Zãa 17

Jesu í ce kutɔɔ na irii mɔcɔɛ ŋa

1Iyi Jesu í fɔ bɛɛbɛ í tã, ŋɔi í wu iju lele í ni, Baaba, awaati í to. Jɔ̀ amu Amaɛ n nɛ amboe ku ba amu mɔ n jɔ̀ i nɛ amboe, 2nɔ inɛ ŋa iyi ì nam fei n mu nŋa kuwɛɛ hai tã si bɛi ì muum yiiko si inɛ fei. 3Kuwɛɛ hai tãui í jɛ inɛ ŋa a màɛ, awɔ Ilaaɔ̃ akã ilu ntɔu, nɔ a màm, amu Jesu Kirisi iyi ì bɛ wau. 4Ǹ jɔ̀ ì nɛ amboe si ilɛu ihɛ̃, nɔ ǹ ce icɛ ŋa iyi í dasim ku ceu fei. 5Baaba, nsɛi ǹ wa n tɔɔɛi, jɔ̀ n nɛ amboe bi tɛɛ bɛi ǹ tako ǹ nɛ wo hee a maa taka andunya.

6Inɛ ŋa iyi ì cica hai si andunya ì nam, ǹ jɔ̀ à màɛ. Tɛɛi à jɛ wo, nɔ ì so ŋa ì nam. À nɔ à waa jirima ideɛ. 7Nsɛi à mà mii iyi ì nam fei, hai bi tɛɛi í naa, 8domi ide ŋa iyi ì sɔ̃m nŋui amu mɔ ǹ sɔ̃ ŋa, nɔ à gba ideu. À mà iyi ntɔ ntɔ hai bi tɛɛi ǹ naa nɔ à dasi naanɛ iyi awɔi ì bɛm wa.

9Ǹ wa n tɔɔɛ na iri nŋa. Kù jɛ na irii inɛi andunya ŋai ǹ wa n tɔɔɛ, amma na inɛ ŋa iyi ì nam ŋai, domi aŋai à jɛ tɛɛ. 10Mii iyi ǹ nɛ fei tɛɛi, nɔ mii iyi awɔ mɔ ì nɛ fei tom nii. Si kuce nŋa inɛ ŋa aa yɛ amboem. 11Nsɛi ǹ wa n nyi wa bi tɛɛ. Bii í kɔ̃ɔsi keeke n kaa n maa n wa si andunya má, aŋai aa maa wa si andunyau. Baaba kumá, degbe ŋa do gbugbãɛ iyi ì nam, ku ba a jɛ akã si bɛi awaɛ à jɛ akã. 12Waati iyi ǹ wɛɛ do aŋa ǹ degbe ŋa do gbugbãɛ iyi ì nam nɔu. Ǹ degbe ŋa nɔ si inɔ nŋa baa inɛ akã kù ce nfe, í gbe amai nfe ku ceu nŋu akã ku ba kukɔi ideɛ ku kɔ̃. 13Nsɛi ǹ wa n nyi wa bi tɛɛ. Ide ŋau ihɛ̃ si andunyau ihɛ̃i ǹ wa n fɔɔ, ku ba aŋa mɔ a kɔ̃ò inɔ didɔ̃ na irim. 14Ǹ na ŋa ideɛ, nɔ inɛi andunya ŋa à cé ŋa si na iyi í jɔ̀ a kù jɛ ti andunya, si bɛi amu mɔ n kù jɛ ti andunya. 15N kù wa n tɔɔɛ i nya ŋa hai si andunya, amma ǹ wa n tɔɔɛi i degbe ŋa ku ba Seetam inɛ laalɔu ku maà nɔ ŋa. 16A kù jɛ ti andunya si bɛi amu mɔ n kù jɛ ti andunya. 17Ideɛi í jɛ ntɔ. Jɔ̀ ideɛu ku nya ŋa ikã a jɛ titɛɛ. 18Ǹ bɛ ŋai si andunya si bɛi awɔ mɔ ì bɛm si andunyau. 19Na iri nŋai ǹ so aram ǹ naɛ ku ba aŋa mɔ a jɛ titɛɛ mam mam.

20Kù jɛ aŋa akãi ǹ wa n cea kutɔɔ, amma do inɛ ŋa mɔ iyi aa na a dasim naanɛ na saabui ide nŋa. 21Ǹ wa n tɔɔɛi aŋa fei a jɛ akã. Si bɛi awɔ Baaba ì wa sim, nɔ amu mɔ ǹ wa siɛ, jɔ̀ a jɛ akã si wa ku ba inɛi andunya ŋa a dasi naanɛ iyi awɔi ì bɛm wa. 22Amboeɛ iyi ì jɔ̀ inɛ ŋa à yɛ sim, nŋui ǹ jɔ̀ à waa yɛ si aŋa mɔ ku ba aŋa mɔ a jɛ akã bɛi awaɛ à jɛ akã. 23Jɔ̀ n wa si ŋa nɔ awɔ mɔ i wa sim ku ba a jɛ akã mam mam, nɔ inɛi andunya ŋa a mà iyi awɔi ì bɛm wa nɔ ì bi ŋai bɛi ì bim.

24Baaba, ǹ bi inɛ ŋa iyi ì nam a maa wa bi tom bii an wa, ku ba a yɛ amboem, amboe iyi ì muum. Ì muum amboeui si na iyi í jɔ̀ ì bim hai waati iyi a kù taka andunya. 25Baaba awɔ iyi ì jɛ dee dee, baa do iyi inɛi andunya ŋa a kù màɛ, amu ǹ màɛ, nɔ inɛ ihɛ̃ ŋa mɔ à mà iyi awɔi ì bɛm wa. 26Ǹ jɔ̀ à màɛ, nɔ an kɔ̃ɔ nŋa si kumàɛ má ku ba kubi iyi ì bim ku wa si ŋa, nɔ amu mɔ n wa si ŋa.

Currently Selected:

Zãa 17: MKL

Highlight

Copy