Zãa 20

Balɛ ngbɛ

(Cɔ Matie 28:1-8; Maaku 16:1-8; Luku 24:1-12)

1Ajɔ amaazuma daadaakɔ waati iyi iju kù má sãa sãa, ŋɔi Maari inɛi Madalau í bɔ bi balɛu. Nɔ í ba wee à tale kutau hai andɛ balɛu. 2Ŋɔi í sɛi í bɔ bi Simɔɔ Piɛɛ do bi mɔcɔ iyi Jesu í bi jiidau, í sɔ̃ ŋa í ni, à nya ikui Lafɛ̃ɛ hai inɔ balɛ nɔ a kù mà bii à dasi.

3Ŋɔi Piɛɛ do mɔcɔu à fita à bɔ bi balɛu. 4Aŋa minji fei à sɛi ajɔ, amma mɔcɔu í sɛi í cua Piɛɛ, nŋui í tako í to bi balɛu. 5Nɔ í bate í nante si balɛu, nɔ í yɛ acɔ ŋau wa jilɛ, amma kù lɔ. 6Ŋɔi Simɔɔ Piɛɛ wa baa do anyi. Iyi í to wa nɔ í lɔ inɔ balɛu. Nɔ í yɛ acɔ ŋau wa jilɛ, 7do mango iyi à tako à dĩò iriɛu. Amma mangou kù waa jilɛ inya akã do acɔ ŋau, wa woi ikpa akã. 8Ŋɔi mɔcɔ iyi í tako í to bi balɛu, nŋu mɔ í lɔ. Iyi í yɛ mii ŋau nɔ í dasi naanɛ. 9Mɔcɔ ŋau a kù tako a kù gbɔ yaasei kukɔi idei Ilaaɔ̃ wo iyi í ni kù nɛ bɛi á ce iyi Jesu kù jĩ hai si balɛ. 10Ŋɔi mɔcɔ ŋau à sinda à bɔ kpasɛ̃.

Jesu í tusɛa Maari inɛi Madalau araɛ

(Cɔ Matie 28:9-10; Maaku 16:9-11)

11Amma Maari wa leekĩ waduude kɔkɔi balɛu wa kpata. Si bɛi wa kpatau ŋɔi í bate í nante inɔ balɛu. 12Nɔ í yɛ amaleka minji gɔ ŋa à waa dasi nyau fũfũ à waa buba tengi bii ikui Jesu wa sũ wo, inɛ akã ikpa iri, inɛ akã mɔ ikpa kutɛ. 13Nɔ à beeɛ à ni, abooyi, na mii í ce ì waa kpata. Ŋɔi í jɛ nŋa í ni, à so ikui Lafɛ̃ɛm hai ihɛ̃i nɔ n kù mà bii à dasiɛ.

14Iyi í fɔ bɛɛbɛ í tã, ŋɔi í sinda nɔ í yɛ Jesu wa leekĩ bɛ. Amma kù mà mà Jesui. 15Ŋɔi Jesu í beeɛ í ni, abooyi, na mii í ce ì waa kpata. Yooi ì waa dɛ. Ŋɔi Maari í tamaa bɛi woo degbe lamboui. Ŋɔi í sɔ̃ɔ í ni, mɔkɔɔyi, bii awɔi ì soo, sɔ̃m bii ì jilɔɔ n koo n soo. 16Ŋɔi Jesu í ni, Maari. Ŋɔi Maari í sinda siɛ í sɔ̃ɔ do feei Ebɛɛ í ni, Rabuni, waatɔ Mɛɛtu.

17Ŋɔi Jesu í sɔ̃ɔ í ni, jɔ̀m, maà lum, domi n kù bɔ lele bi Baam titã. Amma bɔ bi mɔcɔm ŋa, sɔ̃ ŋa i ni ǹ wa n bɔ bi Ilaaɔ̃. Nŋui í jɛ baam, nɔ í jɛ baai iŋɛ mɔ.

18Ŋɔi Maari inɛi Madalau í koo í sɔ̃ mɔcɔ ŋau í ni nŋu í yɛ Lafɛ̃ɛ. Nɔ wa sisi nŋa ide iyi Jesu í sɔ̃ɔ.

Jesu í tusɛa mɔcɔɛ ŋa araɛ

(Cɔ Matie 28:16-20; Maaku 16:14-18; Luku 24:36-49)

19Ajɔ amaazumau iyi alɛ í lɛ ŋɔi mɔcɔ ŋau à tɔtɔɔ si ile gɔ nɔ à sɔkɔ gambou domi à waa ce njoi inɛ ngboi Zuifu ŋau. Ŋɔi Jesu í faata wa í leekĩ si anini nŋa. Nɔ í sɔ̃ ŋa í ni, laakai ku sũ ku wɛɛ nŋɛ.

20Iyi í sɔ̃ ŋa bɛɛbɛ í tã ŋɔi í nyisi ŋa awɔɛ ŋa do kpakpaa cingaaɛu. Nɔ inɔi mɔcɔ ŋau í dɔ̃ iyi à yɛ Lafɛ̃ɛ. 21Ŋɔi Jesu í sɔ̃ ŋa má í ni, laakai ku sũ ku wɛɛ nŋɛ. Si bɛi Baaba í bɛm wa, bɛɛbɛ mɔi amu mɔ ǹ bɛ ŋɛ.

22Iyi í fɔ bɛɛbɛ í tã ŋɔi í fufu ŋa í ni, i gba Hundei Ilaaɔ̃ ŋa. 23Inɛ iyi ì kpa idei dulum dɛɛ ŋa, Ilaaɔ̃ mɔ á kpaai. Inɛ mɔ iyi ì ni dulum dɛɛ í jɛ idei iriɛ ŋa, lafɛ̃ɛ á maa wɛɛò ndɛɛi.

Jesu do Tomaa

24Wee Tomaa inɛ akãi mɔcɔ maateeji ŋa iyi à ya kpe Sìkàu kù wa inɔ nŋa si waati iyi Jesu í naa si ŋau. 25Ŋɔi mɔcɔ ŋa iyi à gbeu à sɔ̃ɔ à ni, à yɛ Lafɛ̃ɛ. Amma Tomaa í sɔ̃ ŋa í ni, nɔ n kù yɛ agbɛi pɔ̃ɔti ŋau si awɔɛ ŋa nɔ n kù dasi amaawɔm si agbɛi pɔ̃ɔtiu nɔ n kù dasi awɔm si dalai jujui kpakpaa cingaaɛu n kaa n dasi naanɛ pai.

26Zakai azuma akã à tɔtɔɔ má si inɔ ile. Tomaa í wa inɔ nŋa. Nɔ à cĩmbo gambo ŋa. Amma Jesu í faata si anini nŋa wa má nɔ í ni, laakai ku sũ ku wɛɛ nŋɛ. 27Nɔ í sɔ̃ Tomaa í ni, cɔ awɔm ŋa nɔ i dasi amaawɔɛ si bɛ. Naaò awɔɛ wa má i luò cingaam. Jɔ̀ sika sikau bɛ, dasi naanɛ. 28Ŋɔi Tomaa í jɛaa í ni, awɔi ì jɛ Aɔ̃ Lafɛ̃ɛm. 29Ŋɔi Jesu í sɔ̃ɔ í ni, debɛi ì dasi naanɛ si na iyi í jɔ̀ ì yɛm, mà irei. Ilu inɔ didɔ̃ ŋai inɛ ŋa iyi a kù yɛm nɔ do nŋu fei à dasi naanɛ.

Mii iyi í jɔ̀ à kɔ tiau ihɛ̃

30Maamaake nkpɔi Jesu í ce má si wajui mɔcɔɛ ŋa iyi a kù kɔ si tiau ihɛ̃. 31Amma ide iyi ihɛ̃ ŋai à kɔ ku ba i dasi naanɛ ŋa iyi Jesui í jɛ Kirisi Amai Ilaaɔ̃ ku ba naanɛ iyi ì dasiɛ ŋau ku jɔ̀ i ba kuwɛɛ hai tã ŋa.

Currently Selected:

Zãa 20: MKL

Highlight

Copy