mai ngaia. 36Khan Midian-haiin Josefa kha Aigupta rama a lupuitak Faroa hnuaia hruaitu inkhat, enkoltu pôl hruaitu Potifara kuanga khan an zuara.
Currently Selected:
IRPHUTNA 37: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
