TIRHKOHTE 11
11
Peteran a chanchin Jerusalem Kohhran a hrilh
1Judai ram tina tirhkohte leh unau awmte chuan Jentail-te pawhin Pathian thu an awih ve tih an hre ta a. 2Peteran Jerusalem a thlen chhoh leh chuan, ‘serh tan a ṭûl,’ tituten an lo sawisêl a, #Gal. 2:12. 3“Serh tan lohte i tlawh a, an zîngah chaw te i ei mai a,” an ti a. 4Nimahsela, Petera chuan a bul aṭanga indawt zêlin an hnênah a hrilh fiah a. 5“Joppa-ah ka awm a, ka ṭawngṭai laiin zêlin ka awm a, bâwm, puan hlai tak ang kil li-a hlin, vân ata ka bula lo uai thla ka hmu a. #10:9-46. 6Ka en reng a, ka ngaihtuah a, leia mi ran ke pali nei te, ramsa te, bawkvâk leh tleng chi te, chunglêng sava te a chhûngah chuan ka hmu a.
7“Tin, awin, ‘Peter, tho la, talh la, ei rawh,’ mi han tiin ka hre bawk a. 8Kei chuan, ‘Ni lo ve, Lalpa, thiang lo leh bawlhhlawh eng mah rêng ka kaah a lût ngai lo,’ ka ti a. 9Vân ata aw chuan, ‘Pathianin a tihthianghlim tawh chu nangin bawlhhlawh ti suh,’ mi han ti leh a. 10Chutiang hlîr chuan vawi thum a lo awm a, a vaiin vânah khai chhoh a ni leh ta a. 11Chutih lai chuan mi pathum, Kaisari aṭanga ka hnêna an rawn tirhte chu ka thlen in kawtah an lo ding reng tawh a. 12Thlarauvin hreh lova anmahni zui tûrin mi hrilh a. Hêng unau paruk pawh hian mi zui ve a, Kornelia inah chuan kan va lût a. 13Ani chuan a ina Vântirhkoh a hmuh thu leh a hnêna, ‘Joppa-ah mi tîr la, Simon Petera kohtîr rawh, 14ani chuan thu a hrilh ang chia, a thu sawi avâng chuan nang leh i chhûngte zawng zawng chhandam in ni ang,’ a tih thute mi lo hrilh a. 15Thu chu ka han sawi ṭan a, Thlarau Thianghlim chu, a tîra kan chunga a lo thleng ang bawk khân an chungah a lo thleng ta a. 16Lalpan, ‘Johanan tuiin a baptis ṭhîn a, nangni erawh chu Thlarau Thianghlima baptis in ni ang,’ a tihte kha ka hre chhuak leh ta a. #Tirh. 1:5; Mt. 3:11. 17Keini, Lalpa Isua Krista ringtute min pêk ang thilpêk thuhmun reng Pathianin an hnênah pawh a pêk ve miau si chuan, kei tehlul hian Pathian ka hnial thei dâwn em ni?” a ti a. 18Chûng thu an hriat chuan an ngawi ta a, “Chuti a nih chuan Pathianin Jentail-te pawh sima nung tûrin kawng a hawnsak ve ta a nih chu,” tiin Pathian an fak ta a. #Tirh. 14:27.
Antiokei khuaa kohhran
19Stefana avânga tihduhdahte kha Foiniki ramah te, Kupra thliarkârah te, Antiokei khaw thleng tein an kal darh a. Juda-te hnênah chauh lo chuan tu hnênah mah thu an hril lo. #Tirh. 8:1-4. 20An zînga ṭhenkhat chu Kupra thliarkâra mi leh Kurini khaw mite an ni a. Chûng mite chuan Antiokei an thlen chuan Grik#11:20 Mss ṭhenkhatah ‘Juda, Grik ṭawng hmangte,’ tih a ni. mite hnênah pawh thu an sawi a. Lalpa Isua Chanchin Ṭha an hrilh ve ta a. 21Lalpan anni chu a pui a, mi tam takin an ring a, Lalpa lam an hawi ta a. 22An chanchin chu Jerusalem-a Kohhran beng a lo thleng a, anni chuan Barnaba chu Antiokei-ah an tîr ta a. #Tirh. 4:36. 23A zu thlen chuan Pathian khawngaihna hnathawh chu a hmu a, a lâwm hle a. Rinawm taka Lalpa vuan tlat tûrin an za-in a fuih a. 24Barnaba chu mi ṭha tak, Thlarau Thianghlim leh rinnaa khat a ni. Tichuan, mi tam tak Lalpa hnênah hruai an ni ta a. 25Tin, Barnaba chu Saula zawng tûrin Tarsa lamah a kal leh ta a. 26A han hmuh chuan Antiokei-ah a rawn hruai a, kum khat zet kohhran mite zîngah an tel ve a, mi tam tak an zirtîr ṭhîn a. Antiokei khuaah hian a ni, zirtîrte chu, ‘Kristian,’ an tih hmasak ber ni. #Tirh. 26:28; 1 Pet. 4:16.
27Chûng lai chuan Jerusalem aṭangin zâwlnei ṭhenkhat Antiokei-ah an lo kal a.#11:27 Châng 28 bulah, ‘Hlim tlâng takin kan inkhâwm a,’ tih Mss ṭhenkhatah a tel. 28An zînga mi pakhat Agaba chu a ding a, Thlarau hriattîrin ram tina ṭâmpui mitthi a tlâk tûr thu a hrilh lâwk a. Klaudia lal laiin ṭâm chu a tla ta a. #Tirh. 21:10. 29Zirtîrte chuan an theih ang tâwk ṭheuhva thawhin Judai rama unau awmte ṭanpuina thawn an tum a. #Gal. 2:6,10. 30An tum ang chuan an ti a, upate hnênah Barnaba leh Saula kutah an thawn ta a. #Tirh. 11:25.
Currently Selected:
TIRHKOHTE 11: MIZCLBSI
Highlight
Share
Copy
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
