DOWLLO 6
6
Kbomrek Tikheu
1Tunva hava nit rek thung ngi siikhu rekka nem set set lamda, Grik pauvi kpau Hebru rekki Hebru mii rekka mraal pii lamda mkho the chlamda, mleija meikhunuh rekki mnii ktaiki kthem pik nong thung ngi mnong in mleek inna kdingi mmaanni the lamda. 2Ungta sowm lei knii rekki siikhu rek own lamda, ungu the lamda, “Kchaa knee tum daatti nenni Isowr pauna tmaak pthiin ronime. 3Ava ngi mlei kurthuwkda ku u knao rek, kṭha nong ktlo rek, pthla leh lousing ngi kdim miilai tikheu naan arlakki atiker in, hava nong ktlora neenni kchol inni. 4Pdainu neenva kṭhil cha thu ungta pauna nong ktlo thung ngi kdak saanna plung plut inni.” 5Ungta mmaan dothe ngi kurtuwl mii mkheng plung pngamda, ungta mmaanni krin cha leh pthla kchiir ri kdim miilai kurthuwk, Stiphan leh Philip, ungta Prokhoras leh Nikanor ungu Timon leh Parmenas ungta Antia ki Jihudia rek dhormo kchet Nikolas havale lim kchol lamda. 6Kenyee rek maiṭhuwmmi hava mmaan prip lamda, ungta mleen thaanni mkhut in khiing lamda, ṭhil chlamda.
7Ungta Isowr pauna kurjouda ungu Jerusalem thung ngi siikhu rek kdung ngi nem set setda, ungta thiimpu rek knempokki krin cha thung ngi pṭoi lamda.
Stiphan mdo Kjown in
8Ungta Stiphan na plungnee leh rutanni dim chda, miirek arlakki klin langlang titinna rek leh tngana rek tloda. 9Ava dilli synagog thungki kintek mii rek angṭhe, (anto mdodit) ungta Kuirini kirek, ungu Alekjandria kirek, ungta Silisia leh Asia ki mii rekki rip lamda Stiphan karteen ṭhi lamda. 10Pdainu mma ngi pthla leh lousing ngi mpau nathung ngi rip bong pchaang lamme. 11Ava dilli mmaanni tuprutti mii rek parseel lamda tipthe lamda, “Mma ngi Mousi leh Isowr kjowm kcha ngi mpau neenni karyaak in.” 12Ungta mmaanni mii rek leh kver rek ungu Nowlam chukpu rek sinchaak nlamda ungta mmaanni arva lamda kjowng lamda karseel lop maiṭhuwmmi ṭhi lamda. 13Ungu “Hava miilaiji mun kchiir leh Nowlam mraal kpii ngi pauna mdothe down liitme; 14mleija Nasareth ki Jisu ngi hava munna eakrep da, Mousi ngi nen nhin miido tpiik in nopa ava karthlengra dida mma dothe neenni karyaak in,” dida kindit kma sakhi kpii tiprip lamda. 15Ungta karseel lop thung ngi kukong mii mkheng ngi mma msut rim in thungta mmaija Waantamsii mai heppi dei lamda.
Currently Selected:
DOWLLO 6: LAMKBSI
Highlight
Share
Copy
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
