Zãa 16

1Ide ŋau ihɛ̃ fei ǹ sɔ̃ ŋɛi ku ba i maà koosɛ ŋa si naanɛ ku dasi nŋɛ. 2Aa na a ganji ŋɛ ile bii à ya ce kutɔtɔɔ ŋa ku bɔ. Nɔ awaati wa naa iyi inɛ ŋa aa kpa inɛ gɔ nŋɛ ŋa, nɔ aa maa tamaa bɛi Ilaaɔ̃i aŋa à waa cea icɛ. 3Aa ya maa ce bɛɛbɛi si na iyi í jɔ̀ a kù màm hee má jɛ Baaba. 4Ǹ wa n sɔ̃ ŋɛ ide ŋau ihɛ̃i ku ba bii awaatiu í to wa i ye gigi ŋa iyi ǹ tako ǹ sɔ̃ ŋɛ tã.

Icɛi Hundei Ilaaɔ̃

Ŋɔi Jesu í sɔ̃ ŋa má í ni, n kù sɔ̃ ŋɛ ide ŋau ihɛ̃ hai sinte domi awaɛ ŋai à wɛɛ. 5Wee nsɛi ǹ wa n bɔ bi inɛ iyi í bɛm wa, nɔ baa inɛ akã nŋɛ kù beem iwoi ǹ wa n bɔ. 6Amma ideu ihɛ̃ iyi ǹ sɔ̃ ŋɛi í fɔ inɔ nŋɛ kaa kaa, mà irei. 7Do nŋu fei, ntɔi ǹ wa n sɔ̃ ŋɛ, bii ǹ koo aranfãani nŋɛi. Aranfãani nŋɛi, domi bii ǹ koo an bɛ nŋɛ Woo mua gbugbãu wa, amma bii n kù koo kaa naa bi tu ŋɛ. 8Waati iyi á to wa nŋui á nyisi inɛi andunya ŋa iyi à jɛ ilu dulum ŋa, nɔ ku jɔ̀ inɛ ŋa a mà mii iyi í jɛ dee dee, nɔ ku jɔ̀ a mà iyi Ilaaɔ̃ á kiiti inɛ ŋa. 9Á nyisi ŋa iyi à jɛ ilu dulum ŋa si na iyi í jɔ̀ a kù dasim naanɛ. 10Á jɔ̀ a mà mii iyi í jɛ dee dee si na iyi í jɔ̀ ǹ wa n bɔ bi Baaba nɔ i kaa yɛm má ŋa. 11Nɔ á jɔ̀ a mà iyi Ilaaɔ̃ á kiiti inɛ ŋa domi í kiiti Seetam amanlui andunya tã mɔm.

12Ǹ nɛ mii nkpɔ iyi an sɔ̃ ŋɛ má amma ideu í re ŋɛ titã. 13Waati iyi Hundei ntɔ á to wa, nŋui á jɔ̀ i mà ntɔu fei ŋa. Kaa fɔ ide do yiikoi nŋu takaɛ, ide ŋa iyi í gbɔ do iyi á na ku cei á sɔ̃ ŋɛ. 14Nŋui á jɔ̀ n nɛ amboe, domi idem nii á gbɔ ku sisi nŋɛ. 15Mii iyi Baaba í nɛ fei, tom nii. Ŋɔi í ce ǹ ni Hundei Ilaaɔ̃u á gbɔ idem ku sisi nŋɛ.

Inɔ kufɔ á na ku jɛ inɔ didɔ̃

16Jesu í sɔ̃ ŋa í ni, bii í kɔ̃ɔsi keeke i kaa yɛm má ŋa, nɔ bii í ce sãa má aa yɛm ŋa. 17Ŋɔi mɔcɔɛ gɔ ŋa à bee njɛ à waa ni, yoomai í jɛ yaasei ideu bɛ. Í ni bii í kɔ̃ɔsi keeke a kaa ka yɛ nŋu nɔ bii í ce sãa má aa ka yɛ nŋu. Yoomai í jɛ yaaseɛ. Í ni nŋu wa bɔ bi Baai nŋu. Yoomai í jɛ yaasei iyi bɛ mɔ má. 18To, yoomai í jɛ yaasei bii í kɔ̃ɔsi keeke. A kù mà ide mii wa fɔ.

19Wee Jesu í mà iyi à waa bi a bee nŋu ideu. Ŋɔi í ni, to, ǹ sɔ̃ ŋɛ ǹ ni bii í kɔ̃ɔsi keeke i kaa yɛm má ŋa, nɔ bii í ce sãa má aa yɛm ŋa, mà irei. Ideu bɛi ì waa bee ŋa? 20Ntɔ ntɔ ǹ wa n sɔ̃ ŋɛi, aa kpata i weewea ŋa, amma inɛi andunya ŋa aa nɛ inɔ didɔ̃i. Aa wɛɛ do inɔ kufɔ ŋa, amma inɔ kufɔ nŋɛ á na ku kpaasi inɔ didɔ̃. 21Bii inaabo wa bi ku bí, í ya nɛ inɔ kufɔ si na iyi í jɔ̀ waatii ara kuroɛi í to wa. Amma bii í bí amau í ya gbɛjɛ ara kuroui domi inɔ didɔ̃ɛ í ya la do iyi í bí ama. 22Bɛɛbɛi iŋɛ mɔ ì wɛɛò inɔ kufɔ si nsɛi ŋa. Amma an na n yɛ ŋɛ má, aa wɛɛò inɔ didɔ̃ ŋa, nɔ inɛ gɔ kaa yɔkɔ ku nya inɔ didɔ̃ nŋɛu.

23Bii awaatiu í to wa, i kaa beem nkãma ŋa. Ntɔ ntɔ ǹ wa n sɔ̃ ŋɛi, mii iyi aa tɔɔ Ilaaɔ̃ Baaba do irim ŋa fei á mu nŋɛ. 24Hee nsɛi i kù tɔɔ ngɔgɔ do irim ŋa. I tɔɔ, aa ba ŋa ku ba inɔ didɔ̃ nŋɛ ku kɔ̃.

Jesu í kãmia andunya

25Ŋɔi Jesu í sɔ̃ ŋa má í ni, ide ŋau ihɛ̃ fei nsɛi do mɔndai ǹ sɔ̃ ŋɛ. Amma awaati wa naa, iyi n kaa n sɔ̃ ŋɛ ide do mɔnda má. Ide iyi í jɛ idei Baaba an sɔ̃ ŋɛi sãa sãa do yaaseɛ. 26Bii waatiu í to wa, aa tɔɔ Baaba do irim ŋa. N kaa n sɔ̃ ŋɛ n ni an tɔɔɛ na iri nŋɛ má, 27domi Baaba takaɛ í bi ŋɛ. Í bi ŋɛ si na iyi í jɔ̀ iŋɛ mɔ ì bim, nɔ ì dasi naanɛ ŋa iyi hai bi tɛɛi ǹ naa. 28Ntɔi, hai bi Baabai ǹ fita wa ǹ naa andunya. Nsɛi ǹ wa n jɔ̀ andunya ǹ wa n bɔ bi Baam.

29Ŋɔi mɔcɔɛ ŋa à sɔ̃ɔ à ni, to, bɛbɛii ì waa fɔ ide sãa sãa do yaase si na iyi í jɔ̀ mɔnda kù wa si. 30Nsɛi à mà iyi ì mà fei ndɛɛ, nɔ ì mà lasabui idɔ nwa baa bii a kù beeɛ ide gɔ. Ŋɔi í jɔ̀ à dasi naanɛ iyi hai bi Ilaaɔ̃i ì naa.

31Ŋɔi Jesu í jɛ nŋa í ni, debɛi ì dasi naanɛ bɛbɛi ŋa? 32I ce laakai ŋa. Awaati wa naa nɔ í to wa tã mɔm de, iyi inɛ ŋa aa jɔ̀ iŋɛ fei i fangaa i jɔ̀ amu akã i bɔ kpasɛ̃ ŋa. Do nŋu fei n kù jɛ amu akã, domi Baaba í wɛɛ do amu. 33Ide ŋau ihɛ̃ ǹ wa n sɔ̃ ŋɛi ku ba i nɛ laakai ku sũ na anu akã iyi awaɛ ŋa à nɛ. Si andunyau ihɛ̃ aa yɛ ijuukpã ŋa, amma i maà mɔngɔ temua ŋa, domi ǹ kãmia andunya tã.

Currently Selected:

Zãa 16: MKL

Highlight

Copy