DOWLLO 7
7
Stiphan Doparyaam
1Ungta thiimpu kparthaang ngi theda, “Hava anto mo?” 2Ungu Stiphan ni theda:
“Ku u knaorek, ungu kpah le mhai aryaak pik chaan. Nenki npah in Abraham mi Haran thu ma am du Mesapotamia thu ma am mpha thu Isowr laarnee ngi mhin ktardetda, 3ungu mhin theda, ‘Nang ngi apaam leh asumkhur thungki kurloura Neiji ado ktidetra paam ava tha vang.’ 4Ava dilli mma ngi Chaldia paamki sunda Haran tha vang amda. Ungta mpah mdiyo dok diltha, tun tunni naan amnaan paam ava thu Isowr ri punthotda; 5anto daat joso Mma ngi mhin alrou khat lee piime, mkhu thiik nrang ruk piime, pdainu mma diltha mcharuwl rek hin paamkpu ra ava pii nikdi dida mma ngi nao thloi chma daat joso paureel pikda. 6Ungta Isowr ri hava kat leiji theda, ditta mma charuwl ava ngi miipaam ktlok tha malpa ngi amdonle, kum arjaa plii lik thung ngi suwk owrri owr donle ka amra. 7‘Pdainu mmaanni sok mdolo in chati ava Neiji kṭewl nikdi, ungta ava dil rongi mmaanni thuwk lamdonle mmun hava thung ngi Nei luw mukbuk ro lamra,’ dida Isowr ri theda. 8Ungta Mma ngi vunmor kreenki paurina ava pii lamda. Ava leiji Abraham mi Isek pah, ungta mnii tretna nitti vunmor reenpik da, ungu Isek ki Jakob pah, ungta Jakob pi nen npah le sowm lei knii avale pah.
9“Ungta npahle ngi Joseph kheithe nlamda, Egypt tha jur lamda; pdainu Isowr ri kurthlo ṭhida, 10ungta kjakham mkheng thung ngi ktlan pikda, ungu Egypt kruwng Pharon awng ngi ksan leh lousing ava piida, Joseph pi Egypt leh mphungka mkheng tun paamkpu ngi paalda. 11Tunva Egypt leh Kanan paam mkheng nga poitham arveida, ungta kdung suwkthuwk lamda, ungta nenki npahleva then pha chlam mda. 12Pdainu Egypt paam thang ngi then ka amma tdit Jakob pi aryaa da, rukri verki nenki npahle ava siilamda. 13Ungta kvel mvei knitna thung ngi Joseph pi mu upale hin ktardetda, ungu Joseph phungka rekka Pharonni deida. 14Ungta Joseph pi mii siida mpah Jakob leh msumkhur rek mkheng raothla somtikheu lei parnga ava mhin own lamda. 15Ungta Jakob pa Egypt tha jungda. Ungu mma mdak kat ruk ungta nenki npah le ruk diyou chda. 16Ungta mmaanna Shekim tha kdom pinle lamda, Abraham mi Shekim thung ngi Hamor chapa rek hinki thiir kpowl li mdoren thlaan ava thung ngi alruwl lamda.
17“Pdainu Isowr ri Abraham hin mdo rot pik paureel avaki mpha mve der der thungta, Joseph kdeikma Egypt kruwng ktlok khat mthuwdu khim khai, 18mii rek ava Egypt tha linsaang lamda pung lamda. 19Mma ngi nenki nsuruwl rekka kdung owr chlamda, nao kdowng rekka mrin ma nraan var pthii lamda, nen npahle namtrom ptlot lamda. 20Mpha ava thu Mousi ṭouda, Isowr dosut nathung ngi kdung mrungchen ṭhada. Ungta mma mpah inn thung thla kdum juwk chda; 21ungu mma mvar pthii mpha thu Pharon chanu ngi mma mdaksaa katki chapa rang ngi juwk chda. 22Ungta Mousia Egypt rek lousing mkheng kurchuk dokda, ungu mma ava mpauna rek leh mnong tlot thung ngi ruktang riim.
23“Mma ava kum somplii mphaak thungta, muplung thung ngi mu u mnao rek, Isreel chapa rek vel chnuwmda. 24Ungta mmaan arlakki miilai khat ava kindit liit kma mdo owr chaak mdee thungta mma ngi pkhaan pikda ungu Egypt mii ava knuwr youda mphuw lopikda. 25Mma khutti mu u mnao rek ava Isowr ri kṭenthuwra tdit dei lam pakda kdingi bin chda, pdainu mmaanva deipandi lamme. 26Ungta mupduk nii ngi mmaan msingreel in kalrai deida, ungbi mkarṭhat nraan theda, ‘Mii rek, naanna unao in pti, talu leiji khat leh khat hin karmak nong atlot inna?’ 27Pdainu mveen hin karmak ktlo mii ava ngi duwl pthii thida, theda, ‘Neen kleen kekṭewl khat rangki ku ngi paamkpu atpur owlda? 28Janii ngi Egypt miilai khat ado eayo heppi eayou ni ati ditmo?’ 29Hava mdo the leiji Mousia chen chda, Median paamtha amchda, ava tha chapa knii rek pah ngi amda.
30“Tunva kum somplii mve dok thungta, kbowklaiji Sinai lown tunni Waan tamsii khatti chanchiim khat thu meikṭuwng thung ngi mhin ktardetda. 31Mousi ngi ava mdee thungta ngak chda; ungta ksuw rangki mhan nai thungta, Mukpu krowl kthleng ngi theda, 32‘Neia nah pahle ki Isowr ping, ungta Abraham, Isek ungu Jakob leki Isowr ping.’ Ungta Mousi va kunchunda suw bong pchaangme. 33Ungta Mukpu ngi mhin theda, ‘Akhu tunki khukok rekka asuwt dok, mleija arina mun ava dul kchiir. 34Egypt thungki kmii rek suwkthuwk ava kinditti Neiji deinu ungu mchelchan in Neiji aryaanu, ungu mmaan kṭenthuwra kurjung ping. Ungta tunva arvang, Egypt tha asii nikdi.’
35“‘Nah ku ngi paamkpu ungta kekṭewlra ado tsii,’ kdingi mdo theen Mousi hava chanchiim thung ngi mhin ktardet Waan tamsii ava dobommi paamkpu leh kṭenthuwra Isowr ri siida. 36Mma ngi Egypt thu ungta truwn ksen thu ungu kbowklaiji kum somplii lik thung ngi tngana rek leh titinna rek tloda mmaan ava ṭenpthuwkda. 37‘Isowr ri naanki a u anao rek thung ki naan tumra nei klulu khulpu khat kupthuwkra,’ dida Isreel mii rek hinni kthe Mousi ava hava. 38Sinai lownni mma hin paukthe Waan tamsii ungta nenki npahle tu kilṭhi ngi kbowklaiji kunlowm lop rektu ka am mma ava hava, ungta nen nhin inni miido tpiik raanki kringki pau ava mdo arlaan chaak dok. 39Nen npahle ngi mpau leek lamda, pdainu msiir inni kneng pthii lamda, ungu muplung reel inna Egypt ktongtha pinle lamda, 40Aron hin the lamda, ‘Nen ndusuk inni kvangra neen ktum raan mukpu rek mhai seem pik in, mleija Egypt ki nen mikṭenthuw in Mousia tak kdi kcha tdit dei maanmin.’ 41Ungta ava nit rek thung ngi mmaanni silsuwn khat seem lamda, ungu khut doseem pthla hin tlaai down lamda, khut nong rek tun kanpa lamda. 42Pdainu Isowr ri pinle lamda, ungta parwaanki bursi rek luw mdo buk nraan pii lamda, ava khulpu rek laaika thung ngi hanto mdo kjit hep daat;
‘O, Isreel miirek, kbowklaiji kum som plii thu,
Nei kihin tlaai ado down nraan saa eayou maanti mo?
43Ungta Maloch buw inn leh Isowr Rephan tdit,
bursi ava naanni luw ado buk nraanki,
pthla ado seem in lou dok intinu;
Bebylon kheel dekki aju punthot pthii nikaan di.’
44“Nenki npah le ngi kbowklaiji sakhi ki buwinn thloi lamda, mdodee dil kṭoiji ava kdujikki ado seemra dida Mousi hin kpau Mma ngi the pik lamda. 45Nenki npah le dungi Isowr dorei pthii ktlok chati rek paam thung ngi ma am in mpha thu nen npah le ngi Joshua tu kilṭhi ngi buwinn ava kdom dok lamda. Ava leiji Devid nit rek kpha thung ngi amda. 46Mma ngi Isowr dosan pha chda, ungta Jakob pi Isowr tumra ma am nraan ṭhil chda. 47Pdainu Solomon ni Mma Inn khat sak pikda. 48Anto daat joso Kparthaang sii ava khut dosak Inn thung ngi ame; khulpu dothe hava lulu,
49‘Parwaanna Nei kuk onna,
ungta dultia Nei kukhu therna.
Mukpu ngi theda,
Nei ka am nra talu Inn sa naandi,
mdit mata Nei kakarngat nra munna tu ungda?
50Nei kukhutti havale
mkheng nga mdo sak
pme mo?’
51“Lowl kakar miirek, plungril leh knaa ngi vunmor kreen kmarek naanni pthla kchiir ra mpha ktai thung ngi ro maanti. Naanni apah le dotlot lulu ngi atlot inna. 52Apah lengi kjakakham mdo piik maan khulpu ku ka am da? Ungta rinkindit Khat kurjung rangki mlei thung ngi mdungi kthe pik ava mmaanni eayou lamda, tunva naanna kro kmarek ungu ke eayou rek kurthuwk in pti. 53Naanna Waantamsii dopiik Nowlam ava karlaangrek in pti ungu arkhii maanti.
Stiphan Lung ngi mdo Deen in
54Tunva mmaanni havale maryaak in thungta kdung plung pthit lamda, mma raal kpiingi mhaa kril psuk lamda. 55Pdainu mma ava pthla kchiir ri pum dimmi dim chda, parwaan mhansut rim thungta Isowr laarnee ungu Isowr chang ktongtha Jisu krip daat deida. 56Ungta mma ngi theda, “Asuwn, parwaan kparvang nga, ungu Isowr chang ktongtha Jisu krip daat kdea.” 57Pdainu mmaanni kdung owng lamda ungu knaa kuhuwm lamda ungta kut,lur lamda mma nam knuwr lamda. 58Ava dilli mmaanni duwn tha kneng pthii lamthida lung ngi deeng lamda; ungu mmaan dona ava msakhi rang ngi ksenao khat mmiing Soul mdo dit ava khuther ri thii lamda. 59Ungta mmaanni Stiphan na lung ngi mdeen slii arlaanni, “Mukpu Jisu nei kapthla mhailo pik cha,” dida mma ngi ṭhil chda. 60Ungta mma ngi tardiilda krowl kparyaa ngi owngda, “Mukpu hava pnu ngi mraal pii chlamma,” dida theda. Ungu mma ngi hava mthe dokle iip chdok da!”
Currently Selected:
DOWLLO 7: LAMKBSI
Highlight
Share
Copy
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
