DOWLLO 27
27
Romia kira Poul li Arkuwngpii Mtuwn
1Ungta neenni Romia kira arkuwngpii ktuwngra kukurthlon in thungta, mmaanni Poul leh rownginn thungki mii murson rekka, Agastas rawlmii kinreel sii mdodit rawlmii rek berksu mmiing Julias mdodit ava hin parlaan lamda. 2Ungta Asia paam ktai thung ngi kchet ra Adramitian arkuwngpii khat tun tuwng innu, neenni truwn leen howl innu, ungu Thessalonikia ki Masidonia mii khat Aristarkas ti neenna mṭhiinda. 3Mupduk nii ngi Sodon thlung innu; ungta Julia va Poul la wonsat klongi tloda, mplap rekki tuk mdosut pik nra rot pikda. 4Ungta ava thungki ngi truwn leen arkuwngpii tun ktuwn in thungta, tchangkhuw ngi mdo traan lei inni, Kupras prahpaam ktongtha howl innu. 5Silisia leh Pamphilia dusukki truwn thung ngi howl innu, neenni Lisia thungki Maira tha thlung innu. 6Ava thung ngi Italy kira Alekjandria ki arkuwngpii khat, rawlmii berksuva phada, ava thu neen rukka muptuwng chaanda. 7Niikhuw roiksot dokki neenni ktap naam naammi howl innu ungu kparsa langlang ngi Knidias thlung innu, ungu kche kurnowl raanna tchangkhuw kraang ngi mkarsit ma thungta, Salmonia ki Kretia prahpaam ava kurdungi howl innu. 8Kparsa langlang ngi neenni arkuwngpii thlunna mun kuhui deek mdo dit Lasia khuwpii ktinel tek thung ngi thlung innu.
9Mpha roiksot reenni maangda, ungu kthen ngowl naan ro mso reen leiji arkuwngpii kuhowl ava parsa langlangda, Poul li mhin inni parseel lamda, 10theda, “Ocha rek arkuwngpii ava do ngi nor donle knemmi kmaangra, arkuwngpii leh mthungki dona rek daat kma nrinkhu inrukka kmaangra.” 11Pdainu rawlmii ki berksuva Poul dothe hinva, arkuwng ksa leh ava kpupa pau knaa tkiin betda. 12Ungta arkuwngpii thlunna ava phalbii thung ngi mthlunna mṭhat ma leiji, mii maknemmi ava thungki truwn thung ngi mdo thiik nra parseelda Kretia ki arkuwngpii rina Phonikis mdodit karthakki kniw thuwna ktong ki leh kurdu ki kniw thuwna ktarngaiji thlung innu, ungu ava thangva phalbii kurthuwkda.
Truwn thu Tchangkhuw Kraang
13Ungta kurdu ktongki tarthli marhan raan hiir hiir thungta, mmaanni mdo ngei in kpha kcha heppi karbin lamda, mmaanni mnareeng ri khiing lamda, diibiing ktinel tek Kretia tha howl lamda. 14Pdainu tunkat daatti tchangkhuw kraang ngi, karthakki kniw thuwna mdodit avaki ngi laan ktongtha kdung ngi raanda; 15ungta arkuwngpii kjowngda tchangkhuw mdiil pchaan ma raan thungta, neenni mlam ma pthiinnu anto mhowl inda. 16Ungta Kouda mdodit prahpaam kdilsuwn ava tingi chenda, kparsa langlang ngi neenni arkuwng ava kjowng innu; 17ava mkhiin dil thaan rongi, mmaanni arkuwngpiia mdo howl nraan ktong thang ngi howl lamda, ava dilli Sytias tha kchen daat rang mo kdingi ṭi lamda, mmaanni arkuwng buwdaar ava pchowm lamda, ungu anto howl lamda. 18Tchang khuw kraang ngi kdung reenni mdo traan lei inni, mupduk niiva mmaanni arkuwngpii leenki dona ava arkuwng leen kvar pṭhun lamda; 19ungta mnii kdumna nitva arkuwng thungki dona ava mkhut kat inni var lamda. 20Ungta nii kursonni bursi ruk kniw ruk mkandanma thungta, tchangkhuw kraang ngi kdung mjiil dok inda, kring chra kdobin chaak in mkheng ava am mda.
21Then mdo chaak manaan roi mso reen thungta, Poul li mhin inni arvangda, ungu theda, “Miirek, naanni ataryaak pik daat tlaang in, ungta Kretia ki nhowl ma tlaang inbi, kar eakrep leh kmaang amnime. 22Pdainu plung ado pnet nraan neiji akatham chaak inna; mleija naan arlakki ku khat lee rinkhu maang nime, pdainu arkuwngpii daat ra. 23Mleija snii jaanni Mma ki Waan tamsii kurthuwk neiji luw kdobuk ava ngi kbe tha ripda, 24ungu kihin theda, ‘ṭi liit ma, Poul; nang ngi Kaisar maiṭhuwmmi arima rome, ungta asuw, nangtu kilṭhi ngi kohowl miirek mkheng nga Isowr ri mrot pikka.’ 25Ava leiji miirek, plung apnet chaan, mleija Isowr rinchnu, nei kdothe hep hep daat ra. 26Pdainu prahpaam murson tha nenni tchen maan rome.”
27Jaan ava mnii sowm lei plitna veida, neenni Adria truwn thung ngi tchangkhuw doraanni kaklaan in thungta, thanṭim arveelli arkuwngpii kohowlva, laan nai pakda kdingi binda. 28Ava leiji mmaanni lam somknii kukthuk archaang pha lamda, mhai kursown bet in thungta, lam sowm lei parnga archaang ngi pha nowl lamda. 29Ungta neenni lung klin nor daat nikaan mo kdingi ṭi innu, mmaanni arkuwngpii mdil ktongki mnareeng plii ava pchowm lamda, khuw var nra ṭhil chaannu. 30Ungta arkuwngpii kohowl rekki mchen chaak nraan mlam thlaam lamda, arkuwngpii thungki mnareeng kupchowm dotlot tlo leek lamda, arkuwng ava truwn thu pṭum lamda, 31ungbi Poul li rawlmii ki berksu hin theda, “Hava miirekki arkuwngpii thu ma am maanbi, kartlan pchaang nimaanti.” 32Ava leiji rawlmii rekki arkuwng ri kvetbuk lamda, ungu anto pthla pthii lamda.
33Khuw mtlei rang thungta, mkheng inni then mruk ruk mdo chaak nraan Poul li ktham chlamda, theda, “Sniiva naanni then ado chaak liit mnaanki nii sowmlei plitna kurthuwkka, naanni nowl nowlda sown maan, akheng inni then mruk ruk achaan. 34Ava ngi mlei kurthuwkda, arutan nraan then mruk ruk achaan, mleija naan ku mii khat lee luwleenki sam khdaat pre ṭuh nime.” 35Ungta mma ngi hava the thida, mma ngi thenpen louda, mmaan mkhengki maiṭhuwm mi panpaak thida khuida kchaa pṭhunda. 36Ava dilli mmaan mkheng inni plung pngar lamda, mdaksaan ki then mruk ruk chaa lamda. 37(Arkuwngpii thungki neenna kikheng inni arjaa knii som tikheu lei truk in ping.) 38Ungta kukhoppi mmaal dok inle, arkuwngpii mthowm nra, kehu rekka truwn thu var pthii lamda.
Arkuwngpii Kukui
39Tunva khuw mtlei thungta, mmaanni laan ava tin chlam mda, pdainu diibiing khat dei lamda, mrot khim khai thu arkuwngpii ava diibiing ava tha ṭhi nuwm lamda. 40Ava leiji mmaanni mri khim khai kvet lamda truwn thu var pthii lamda, mpha ava kat thung ngi arkuwng nareeng ruk parthlet lamda; ava dilli mduki arkuwng ava tchangkhuw kraang ktongtha thii lamda, diibiing tha howl lamda. 41Pdainu diibiingki sitphui norda, mdu ktongki ava diithu tla chdokda; arkuwngpia sitphui thu nowt dokda, kakna liit kma am chdaatda, ungta mdil ktongki ava tchangkhuw kraang ngi mlaak mlaakki kui chda. 42Rownginn thu mdo khum ku mii khat lee ngi dii kbulda mchen chaak ma nraan rawlmii rekva ke eayou rangki kurthlong lamda; 43pdainu rawlmii rek berksu ngi Poul mdo ktlan nuwm leiji, mdobin in ava mdotlot ma nraan theda. Dii kukbul dei rekki arkuwngpii leenki junkhuwngda, rukri ngi laan mthlun nraan pau pṭumda, 44ungta ka am daat rekva dingphel mata arkuwngpii klekṭik tun aklaan so dida. Ungu ava leiji mii mkheng ngi laan tha kal chaannu.
Currently Selected:
DOWLLO 27: LAMKBSI
Highlight
Share
Compare
Copy
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
