Zãa 15

Jesui í jɛ icui jĩi ndii rezɛ̃ɛ

1Si anyii nŋu nɔ Jesu í sɔ̃ ŋa má í ni, amui ǹ jɛ icui jĩi ndii rezɛ̃ɛ nɔ Baam mɔi í jɛ woo logooɛ. 2Amaawɔm ŋa iyi a ci ya so fei, nŋui í ya da ŋa ku nyɔ ŋa. Amaawɔ ŋa iyi à waa so mɔ í ya kɔta ŋai ku ba a so a kɔ̃ɔsi. 3Iŋɛ ì má tã do saabui ide iyi ǹ sɔ̃ ŋɛ. 4I jɔ̀ i má sim ŋa, nɔ amu mɔ an má si ŋɛ. Si bɛi amaawɔ kaa yɔkɔ ku so iso do araɛ bii kù jɛ wa má si icui jĩi, bɛɛbɛ mɔi iŋɛ taka nŋɛ i kaa yɔkɔ i so bii i kù waa má sim ŋa.

5Amui ǹ jɛ icui jĩi ndii rezɛ̃ɛ, iŋɛ mɔi ì jɛ amaawɔɛ ŋa. Inɛ iyi wa má sim nɔ amu mɔ ǹ wa n má si lafɛ̃ɛ, á so iso nkpɔ. Amma bii kù jɛ do amu i kaa yɔkɔ i ce ngɔgɔ ŋa. 6Inɛ iyi kù waa má sim aa nyaai a nyɔɔ bɛi à ya nyɔ amaawɔi jĩi ŋa. Si anyiɛ, bii à gbɛ nɔ a tɔtɔɔ ŋa a dasi ŋa ina a jo. 7Bii ì waa má sim ŋa nɔ idem í wa si ŋɛ i tɔɔ mii iyi ì bi fei ŋa aa ba ŋa. 8Iso nkpɔ ku so nŋɛi á jɔ̀ Baam ku nɛ amboe. Bɛɛbɛ mɔi aa nyisiò inɛ ŋa iyi iŋɛu mɔcɔm ŋai. 9Ǹ bi ŋɛi bɛi Baam mɔ í bim. I jɔ̀ i wa si kubim ŋa. 10Bii ì waa jirima woodam ŋa, bɛɛbɛ mɔi aa wa si kubim ŋa, bɛi amu mɔ ǹ jirima woodai Baam nɔ ǹ wa si kubiɛ.

11Ǹ sɔ̃ ŋɛ inɛ nŋu bɛi ku ba inɔ didɔ̃m ku wa si ŋɛ nɔ inɔ didɔ̃ nŋɛ ku kɔ̃. 12Wooda iyi ǹ na ŋɛ wee, i ya bi njɛ ŋa bɛi ǹ bi ŋɛ. 13Kubi nla gɔ kù wɛɛ iyi í re inɛ ku ku si agbɛi kpaasiɛ ŋa. 14Bii ì waa ce iyi ǹ dasi ŋɛ ì jɛ kpaasim ŋai. 15N kaa n kpe ŋɛ aru má, domi aru ci ya mà mii iyi lafɛ̃ɛɛ wa ce. Amma ǹ wa n kpe ŋɛ kpaasi ŋa si na iyi í jɔ̀ mii iyi ǹ gbɔ hai bi Baam fei, nŋui ǹ sɔ̃ ŋɛ bɛ. 16Kù jɛ iŋɛi ì cicam, amma amui ǹ cica ŋɛ. Nɔ ǹ nya ŋɛ ikã ku ba i ya so iso iyi á kpɛ ŋa. Si bɛɛbɛ mii iyi aa tɔɔ Baaba do irim ŋa fei á mu nŋɛ. 17Iyi ǹ wa n dasi ŋɛi í jɛ i bi njɛ ŋa.

Inɛi andunya ŋa à cé Jesu do inɛɛ ŋa

18Bii inɛi andunya ŋa à cé ŋɛ, i mà ŋa iyi amui à tako à cé. 19Bii ì jɛ ti andunya ŋa, tilasi inɛi andunya ŋa aa bi ŋɛi, domi tu ŋai ì jɛ ŋa. Amma amu ǹ cica ŋɛi ǹ nya ŋɛ hai si andunya, nɔ i kù jɛ ti andunya má ŋa. Nŋui í jɔ̀ inɛi andunya ŋa à cé ŋɛ. 20Nɔ i ye gigii ide iyi ǹ sɔ̃ ŋɛ ǹ ni woo ce icɛ ci ya la ku re lafɛ̃ɛɛ. Bɛɛbɛi si bɛi à wahalam aa wahala iŋɛ mɔ. Bii í jɛ à jirima idem, bɛɛbɛ mɔi aa jirima ide nŋɛ. 21Amma mii ŋau bɛ fei aa ce nŋɛi na irim si na iyi í jɔ̀ a kù mà inɛ iyi í bɛm wa. 22Bii n kù naa n kù sɔ̃ ŋa ide wo, dulum kaa wa si iri nŋa. Amma nsɛi a kù nɛ bɛi aa ce a ni aŋa a kù mà mà dulum nii. 23Inɛ iyi í cém í cé Baam mɔi. 24Inɛ kãma kù ce mii iyi ǹ ce si anini nŋa. Bii n kù ce mii ŋau bɛ wo, dulum du ŋa kaa wa si iri nŋa. Amma wee nsɛi à yɛ fei ndɛɛ nɔ do nŋu fei à cé amu do Baam. 25Iyi bɛ í cei ku ba ide iyi à kɔ si tiai wooda nŋa ŋa ku kɔ̃ iyi í ni, à cém nɔ a kù mà iriò isɛɛ.#15:25 Cɔ Iri ku kɔ̃ 69:5.

26Amma an bɛ nŋɛ Hundei Ilaaɔ̃ wa, nŋui á jɔ̀ inɛ ŋa a mà ntɔu. Nŋui í jɛ Woo mua gbugbãu, nɔ hai bi Ilaaɔ̃ Baabai á naa. Bii í to wa nŋui á jɛ nŋɛ sɛɛdam. 27Nɔ iŋɛ mɔ aa jɛa inɛ ŋa sɛɛdam ŋa, si na iyi í jɔ̀ awaɛ ŋai à wɛɛ hai waati iyi ǹ sinti icɛm.

Currently Selected:

Zãa 15: MKL

Highlight

Copy