DOWLLO 26
26
Agripa Maiṭhuwmmi Poul li Mkarthe loi
1Agripa ngi Poul hin theda, “Nah adaksaa ki tummi kpaura akrot pikka. Ava dilli Poul li mkhut haida karthe loi chda:
2“Kruwng Agripa, Jihudia rek mii mkheng ngi nei mdo tithe psul nlam, ava nah amaiṭhuwmmi snii ngi kdo theloi chaak rang leiji ksuwkṭha changi kirbin kchaam ping, 3mleija nang ngi Jihudia rek leh pau kthuwk mkheng ado tdee pik ava ngi mlei kurthuwkda, nei kpausaam karyaa thung ngi ado tdiil pik chaak nra kaktham kcha imping.
4“Neiji keksenao ki kupṭhunni kdaksaa katki kchati rek arlakki Jerusalem thung ngi ka am kcha ping, Jihudia rek mkheng ngi ava mdodee dok. 5Mmaanni sakhi mpiik nuwm inbi, mpha roiksot thung ngi mmaanni mdodee in, mleija neenki dhormo thu knet merri Pharisi miilai khatti ka am cha ping. 6Ungta tunva neen kpahle hin Isowr paureel dok ava kdo arngai chaak leiji mdo kṭewl rangki hava thung ngi krip kchaam ping; 7sumkhur sowm lei knii ngi suwn jaan knai kma plung klutti luwbukda mdo phaak chaak raanki mdo arngai in. Ungta O kruwng hava karngai ji Jihudia rekki kraal mpii lamda! 8Isowr ri kdiyou thungki mdo prin pinlet ava naan ku mii khatva talu leiji do ksi kma thleer ri abin inna?
9Nei kdaksaa kat daat rukva, Nasareth ki Jisu kro kma ngi nong knempok kdo tlot kat kat ra dinu kdobin. 10Ungta ava neiji Jerusalem thung ngi tlonu; thiimpu kinreel rek rutan piikki, kintiing rek mii knempok ava rownginn thung daatti kukhum kma, pdainu mmaanni mi eayo in mpha thung rukva neiji mraal in kpii thu kdo tpom lam. 11Ungta neiji maknem thung ngi synagog rek mkheng thu mraal pii lamnu, Isowr kjowm kcha ngi mdo tlot nraan kurthlongnu; ungu kdung plung kthingi mraal pii lamnu, paam ktlokki khuwpii rek kpha ruk pja chlamnu.
Poul li Plungren mdo Hurna mdo The
12“Hanto neiji thiimpu kinreel rek rutan ki paupṭum tu kilṭhi ngi Damaskas tha chetnu. 13Kunthun ṭimmi, O kruwng, lamtha neiji parwaanki mar awng khat deinu, kniw kheel dekki kleng mar awng ngi nei leh kmiiṭhi rekka mtukhul dok inda. 14Ungta kikheng inni dul leen ktluk chaak in thungta, Hebru pauvi nei kihin mdo the slii neiji aryaanu, “Soul, Soul, talu leiji Neia atapjat chaakka? Nang ngi tarliing akaubi lim chnadi.’ 15Ungbi neiji thenu, ‘Mukpu, Nah ku ptida?’ Ungbi Mukpu ngi kihin theda, ‘Neia nah do pjat slii Jisu ava ping.’ 16Pdainu kardelra akhu ngi rip; mleija hava tummi neiji ahin ktardet ping, mleija nang ngi ado tdee ungta Neiji ado ktidet ra ava sok loda sakhi ado piik nra Neiji ado kukchol khiin nra, 17Neiji miirek leh ktlok chati rek thungki aṭen pthuwk nikdon 18mleija mmaanni kjiing thungki mar awngtha, seitaan rutan thungki Isowr ktongtha kinle da, pnu rek kuptlot pik mdo arlaan chaak nraan ungu Nei mikrin kchangi kartleu dok rek arlakki ado thiik lam nra, mmik in kapvan pik ra Neiji aksii kurthuwk ping.’
Poul li Mnong mdo The
19“Ava ngi mlei kurthuwkda, O kruwng Agripa, neiva parwaan ki mik kleng thu kleekka pchaang maang, 20pdainu rukri reeppi Damaskas tha, ava dilli Jerusalem tha ungu Judia paamkowl mkheng thu, ungta ktlok chati rek hin rukva thethuw nu, mleija mmaanni plungren hurda ungu Isowr hin mkinlet nraan ungta mmaanni plungren hurda kurhui nong mdo tlot nrang lei. 21Mleija hava ngi mlei kurthuwkda, luwbuk Inn thu Jihudia rekki mukjowng lamda, ungu mke eayoura kurthlong lamda. 22Snii kpha thu neiji Isowr hinki kbom thloi chnu ungta hava thu ripnu kdil leh klin hinni sakhi kpiik chaakka, 23mleija Khrista ngi kja kakham parteel kat da, ungu ava ngi, kdiyou thungki rukri reeppi ring kinle da, miirek leh ktlok chati rek mikniing hinni mar awng mkaryaam nra, kthuwk dok khulpu rek leh Mousi dothe ava kma donle neiji do khat lee the chmaang.”
24Ungu mma ngi hanto mkarthe loi thungta, krowl kparyaa ngi Phestas ti theda, “Poul, mong kukto kchaamti, kdung reenni akurchu chaakki mong atupto pthia.” 25Pdainu Poul li theda, “Kinreel sii Phestas, neia mong kto maang, pdainu mkindit kat kthe cha ping. 26Mleija kruwng ngi hava le mlei deida, ungu mma hinni kintekki kpau kcha ping; mleija mma hinva paurek ava kurdowl ava pme mleija neiji deinu, ditta hava kensi khat thung ngi kthuwk nong ava pme. 27Kruwng Agripa, khulpu rekka nangva arin chaak mo? Nang ngi rin chna tdit neiji kdea.” 28Ungbi Agripa ngi Poul hin theda, “Mpha ktoi tek thung ngi khristen atpurthuw nuwm ma!”
29Ungbi Poul li theda, “Toi tek daat joso mata saangpa daat joso Isowr hin kṭhil kma donle, nang daat kma pdainu snii ngi mkaryaa kcha mii mkheng rukva, hava thiir ri hephep daat kma nei klulu mkurthuw nrang leiki.”
30Ava dilli kruwng leh paamkpupa Barnis leh kuk ong miirekka rip lamda; 31ungu mmaanni mkunsun in thungta, khat leh khatti the lamda, “Hava miilaija mdiyo nra mata rownginn thung ngi tukhum nrangki mlei do khat lee ame.” 32Ungta Agripa ngi Phestas hin theda, “Hava miilaija Kaisar hin mthe thut ma tlaangbi, kintekki tapthlat pthii rang nga.”
Currently Selected:
DOWLLO 26: LAMKBSI
Highlight
Share
Compare
Copy
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
