METHIU 22
22
Rakhiinii Imaarna Ynghuwnii
(Luk 14.15-24)
1Jesu ing athar ynghuwnii thamin mee ae ningna ariir, 2“Iruwng lipah chuve jinge ichii ing tikna. Apha vokhehna iruwng yngkheh ing asapa khaena rakhiinii imaar thoraang atuthoh aanghakna. 3Ama ing imaarnii khaena a-een vasah vakhaechu ithengnii khaena ameenae chiirka athar a-eenpae, changvakonchu enuw itheng adapae. 4Athar vokheh ameenae reentaang aechu jechiirka ariir, ‘Kasachar vokhehkho kadeen khaar imarchaap theh ingka imaarnii thoraang chichirsa. Rakhiinii imaarna thengruw tanuwna va-een aeruw. 5Changvakonchu theng vachii vakhae inche teentaen seemmah aeka yngkheh ing aruwrae ting sisa, areh aenche ama ama enong tingche sisae. 6Athar areh aenche meenae aechu suwr aeka vokhehkho abinpae, amanche ithehkho athehpae. 7Amana iruwngchu abarung amansikpae; chukhaenache ama ing laarchang jechiirka miktheh vakhaechu atheh chirpae amanche engkhuw chukho abathu chirpae.’ 8Amana ameenae ae ningna ariir, ‘Rakhiinii imaar thoraang chichirsa, changvakonchu imaarna yngeen vakhaekha thengva enchii meer ing reenmahsae. 9Chutahnache atii nenuw lamfhuw aantuwhnii chaapna ngiirnuwna mee nemu vakhae een aeruw.’ 10Meenae aenche alam tanglahlah ong aeka mee emu vakhae isakho isamahkho aangkheng engkhuumpa. Enuw vakhae inche rakhiinii eenchu bariimsae.”
11“Changvakonchu iruwng inche itheng vakhaechu ennii khaena een sungting avaruwhtah nache mee yng-kheh ing rakhiinii peendiir niiru ing ynvaechu amupa. 12Amana aningna ariir, ‘Kaarang, nang ynchii taka rakhiiniina iniifhuw peendiir niiruchii ing havane ongvachii? Chutahnache ama mee inche basangcheh mahsa.’ 13#Met 8.12; 25.30; Luk 13.28Amana iruwng inche meenae ae ning-nache ariir, ‘Akhi akik phuwp nuwna taang ynthim ting renruw, amanche ijachaam ing chaprasii vokhehkho aha iriirsana jarasii.’ ” 14Akhaechuve, “Mee inempak a-eenva changvakonchu topohpang aateer vatah.”
Ree ipeeh khaena chong Ensii
(Mk 12.13-17; Luk 20.20-26)
15Changlaenche Pharisi aenche taang suwh aeka unakhe achongna mentaruw ta aeka ynruwhjaeh ing ensirpa. 16Amana enuw ensebok aere Herot amee ae thohche Jesu ningna vechiir aeka enuw ing enriir, “Oja, nang ing nariir chong i chumna ichii kemanghuwsa. Thangnang lam chukho ichum ing namanchuwsa, amanche mee ing ynchii kharvaate ichiikho mandenmahchii vokhehkho miksiing mikruung enmahchii. 17Chutahnache keningna namandenchu iriirpeehra! Kesar ningna ree ipeeh icha ichumva ichummahva?”
18Enuw ing ichamah emandenchu Jesu ing amanghuwtah nache ariir, “Isachaang itu ae, yngkhaena nenuw ing kichu menkenta ynchii vachuw? 19Ree pivanenchii seerchu imansiiruw.” Chukhaenache enuw ing seerchu Jesu ningting ahenchipae. 20Amana eningna ama ing asii ae, “Havane ynthin i achuw ruthaksiiva vokhehkho achuwkha ynziihne?”
21“Enuw ing Kesar,” ta aeka embasang. Chutahnache Jesu ing eningna ariir, “Kesar taava ichiichu Kesar ningting piruw, amanche Thangnang taava ichiichu Thangnang ting piruw.”
22Enuw ing ama chongchu ensiitah nache ngik aeka yngkaesae.
Ithii Hangring khaena chong Ensii
(Mk 12.18-27; Luk 20.27-40)
23 #
Nong 23.8
Ama inii naremche ithii hangring omah enchii Saduki aenche Jesu ningna vak aeka chong ensii, 24“Oja, achuw yngkheh ing siti baringru ing thiknave arumeechu auwnaefhuw yngkheh ing sapa khaena athar biva-chiiva taka Mosi ing keningna ariir. 25Kenuw kengkaarna asapa sarii adeen mee yngkheh om. Aupa inche lunghah bika siti deenru ing thiksa, chukhaenache arumeechu anaepa ningna amahpa. 26Amachu vaangche avomaniinii, avomanthumnii amanche avosariinii ipha ing abuwhpae. 27Aanuwnache rupanuw chukho thiksa. 28Chutahnache nuwting ahangring raenche unae sarii ae nache achuw rumee ynsuwhva chiiva? Akhaechuve engkheng ing abuwhpae.”
29Jesu ing abasang ae, “Thangnang ynthiing thiimziih vokhehkho Thang-nang ruwreng nemanghuwmah i nenuw nenraarsa. 30Akhaechuve athar hangring vasah mee vakhaechu rakhii niimahnii ae amanche rakhiiniikho omahnii, changvakonchu enuw chuve thangbaen vaarmee aethoh aanghak vaatae. 31Ithii hangring khaena Thangnang ing neningna ynchii ariir: Nenuw amachu nenpamahva? 32‘Ki Abraham Thangnang ping, Isak Thangnang ping amanche Jakop Thangnang chuping achiisa.’ 33Ama ing amanchuw ae chongchu mee vakhae aenche ensiitahna inempak ingik ae.”
Aaruungseh Chonghak
(Mk 12.28-34; Luk 10.25-28)
34Saduki aechu Jesu ing manchong chehmahsae ichii chongchu Pharisi aeng ensiitah nache, enuw yngkong aeka 35amana engkaar tanii vajeer tunii ihae yngkheh ing Jesu chu menkata taka chong yngkheh asii,
36“Oja, vajeer chonghak sungna aaruungseh chonghakchu ynchiiva?” 37Jesu ing aningna abasang, “Aafhuw Thangnang chu nabarungriir aangkheng, nalaetha aangkheng amanche namanden aangkheng ing naning mansiihva nachiiva. 38Havi aren vokhehkho aaruungseh chonghak chuva. 39Avomaniinii chuve, ‘Nang ing naveenchaang aechu nataksah vaang naning mansiihva nachiiva.’ 40#Luk 10.25-28Hava chonghak ynniimeh inge vajeer chonghak vokhehkho jaephar ae chong aangkhengchu ynsakchirva.”
Devit sapa khaena chong Ensii
(Mk 12.35-37; Luk 20.41-44)
41Amana Pharisi aeng empurpohrae Jesu ing eningna chong yngkheh asiiae, 42“Nenuw Khrista khaena ynchii nemandennah? Atak i achuw sapa va?”
Enuw ing embasang, “Devit sapa va.”
43Ama ing eningna ariir, “Amachu ynsaangkhe Devit ing laetha jaarna atakchu Aafhuw achiiva? 44Devit ing taka,
‘Aafhuw inche Kaafhuw ningna ariir:
Nang eejeehnii aechu nakhi derna kasiih mahtaang kabaen tachangne ongla.’
45Amachu vaniive, Devit atakrap ing Aafhuw taka ariirchu ynsaangkhe asapa vachiiva?”
46Amana achuw yngkhehpang ingkho achongchu basangcheh mahsae, vokhehkho ama inii nache basenka aningna achuw ingkho thona isa ing chong siicheh mahsae.
Currently Selected:
METHIU 22: MOYO
Highlight
Share
Copy
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
