METHIU 21

Aacheh ing Jerusalem Ivaruwh

(Mk 11.1-11; Luk 19.28-38; Jhn 12.12-19)

1Enuw ing Jerusalem enveneeng phana, Oleep Bungna Betphage ichii paamchu tungsae. Amanache Jesu ing asebok ynniimeh vechiir-ka 2eningna jinge ichii ing ariir, “Nemaana om khuwtingse vakruw, nenvatheng thoh lola afhuw ati yng-khiih yngkheh heom vaata, amachu bajoh nuwna kaningting henruw aeruw. 3Achuw yngkheh ing neningna yngkhaenava ta ae naka isiiae nave, ‘Aafhuw ing aadiknah taruw;’ amanache ama ing ipivaata.” 4Jaephar chongchu asuwhnii khaena havi ariir vasahva amachuve:

5“Zaion sanuw ningnache riirruw,

Enla, nang naaruwng naningna vathengna!

Amave abarungriir duwrna, vokhehkho lola aveongniisa;

amanche lola chuve ativa.”

6Chutahnache sebok aeng vak aeka Jesu ing ariir inuwzii ing envatuwhpa; 7amana enuw ing lola afhuw atichu henruw aeka ataklina peen tha aeka Jesu ing aongniipa. 8Mee inempak aeng Jesu vasinii vachii lam nache empeen enthapae, amana areh aenche unubur ana saeh aeka atha-pae. 9Changlaenche Jesu aanuw ama ajii mee aenche uung aeka enriir, “Devit sapa ningna Hosana! Aafhuw rumingna itheng atak i bor aphava! Aangkaangsehna hosana!”

10Jesu ing Jerusalem chu avaruwh tahnache khuwruungchu phusii phuraang suwhka enriir, “Havi achuwva?”

11Amana meenem aeng enriir, “Havi Galili paam Nazaret tanii jaephar Jesu chuva.”

Jesu ing Jerusalem Rumniieen Amanthiing

(Mk 11.15-19; Luk 19.45-48; Jhn 2.13-22)

12Jesu ing Thangnang rumniieen nache varuwhka peehchae aajuwr vokhehkho aanrii aechu taangting athur chirpae. Amanche seersaam repnii vokhehkho khunu ijuwr ae ongnii chukho barup bareh chirka 13eningna ariir, “Havi ynziih vasahva, ki ka eenchu ithamsahnii een vachiiva, changvakonchu nenuw ing lamruw ae kuw nemanguurpa!”

14Changlaenche rumniieen nache mikchu aere khibong ae inche aningna theng aeka amana amandampae. 15Changvakonchu aanchung jaethiim aere thiimthang aenche Jesu ing laetho nong atuchu emure vokheh naepang aeng rumniieenna uung aeka, “Devit sapa ningna Hosana!” enchiichu ensiitahna embarung siksa. 16Chutahnache enuw ing Jesu ningna ensii, “Naepang aeng enriir chong i ynchiiva nasiise?” Jesu ing abasang ae, kasiisa.

“Naepang aere naeduung then ajeen ae ner tanii Aafhuw nang ing ympahsahnii mapung namamphapa taka ynziihchu nenuw nenpamahva?”

17Amana Jesu ing enuwchu bathen-ka khuwruung na ing Bethani ting sika amanache riihsa.

Jesu ing Thachang bur Siraap Apeeh

(Mk 11.12-14,20-24)

18Jesu ing ziingna khuwruung tingche ahunganrirae aven chaamsa. 19Changlaenche ama ing lam kuurna imuwng thachang burchu amupa amana vakka ava entah nache ana mahnaka yntanga tuwhmahsa. Chutahnache Jesu ing thachang burchu enka ariir, “Thachang bur nang athar vokheh ynlamah tanii.” Changche ichii ing ariirtah nache anikungna thachang burchu vachongsa. 20Amachu sebok aeng emutah nache ngik aeka enriir, Ynsaangkhe thachang bur i ataraenrap ivachongva?

21 # Met 17.20; 1 Kor 13.2 Jesu ing eningna abasang, “Ki ing neningna atatak ing kariirnah, nenuw ing chingnii rudeh ing thacha tanuwve, thachang bur taklina isuwh havipang mahka bung havi nenkho ympeenrasii nenchiitahna ataksah ing chifhuw ting bukvaata. 22Amanche nenuw ing thacha tanuwka thamsa tanuwve aangkhenglaang neniihchu phava nenta.”

Jesu Aatuaricheh khaena chong Ensii

(Mk 11.27-33; Luk 20.1-8)

23Jesu ing rumniieen nache varuwh-ka mee aechu amanchuw raenche, aanchung jaethiim aere lipah aapuh upa aenche varuwh aeka aningna asii ae, “Nang ing ynchii aatuaricheh deenchiika jinge ichii ing nong natuva? Achuw ing naningna aatuaricheh havi ympeehva?” 24“Ki ingkho neningna yngkhehpang siikachuw, amachu ibasangcheh tanuwve, ki ing hangchii nong itu kachehnii aatuarichehchu neningna riirva kata achii. 25Baptis Johon aatuaricheh icha utanii ithengva?” Enuw ing enareersahna manseer aeka enriir, “Inuw ing ynchii riirtaruw? Inuw ing thangbaen taniiva tamanuwve, ama ing tavaata, amachu ynchii taka nenthacha mahva? 26Changvakonchu vokheh laaruw paam taniiva tata ynchii imbe, lipah siti vakhae inchembe Johon i jaephar va enchii vakhaka ynchikreeh manuw.” 27Chutahnache enuw ing manghuwmah ung ta aeka abasangpae. Changvaniive ki ynchii aatuaricheh deen ingka nong havi katuva ichiichu neningna riirmahning taka abasang ae.

Sapa ynniimehna Ynghuwnii

28“Atarae nenuw ing ynchii nemandennah? Mee yngkhehchu asapa ynniimeh om; ama ing aupa ningnache ariir, ‘Kasiti, atanii nang vomrip birting ynriing sira.’ 29Ki siningka tamah ing taka abasang, changvakonchu aanuwna abarungriir nungaemahka sisa. 30Amana athar ampa inche asapa naepang ningnache aanghakjaeh ing ariir, amana apa ki sivakata taka abasang; changvakonchu ama simahsa. 31Enuw unae ynniimehne ampa ing amanden atuchu achuwva?” Asiti aupa chuva ta aeka abasang ae. Chutahnache Jesu ing eningna ariir, “Ki ing neningna atatak ing kariirnah: Ree ikhuum aere ichuwhmah rupanuw ae ing thangbaen iruwng lipah ting iruwhnii khaena nemaana maen ynsanae. 32#Luk 3.12; 7.29,30Akhaechuve Johon ing neningna ichum ynthiing lamchu mansiinii khaena juwngsa, amachu nenuw ing thachamah sachuw; changvakonchu ree ikhuum aere ichuwhmah rupanuw ae inche enthachapa. Nenuw ing nemubrohrae nenbarungriir huungmahchuw amanche thachakho thachamah sachuw.”

Vomrip bir Isaar thamin taklina Ynghuwnii

(Mk 12.1-12; Luk 20.9-19)

33Reentaang ynghuwnii thamin yngkheh rungaereehruw. Jesu ing ariir, “Paam aafhuw yngkheh ing vomrip bir tuka aphinpa, ruparkho atuchirpa, vomrip suurniikho atupa, arungnii khaena yngkaangpak thaam yngkhehkho atupa. Amana vomrip birchu mee ae ningna saarka paam yngkhehting sisa. 34Aanla kuumphachu ahenphatah nache, ama ing aanla phavachiichu iphanii khaena ameenae aechu ajechiirpa. 35Amana asaar mee aenche ajechiir ameenae aechu suwr aeka yngkhehchu abinpae amanche yngkhehchu athehpae, amana yngkheh chuve rung ing adeengpae. 36Aanuwnache athar ameenae inemhak ajechiir pareeh, enuw chukho amaensana thohkhe aanghakjaeh ing ahetupae. 37Aningkuur dehna ama ing ariir, ‘Kasapa chuve enuw ing topoh ijavaatae,’ taka ajechiirpa. 38Chang-vakonchu enuw ing asapa chu emutah nache yngkheh yngkheh chong manseer aeka enriir, ‘Havi inge ruw kuumvachii asapa chuva, huungruw atak i thehtaruw, amanache ama ing ruw kuumvachii vakhaechu inuw ing kuumva taruw.’” 39Chutahnache enuw ing atakchu suwr aeka enthehpa amanche vomrip bir ataangting enrenpa. 40“Changvanuwve vomrip bir aafhuw ing atheng raenche asaar mee aechu ama ing ynchii manruva chiipae,” taka Jesu ing asii ae.

41Enuw ing embasang, “Changchii ichamah mee aechu ama ing thehchir vaatae amanche vomrip bir chuve ikuum phana aanla picheh vachii mee reentaang ting pivaata.”

42Jesu ing eningna ariir, “Nenuwcha ynthiing thiimziihna ynziihchu nenpa-mahva?

‘Een itu aeng enrimah rung amachurap inche,

athurfhuwrungchu ynsuwhsa.

Havi Aafhuw ing atuva;

amanche havi inuw vakhae mik enna chembe ingikniina.’ ”

43Chutahnache ki ing neningna kariirnah, “Thangnang iruwng lipah i neningtanii jeriva kata, amanche manla vachii reentaang jaati ting pivakata.” 44Achuw yngkheh hava rung takline itiih chuve kiichim vaata, changvakonchu havi inge ataklina itiih achuw yngkhehchu pirkhuw vaang jimvaata.”

45Jesu ing ynghuwnii ing ichong vakhae i aanchung jaethiim aere Pharisi aeng ensiitah nache, kenuw ynchiiniiva ichii emanghuwpa. 46Ama-tah nache Jesu chu suwrtaruw ta aeka achuwmpae, changvakonchu lipah siti vakhae inche Jesu chu jaephar yngkhehva enchiinache enuw ynchiksae.

Currently Selected:

METHIU 21: MOYO

Highlight

Copy