Zãa 18

À mu Jesu

(Cɔ Matie 26:47-56; Maaku 14:43-50; Luku 22:47-53)

1Iyi Jesu í ce kutɔɔɛ í tã, ŋɔi í fita, nŋu do mɔcɔɛ ŋa à bɔ lambo gɔ iyi í wa icei ido iyi à ya kpe Sedorɔ̃ɔ. Ŋɔi í lɔ bɛ nŋu do mɔcɔɛ ŋa. 2Wee Zudasi inɛ iyi á zambaɛu mɔ í mà inyau, domi aŋaò ŋa à ya koo bɛ isɛ fɛɛfɛlo. 3Ŋɔi í jɔ̀ Zudasi í bɔ bɛ do sooge ŋa do woo degbe kpasɛ̃i Ilaaɔ̃ ŋa iyi inɛ ngboi woo weei Ilaaɔ̃ ŋa do Farisi ŋau à bɛ wau. À waa mu jĩnɛi igũ nŋa do fitila ŋa do ina jugula ŋa. 4Jesu í bɛi wa mà mii ŋa iyi á ba nŋu fei. Iyi à to wa ŋɔi í sɛkɛɛ si ŋa í bee ŋa í ni, yooi ì waa dɛ ŋa. 5Ŋɔi à jɛaa à ni, Jesu inɛi Nazarɛtiui à waa dɛdɛ. Ŋɔi Jesu í ni, amui ihɛ̃ mɛɛ.

Wee Zudasi inɛ iyi á zambaɛu, wa leekĩ bɛ aŋaò ŋa ajɔ. 6Iyi Jesu í jɛ nŋa í ni, amui ihɛ̃, ŋɔi aŋa fei à sɛkɛɛ do anyi à koo à cuku ilɛ. 7Ŋɔi Jesu í bee ŋa má í ni, yooi ì waa dɛ ŋa. Ŋɔi à ni, Jesu inɛi Nazarɛtiui à waa dɛdɛ. 8Nɔ Jesu í ni, ǹ sɔ̃ ŋɛ tã ǹ ni amui ihɛ̃. To, bii amui ì waa dɛdɛ ŋa i jɔ̀ inɛ ŋa iyi à gbeu a nɛ.

9Bɛɛbɛi ide iyi í tako í fɔu í kɔ̃ iyi í ni, Baaba, inɛ ŋa iyi ì nam fei baa inɛ akã nŋa kù ce nfe. 10Wee Simɔɔ Piɛɛ í nɛ taakuba. Ŋɔi í yɔɔ í cafeò itĩ njɛi woo ce icɛi woo wee nlai Ilaaɔ̃u. Irii woo ce icɛui Malikusu. 11Amma Jesu í sɔ̃ Piɛɛ í ni, sindo taakubaɛ si ankɔ̃ɔɛ. Ì waa tamaa n kaa n temuaò ijuukpã iyi Baaba í jilɛɛm nii?

À bɔò Jesu si wajui Ani

12Ŋɔi sooge ŋau do inɛ ngbo nŋa do Zuifu woo degbe kpasɛ̃i Ilaaɔ̃ ŋau à mu Jesu à dũu. 13Nɔ à bɔòɛ bi Ani titã. Wee Aniu wa jɛ baai aboi Kaifu, iyi í jɛ woo wee nlai Ilaaɔ̃ si adɔ̃ nŋu. 14Nɔ Kaifu í sɔ̃ inɛ ngboi Zuifu ŋau ideu ihɛ̃ wo í ni, aranfãani nwai inɛ akã ku ku si agbɛi dimi nwa.

Piɛɛ í jã í ni nŋu kù jɛ mɔcɔi Jesu

(Cɔ Matie 26:69-70; Maaku 14:66-68; Luku 22:55-57)

15Waati iyi à mu Jesu à waa nɛɛ ŋɔi Simɔɔ Piɛɛ do mɔcɔ mmu gɔ à waa tooɛ. Wee woo wee nlai Ilaaɔ̃u í mà mɔcɔ inɛ nŋu, ŋɔi í jɔ̀ mɔcɔu í ba í too Jesu í lɔò bantumai kpasɛ̃i woo wee nlau. 16Amma Piɛɛ í gbe waduude andɛ koofa bɛ. Nɔ mɔcɔ iyi woo wee nlau í màu, í fita wa í naa í ba mudɛ̃ɛ iyi wa degbe koofau ide ku fɔ, nɔ í jɔ̀ Piɛɛ í lɔ. 17Nɔ mudɛ̃ɛu í bee Piɛɛ í ni, kù jɛ awɔ mɔ inɛ akãi mɔcɔi mɔkɔui ya. Ŋɔi Piɛɛ í ni, aawo, kù jɛ amu.

18Si bɛi tũtũ wa ceu, ŋɔi woo ce icɛ ŋa do woo degbe kpasɛ̃i Ilaaɔ̃ ŋau à leekĩ kɔkɔi ina nyɛnyɛ à waa nyia. Nɔ Piɛɛ mɔ í koo wa nyia bi tu ŋa bɛ ajɔ.

Woo wee nlau* í bee Jesu ide

(Cɔ Matie 26:59-66; Maaku 14:55-64; Luku 22:66-71)

19Ŋɔi woo wee nlai Ilaaɔ̃u í bee Jesu idei mɔcɔɛ ŋa do yaasei cio iyi wa kɔ si. 20Ŋɔi Jesu í jɛaa í ni, ideu si bantumai ǹ sɔ̃ inɛ fei. Ǹ ya n kɔ inɛ ŋa si ciom nii ile bii à ya ce kutɔtɔɔ ŋa do si kpasɛ̃i Ilaaɔ̃, bii Zuifu ŋa fei à ya tɔtɔɔ. N kù fɔ ide kãma si asii. 21Na mii í ce ì waa beem ide. Inɛ ŋa iyi à gbɔ idem, bee aŋa taka nŋa iyi ǹ sɔ̃ ŋa, aŋai aa mà mii iyi ǹ fɔ.

22Iyi Jesu í fɔ bɛɛbɛ, ŋɔi inɛ akãi woo degbe kpasɛ̃i Ilaaɔ̃ ŋau í sambalaɛ í ni, woo wee nlaui ì waa jɛaa ide nfe nfe bɛɛbɛ? 23Ŋɔi Jesu í jɛaa í ni, bii ide laalɔi ǹ fɔ, fɔɔ inɛ fei ku gbɔ. Amma bii í jɛ ide jiida mɔi ǹ fɔ, na mii í ce ì sambalam.

24Nɔ Ani í jɔ̀ à dũu à bɔòɛ bi Kaifu, woo wee nlau.

Piɛɛ í jã má í ni nŋu ku mà Jesu

(Cɔ Matie 26:71-75; Maaku 14:69-71; Luku 22:58-62)

25Waati iyi Simɔɔ Piɛɛ í wa bɛ wa nyia inau ŋɔi à beeɛ à ni, kù jɛ awɔ mɔ inɛ akãi mɔcɔi mɔkɔui ya. Ŋɔi Piɛɛ í jã í ni, aawo, kù jɛ amu. 26Wee woo ce icɛ akãi woo wee nlai Ilaaɔ̃u í wa bɛ. Wa jɛ nyaanzei inɛ iyi Piɛɛ í bu itĩɛu. Iyi í yɛ Piɛɛ ŋɔi í beeɛ í ni, n kù yɛɛ iŋɛò lambo bɛi? 27Amma Piɛɛ í jã má í ni, aawo. Gbakã ŋɔi ajɛɛ wa kɔ.

À bɔò Jesu si wajui Pilati

(Cɔ Matie 17:1-2, 11-14; Maaku 15:1-5; Luku 23:1-5)

28Hai bi Kaifu bɛ, inɛ ngboi Zuifu ŋau à bɔò Jesu bi ku kiitii ilu ilɛu. Wee daadaakɔi. Aŋa taka nŋa a kù lɔ ile bi ku ce kiitiu ku ba aŋa a maà na a jɛ ilu riisi ŋa. A kù bi a jɛ ilu riisi domi à waa bi a ba a jɛ ijɛi jingaui Iku ku kuau. 29Ŋɔi í jɔ̀ Pilati ilu ilɛu í fita wa í naa í ba ŋa í bee ŋa í ni, taale yoomai ì yɛ si mɔkɔu ŋa. 30Ŋɔi à ni, bii kù ce laalɔ, a kaa ka daɛ si awɔ. 31Ŋɔi Pilati í sɔ̃ ŋa í ni, iŋɛ taka nŋɛ i kooɛ nɔ i kiitiɛ do wooda nŋɛ. Amma à ni, iŋɛ inɛi Romu ŋa i kù na wa kpãa iyi aa ka kpaò amanɛ ŋa.

32Bɛɛbɛi idei Jesu í ce ku nyisiò dimii iku iyi á ku. 33Ŋɔi Pilati í lɔ ile bi ku ce kiitiu má í kpe Jesu í beeɛ í ni, awɔi ì jɛ ilaalui Zuifu ŋa? 34Ŋɔi Jesu í ni, inɛ gɔi í sɔ̃ɛ bɛɛbɛ de, mà ì nɔ ì waa beei. 35Amma Pilati í ni, amu Zuifui hee n mà? Dimiɛ ŋa do inɛ ngboi woo weei Ilaaɔ̃ ŋai à muɛ à daam si awɔ. Mii ì ce. 36Ŋɔi Jesu í jɛaa í ni, bommam kù jɛ ti andunya. Bii í jɛ ti andunyai, woo ce icɛm ŋa aa ja, a kaa jɛ a mum a na inɛ ngboi Zuifu ŋau. Amma bommam kù jɛ ti andunya ihɛ̃. 37Ŋɔi Pilati í beeɛ í ni, debɛi, awɔ ilaalui? Ŋɔi Jesu í jɛaa í ni, awɔi ì fɔ bɛɛbɛ. Ǹ naai si andunya, à bím nii n jɛ sɛɛdai ntɔ. Inɛ iyi í jɛ ti ntɔ fei á gbɔ idem. 38Nɔ Pilati í beeɛ í ni, dimii mii mɔm nii à ya kpe ntɔ.

À yɛ taalei Jesu a ba a kpaa

(Cɔ Matie 27:15-31; Maaku 15:6-20; Luku 23:13-25)

Si anyii ide ŋau ŋɔi Pilati í fita má í bɔ bi Zuifu ŋau. Í sɔ̃ ŋa í ni, amu n kù yɛ taale kãma si mɔkɔu. 39Amma si bɛi à nɛ dɔ̃ɔnɛɛ, an jɔ̀ nŋɛ inɛi piisɔ̃ɔ akã si jingaui Iku ku kua. Ì bi n jɔ̀ nŋɛ ilaalui Zuifu ŋau? 40Ŋɔi aŋa fei à wasi ku dɔ̃ anu do gbugbã à waa ni aŋa a kù bi mɔkɔu bɛ. À waa ni Barabasii aŋa à bi. Wee Barabasiu í ya ce ilei.

Currently Selected:

Zãa 18: MKL

Highlight

Copy