Zãa 19

1Ŋɔi Pilati í jɔ̀ à cã Jesu do kpɔtɔɔ. 2Ŋɔi sooge ŋa à ba fulai agũ à daa Jesu si iriɛ, nɔ à daa si kumboo nkpa gɔ má à waa yaakoɛò. 3Ŋɔi à ya sɛkɛɛ siɛ wa à naa a maa coo fɔɔ a maa ni, fɔɔ ilaalui Zuifu ŋa. Nɔ a maa sambalaɛ.

4Ŋɔi Pilati í fita wa má í sɔ̃ zamaau í ni, wee an fitaò nŋɛ mɔkɔu wa ku ba i mà ŋa iyi n kù yɛ siɛ kurara gɔ. 5Ŋɔi í fitaò Jesu wa do fulai agũu do kumboo nkpaɛ. Ŋɔi Pilati í sɔ̃ ŋa í ni, mɔkɔu wee. 6Iyi inɛ ngboi woo weei Ilaaɔ̃ ŋau do woo degbe kpasɛ̃i Ilaaɔ̃ ŋau à yɔɔ ŋɔi à wasi ku la à waa ni, kpakpaɛ si jĩi. Ŋɔi Pilati í sɔ̃ ŋa í ni, iŋɛ taka nŋɛ, i gba i kpakpaɛ si jĩi ku gaau. Amma amu n kù yɛ siɛ taale gɔ. 7Ŋɔi Zuifu ŋau à sɔ̃ɔ à ni aŋa à nɛ wooda, nɔ si woodai aŋau í gbe de a kpaai domi wa ni nŋuu amai Ilaaɔ̃i.

8Iyi Pilati í gbɔ ideu, ŋɔi njo í muu má hee í caa. 9Ŋɔi í bɔò Jesu bi ku ce kiitiu má í koo í beeɛ í ni, hai iwoi ì waa naa ntɔ ntɔ. Amma Jesu kù jɛaa mɔm. 10Ŋɔi Pilati í beeɛ í ni, baa amu takam i kaa bam ide ku fɔ? I kù mà iyi ǹ nɛ kpãa n jɔ̀ɛ, nɔ ǹ nɛ kpãa má n kpakpaɛ si jĩi ku gaaui? 11Ŋɔi Jesu í jɛaa í ni, i kaa nɛ gbugbã kãma sim, bii kù jɛ Ilaaɔ̃i í naɛ wa. Nŋui í jɔ̀ inɛ iyi í dasim si awɔɛ, dulum dɛɛ í re baa tɛɛ. 12Iyi Pilati í gbɔ bɛɛbɛ, ŋɔi wa ce kookaai ku ba ku jɔ̀ɔ. Amma Zuifu ŋau à dɔ̃ anu à waa ni, bii ì jɔ̀ mɔkɔu bɛ, i kù jɛ kpaasii ilaalu nlai Romu má. Inɛ iyi í ce araɛ ilaalu fei mbɛɛi ilaalu nlai Romuui í baa í jɛ.

13Iyi Pilati í gbɔ ideu, ŋɔi í jɔ̀ à fitaò Jesu nɔ í buba si kitãi woo kiitiu iyi í wa inya bii à ya kpe inya iyi à tɛsi kuta. Amma do feei Ebɛɛ, Gabatai à ya kpe inyau. 14Wee à wa si ajɔ iyi bii iju í má á jɛ ajɔi kusĩmi. Ajɔi kusĩmiu alɛi á sinti, nɔ inɛ ŋa à wasi ku ce sɔɔlui jingaui Iku ku kuau. Nɔ waati bɛɛbɛ zakai dasãi. Ŋɔi Pilati í sɔ̃ Zuifu ŋau í ni, ilaalu nŋɛ wee. 15Amma à wasi ku dɔ̃ anu à waa ni, kpaa. Kpakpaɛ si jĩi ku gaau. Ŋɔi Pilati í bee ŋa í ni, bɛirei í ce ì bi n kpakpa ilaalu nŋɛ si jĩi ku gaau. Ŋɔi inɛ ngboi woo weei Ilaaɔ̃ ŋau à jɛaa à ni, a kù nɛ ilaalu mmu gɔ bii kù jɛ ilaalu nlai Romu. 16Ŋɔi Pilati í da nŋa Jesu si awɔ ku ba a kpakpaɛ si jĩi ku gaau.

À kpakpa Jesu si jĩi ku gaau

(Cɔ Matie 27:32-44; Maaku 15:21-32; Luku 23:26-43)

Nɔ à mu Jesu à nɛò. 17Nɔ à kãa Jesu jĩi ku gaauu í so í fitaò hai inɔ ilu í bɔò hee inya iyi à ya kpe inyai kokoi iri. Do feei Ebɛɛ, Gɔɔgɔtai à ya kpe inyau. 18Bɛi à kpakpaɛ si jĩi ku gaauu. Nɔ à kpakpa inɛmɔkɔ minji gɔ ŋa bɛ má, inɛ akã do awɔ cangaɛ, inɛ akã mɔ do awɔ njɛɛ nɔ Jesu í wa anini nŋa.

19Ŋɔi Pilati í jɔ̀ à kɔ ide gɔ si jĩi gɔ à masi antaii jĩi ku gaauu. Kukɔu í ni, Jesu inɛi Nazarɛti, ilaalui Zuifu ŋa. 20Zuifu nkpɔ í ka kukɔu domi inyau kù jĩò inɔ ilu. Nɔ à kɔɔ do feei Ebɛɛ do Latɛ̃ɛ do Gɛrɛki. 21Ŋɔi inɛ ngboi woo weei Ilaaɔ̃ ŋau à sɔ̃ Pilati à ni, maà ti i kɔ i ni, ilaalui Zuifu ŋa, amma kɔ i ni, í ni nŋu í jɛ ilaalui Zuifu ŋa. 22Ŋɔi Pilati í ni, iyi ǹ kɔ tã ǹ kɔɔi.

23Iyi sooge ŋau à kpakpa Jesu à tã ŋɔi à so jaaɛɛ ŋa à kpɔ̃ɔ ikɔ mɛɛ, sooge fei í so ikɔ akã akã. Nɔ à so ibɔ sisɔɛu má. Ibɔu kù nɛ agbɛi ku sɔ domi à wɔ̃ɔi hai lele hee ku bɔ ilɛ. 24Iyi à so ibɔu ŋɔi à ni, ka maà gaa, amma ka ta si kpasa ka cɔ ti inɛ iyi á jɛ. Nɔ bɛɛbɛi à ce. Bɛɛbɛi kukɔi idei Ilaaɔ̃ í kɔ̃ tengi bii í ni,

à kpɛ̃ jĩnɛm ŋa aŋa duusɔ̃ɔ,

nɔ à ta si ibɔ nlam kpasa.#19:24 Cɔ Iri ku kɔ̃ 22:19.

25Wee iyei Jesu do ifɔi iyeɛ, do Maari aboi Kopa, do Maari inɛi Madalau, à waa leekĩ bi jĩi ku gaaui Jesu. 26Ŋɔi Jesu í yɛ iyeɛ bɛ, do mɔcɔ iyi í biu à waa leekĩ kɔkɔi njɛ, nɔ í sɔ̃ iyeɛ í ni, abooyi, inɛ ihɛ̃i í baa í jɛ amaɛ. 27Ŋɔi í sɔ̃ mɔcɔu í ni, abou ihɛ̃ bɛi iyeɛi í baa í jɛ. Hai ajɔ nŋui mɔcɔu í gbãa í bɔòɛ kpasɛ̃ɛ wa woo.

Waati iyi Jesu í ku

(Cɔ Matie 27:45-56; Maaku 15:33-41; Luku 23:44-49)

28Si anyii nŋu, si bɛi Jesu í mà iyi bɛbɛi fei ndɛɛ í kpa iri mbɛ, ŋɔi í ni, agbɛ wa kpam. Í fɔ bɛɛbɛi ku ba kukɔi idei Ilaaɔ̃ ku kɔ̃. 29Wee caka gɔ í wa bɛ í nɛ atɛ̃ kukã bãm bãm. Ŋɔi à dĩ kanya si amaawɔi jĩi ndii izɔpu à sɔsi atɛ̃ kukãu à waa too si gɛlɛi Jesu. 30Iyi Jesu í tiɛ atɛ̃ kukãu ŋɔi í ni, ǹ kpa irii icɛm nii mbɛ. Nɔ í kɔmba iriɛ í ku.

À gũ Jesu kaka si kpakpaa cingaaɛ

31Si bɛi à wa si sɔɔlui ajɔi kusĩmiu, Zuifu ŋau a kù waa bi ajɔu ku to wa ku ba iku ŋau si jĩi ŋau bɛ, domi ajɔu ajɔ nla gɔi. Nŋui í jɔ̀ à koo à tɔɔ Pilati ku jɔ̀ a cɛ kutɛi inɛ ŋa iyi à kpakpa ŋau, nɔ a nya ŋa hai bɛ. 32Na ŋɔi í ce sooge ŋau à cɛ kutɛi inɛ sinteu do inɛ minjisiau, aŋa iyi à kpakpa do Jesu ajɔu. 33Amma waati iyi à to bi Jesu, à ba í ku tã, nɔ a kù cɛ kutɛɛ má. 34Amma inɛ akãi sooge ŋau í gũ kpakpaa cingaaɛ do kaka, ŋɔi gbakã njɛ do inyi wa jo wa. 35Amu Zãa ǹ yɛ iyi bɛ fei, nɔ ǹ wa n jɛa inɛ ŋa sɛɛdaɛ, sɛɛdam nɔu ntɔi. Ǹ mà kãm kãm iyi ntɔi ǹ wa n fɔ, nɔ ǹ wa n fɔi ku ba iŋɛ mɔ i dasi naanɛ ŋa. 36A kù cɛ kutɛɛ ŋa nɔ iyi bɛ í cei ku ba kukɔi idei Ilaaɔ̃ ku kɔ̃ iyi í ni, kũkũi araɛ baa akã kaa lɛgɛ.#19:36 Cɔ Kufita 12:46; Iri ku kɔ̃ 34:21. 37Nɔ kukɔi idei Ilaaɔ̃ í ni má, aa cɔ inɛ iyi aŋa taka nŋa à gũu.#19:37 Cɔ Zakari 12:10.

À dasi ikui Jesu balɛ

(Cɔ Matie 27:57-61; Maaku 15:42-47; Luku 23:50-56)

38Si anyii nŋu, Zozɛfu inɛi Arimateeu í koo í tɔɔ Pilati ku jɔ̀ nŋu ku nya ikui Jesu. Nɔ Pilati í jɛaa si. Na ŋɔi í jɔ̀ í koo í nya ikui Jesuu. Zozɛfuu mɔcɔi Jesui, amma si asiii, domi wa ce njoi inɛ ngboi Zuifu ŋa. 39Nikodɛmu iyi í bɔ bi Jesu idũ gɔ wo, í si Zozɛfu. Nɔ wa mu tuae dimi ikã ikã minji, akã mirui à ya kpoo, akã mɔ aloɛsi. Kuwo nŋa í to zakai kiloo kuntaa. 40Inɛ minji ŋau à so ikui Jesu à woo do acɔ fũfũ gɔ ŋa nɔ à fãsi tuaeu. Si dɔ̃ɔnɛi Zuifu ŋa bɛɛbɛi à ya ce bii à waa si iku. 41Lambo gɔ í wa tengi bii à kpakpa Jesu si jĩi nɔu. Si inɔ lambou à gbe isai kuta gɔ bɛ kù kpɛ titã, nɔ a kù si inɛ gɔ si bɛ. 42Bɛi à koo à si Jesu si na iyi í jɔ̀ tengi bɛ kù jĩ, nɔ à bi a suu gbãa gbãa hee ajɔi kusĩmiu ku maa to wa.

Currently Selected:

Zãa 19: MKL

Highlight

Copy