IRPHUTNA 38
38
Juda le Tamari
1Khanchu hiang hi a hong ni tâka, Juda chu a urênghai kuang ata a rota, Adulam khuaa mi Hira irbelin a oma. 2Juda chu kha hmuna khan Kanaan mi Sua nâinu a hmua, dôngma’n a neia; 3khanchu an râia, nâipasal a neia; Juda’n a’rhming khom Era tiin a phua ta. 4Khan an râi nôka nâipasal an nei nôka, a nu khan a’rhming chu Onana a tia. 5Khan nâipasal an nei nôka; a’rhming khom Sela an tia. Hi nâi a suak lai hin Juda chu Khezib khuaa a om. 6Khan a nâilutîr Era chu dôngma an lâktira, a’rhming chu Tamari a ni. 7Khan Juda nâilutîr Era chu Rengpa mithmua mi sual a nia; khanchu Rengpa’n a thatpaia. 8Khan Juda khan Onana kuang, “Ni upa dôngma siatpuiin lân; a pasal leh an tho tumhai tho pe’n lân, ni upa irchi inpung pe ro,” a tia. 9Onana khan ama irchi a ni loi hrang ti an hriata; khanchu hiang hin a nia, a upa dôngma a siatpui rikipa, a upa irchi a nei thei loina hrangin pên tiang a kêlsua ngaia. 10A sintho dân kha Rengpa mithmua chu sualtak a nia: khanchu ama khom a that nôka. 11Khanchu Juda khan a moinu Tamari kuang khan, “Ki nâipa Sela hi ruatharte a chang mâka chu pasal nei loiin ni pa ina lei om mai ro,” a tia. khano’nchu ama khom hi a uhai angin ni thi pe a ti, a iti a ni. Khanchu Tamari chu a pa ina a va om tâka.
12Khanchu Juda dôngma Sua nâinu kha a thia; khan zoro sôt viat tena Juda’n ite an sâp no tena chu, Timna khuaa a belra mul eptuhai kuang khan ama le a rualpa Adulam khuaa mi Hira leh an fea. 13Khan mihaiin Tamari kha, “Ni tarpu chu belra mul ep hrangin Timna khuaa hong hrang a ni,” iti an hrila. 14Khanchu a pasal chûlpuina songkol kai kha a lei khekpaia, irkhumna puan leh a le’rtuama, Timna khua lam Enaim dâi kôla a lei toia; Sela khom ruatharte a ni tâka. A san chu Sela dôngma hrangin inbeipui mah ti a le’nhriat sikin. 15Khan Juda’n a hmua, tu notizuar moh ni a ti, a tia; a hmêl a hmu infel no sikin, 16a lei lâm mai nupang kha a va pana, “Tho lungkham takin zâlsuam ei ti,” a tia: a moinu kha a nih ti inhre loiin. Khanchu ama’n, “Ni ni zâlpuiin teh imo ni ni ipêk hrang?” a tia. 17Khanchu ama’n, “Ki kêlhai laia a chaltuai nang hong thon ki ti,” a tia. Khan ama’n, “Kha thil ni hong thon mâna ki lei dôn hrangin kongkhitna hrui ni pêkin mo?” a tia. 18Khan ama’n, “Imo nangma khit thei zât nang ki ipêk hrang?” a tia. khan ama’n, “Ni’rhmingin ni kongkhitna hrui le ni khianghrol leh khan,” a tia. Khanchu a pêka, a zâlpui tâka, khanchu nâi a vongpui ta. 19Kha zoiin chu a thoia, a’rkhûna puan paiin a meithâi tukrivo a tho nôk ta. 20Khan a kongkhit nupangnu a ipêk la nôk hrangin a kêlchal tuai kha a rualpa Adulam an chôitira, khannisianlân va hmu maka. 21Khanchu nupangnu omna hmuna mihai kuang khan, “Enaim khua tiang kôla notizuarnu kha kho tiang mo a om ta? tiin a’rdonhaia. Khanchu anni khan notizuar reng hi khuaa hin tûte om ngai mahai,” an tia.
22Khanchu Juda kuang a kîr nôka, “Kha nu kha va hmu thei ma ung, an khuaa mihai khomin hi hin tûte notizuar om mahai an ti,” a tia. 23Khanchu Juda khan, “khano’nchu a ta hrangin la ta ri seh a tia, khano’nchu mualphoi irsak ei ti, ni va hmu ta no sikin,” a tia. 24Khanchu tha thum zoia chu mihaiin Juda kha, “Ni moinu Tamari khan pasal a zonga, khakhêla pa irdang loiin nâi a vong,” tiin an hrila; khanchu Juda’n, “Hruaisuak unglân hâl thatpai roi,” a tia.
25Khanchu hruai suakin a oma, a iti chu “Hi thil neitupa leh hin kêng nâi ki ivong,” a tia. Khanchu a pu hril hrangin mi a tîra: khanchu ama khom a va zuia, a iti chu, “Hi thil kongkhitna hrui le khianghrol hi ni ta ma ni, eninfel sabak ro,” a tia. 26Khanchu Juda khan a ta a nih ti an hriat zôia, “Keima nêkin a ifel ual a ni hi te, ki nâipa Sela lak inluatir loiin ki oma,” a tia. Khanchu Juda khan siatpui ngam ta mah.
27Khan, nâiha’n a sê zoro tena chu hiang hi a nia, a nâi chu inphîr an lei ni chiana. 28Khanchu a nâi inkhat chu kurmâhaiin a kuta an lei chela, a suak masa chu nâilutîr a nih ti irdangna’n, a kuta patsen an khit pea. 29Khanchu a kut a thun nôk lai takin a sangpa inkhat a lei zuang suak masaa. Khanchu an kurmâhai chardongin itina mo lampui nin irchu? an tia. Khasikin a’rhming khom Pereza#38.29: Pereza irhming omzia hi inkhoi tihna a ni. an tia. 30Kha zoi kêng matona a kut zuang suak masa patsen leh irkhit kha a zuang suaka: a’rhming khom Zera#38.30: Zera irhming omzia hi Hebrai chongin ‘a sen vâr’ tihna a ni. an ti.
Currently Selected:
IRPHUTNA 38: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
