LUK 21

Muwkhuwnuw ing Atha Seer

(Mk 12.41-44)

1Jesu ing rumniieen nache kikthuur enthachu a-entah nache savang aeng enthachu amupa; 2amanche sarapak muwkhuwnuw ing pesa ynniimeh atha chukho ama ing amupa. 3Amana Jesu ing ariir, “Atatak ing kariirva, havana muwkhuwnuw inge enuw vakhae chungna inemseh athasa; 4Reentaang vakhae aeng endeenpoh ing enthasa, changvakonchu hava muwkhuwnuw sarapak inge adeensah aringnii topohtichu athadehpa.”

Jesu ing Rumniieen Maangvachii Ajeer

(Met 24.1-2; Mk 13.1-2)

5Mee topoh aenche isapak rung vokhehkho Thangnang ting kikthuur empeeh havi yngentahna aajaehmeh isava ta aeka rumniieen khaena enchong tahnache, Jesu ing eningna ariir, 6“Nenuw ing nemu vakhae havi maangchir vachii apha inii nikhehna thengvaata; changlaenche rung yngkheh taklina yngkheh ing deengru ing kiimah vachii yntanga omahnii.”

Ijachaam Suwhvachii

(Met 24.3-14; Mk 13.3-13)

7Enuw ing Jesu ningna ensii, “Oja, ama changchiichu utaraenkhe suwhva chiiva? Vokhehkho ama vakhaechu ahungsuwh phanache ynchii buwtinnii ombaate?”

8Jesu ing ariir, “Nenuw aasiirting mee aeng ynruwniimah ing ynriimruw; akhaechuve ki Khrista ping, aphachu ynneengsa ta ae naka mee aajaeh ing karumingna hungsuwh vaatae. Nenuw ing enganuwchu jiimahdeh aeruw. 9Nenuw ing laar yntuk vokhehkho laarsa isuwh nensii tahna ynchik-mah dehruw; hava vakhae chaap i amaensana suwhvaata, changvakonchu achiniirem chuve ama apha sungnache suwhmahnii.”

10Changlaenche Jesu ing eningna ariir, “Paam yngkheh re paam yngkheh ynna vaatae, iruwng lipah yngkheh re yngkheh ynrumahnii ae. 11Ipirpak linglaang vokhehkho reentaang apham aajaehna venchaam chiilaar, reentaang laena aajaeh suwhvaata; vokhehkho ichiisuwh amanche minvaen tanii iruungpak ruwriimnii aajaeh yndang vaata. 12Changvakonchu hava vakhae i asuwhmahri raenche enuw ing nengkikna ibachuw aenaka imanang vaatae; enuw ing nenuwchu meekongnii eenting vokhehkho kaeshum sungting ithin ae naka kakhaena iruwng ae, vokhehkho lipah aapuh ae maana nenuwchu ihenruw vaatae. 13Havi ki kasaarkhii ipeehnii khaena nentaklina suwhvaata. 14#Luk 12.11,12Chukhaenache nenuw ing ynchii basangva kente tanuwna amaensana nenbarungriir sungna kharmanung tanuwna mangiirruw, 15nenuw nentaklina eejeehnii aeng ichong chehmahva enchii nenerna iveernii ki ing jepiva kachuw. 16Nenpa nenuw aeng amanche nenguw nenae vokhehkho nensungkhur amanche nengarang ae rap ingkho irensa vaatae; havipang mahka achuw yngkheh chuve ithii imanpha vaatae. 17Mee vakhae ing nenuwchu ki karuming khaenache ibatir vaatae. 18Changvakonchu nenuw nenrusae sam asae yngkheh pangkho maangmahnii. 19Nenuw ing ikhaang nencheh ingkhe nentaksah iring phava nenta.”

Jesu ing Jerusalem Maangvahii Ajeer

(Met 24.15-21; Mk 13.14-19)

20“Nenuw ing Jerusalem chu laarchang aeng enruwkuwr nemu-raenche hungmaang vachiichu hunganeengsa ichii manghuwruw. 21Changlaenche Judia sungna ong vakhae aeng bung ting taen ae rasiing, amanche khuwruung sungna ong mee aenche hungsuwh ae rasiing, vokhehkho khuw sungna ongchaap aenche khuwruung tingche hungruwhmah ae rasiing; 22akhae-chuve ynziih chaapchu asuwhchirnii khaena huwrinii iniichu vaata. 23Changlaenche miknii ae, naereen ae, naeri atua chuve apha ichiinache aajaehmeh ijaniivate! Laaruw paam nache ijaniipak vokhehkho mee ae taklinache barungsii thengvaata. 24Mee topoh chuve laarchem yngeepak taklina bukvaatae, amanche areh chuve suwr ae naka paam vakhaechaap nache ruwvaatae; amanche reentaang mee aenche enganiichu achimahri raentaangche Jerusalem chu engkhi chuwngnii ing tuvaatae.”

Mee Sapa ing Juwngvachii

(Met 24.29-31; Mk 13.24-27)

25 # Aman 6.12,13 “Inii, tha, aesii nache buwtinnii yngkheh suwhvaata; amanche laaruw paamne chifhuw rusa inche ichiisuwh vaang tanaka ipen laarsa omnaka apaam lijana ijachaamchu suwhvaata; 26Suwhvachii amachu laaruw paam mee ing ahahtahna ynchik ae naka murvaatae; akhaechuve minvaen ruwreng chaapchu manuh vaata. 27#Aman 1.7Aphanache Mee Sapa inche aruwreng vokhehkho alaar isa thohche ruwrduhna ijuwngchu enuw inche muvaatae. 28Hava vakhae i isuwh ahenbasen raenche nenrusae mangen nuwna hengenruw, nenuw ijungruw vachiichu junganeengsa.”

Thachang Burna Ynghuwnii

(Met 24.32-35; Mk 13.28-31)

29Changlaenche Jesu ing havana ynghuwnii thamin i ariir: “Thachang bur re thingbur chaap ae i enjaehtahruw. 30Enuw inge ana iduung hangsuwm basen ae nave, atii saartha hungvisa ichii nentaksah ing nemanghuwsa. 31Amavaange nenuw ing hava vakhae i nemuraenche, Thangnang iruwngpaam junganeengsa ichii manghuwruw. 32Atatak ing kariirnah, hava vakhae i ahungandang mahri raentaang havana suwnthar i maangmah dehnii. 33Thangbaen vokhehkho laaruw paam ichuve maangvaata, changvakonchu ki kachongsae chuve utaraenkho maangmahnii.”

34“Nenuw isahnii innii ing, juw ynruw ing vokhehkho hava suwnthar ringkum inge nenbarungriir amanja-niimah ing changmahka ama inii inche chaangna uvaang, nentaklina manghuw mangharu ing abukniimah ing nenuw nentaksah ynriimsaruw; 35Ama inii nache laaruw paamna ong mee vakhae taklina thengvaata. 36Chukhaenache suwhvachii vakhae tanii nensuwhchehnii ing, amanche Mee Sapa maanache ingiir nenchehnii khaena apha vakhaena hahjaehruw vokhehkho thamsaruw.”

37 # Luk 19.47 Jesu ing siimna rumniieen nache manchuwchak aeka, khuri ajungvi-raenche Oleep Bung ting sichakka riihchaksa. 38Jesu achongchu mee ae inche rungae nungka enchii khaena imaen ing aziing siir aningting ithengchak ae.

Currently Selected:

LUK 21: MOYO

Highlight

Copy