TIRHKOHTE 10
10
Petera leh Kornelia
1Tin, Kaisari khuaah mi pakhat, Kornelia a awm a, Itali Sipai pâwl an tiha sipai za hotu a ni. 2Ani chu Pathian ngaihsak mi a ni a, a chhûngte zawng zawng nên Pathian ṭih mi an ni. Juda mi retheite hnêna phal taka thilpêk pe ṭhîn mi a ni a. Pathian hnênah a ṭawngṭai fo ṭhîn. 3Ni khat chu tlai dâr thum vêlah fiah takin inlârna a hmu a. Pathian tirh Vântirhkoh pakhat a hnênah a lo lût a, “Korneli,” a rawn ti a. 4Kornelia chuan ani chu a en reng a, a hlau va, “Lalpa, eng nge ni?” a ti a. Vântirhkoh chuan, ‘I ṭawngṭaina leh i thil pêkte kha Pathianin a hre reng a. 5Tûnah hian Joppa-ah mi tîr la, mi pakhat, Simona, Petera an tih chu kohtîr rawh. 6Tuipui kamah, savun siamtu Simona inah a thleng a ni,” a ti a. #Tirh. 9:43. 7A betu Vântirhkoh chu a kal veleh, Kornelia chuan a chhiahhlawhte zînga mi pahnih leh sipai pakhat, Pathian ngaihsak tak, a tirhkah bîk ṭhinte zînga mi chu a ko va. 8Thil awmzia zawng zawng chu a hrilh a, Joppa-ah chuan a tîr ta a.
9Tin, a tûk chhûn laiah chûng miten khua an thlen dâwn chuan, Petera chu ṭawngṭai tûrin in chung zâwlah a lâwn chho va. 10A ril a ṭâm hle a, chaw ei a duh a; mahse, ei tûr an siam lai chuan zêlin a awm ta a. 11Vân inhawng a hmu a, bâwm, puan hlai tak ang, a kil li-a hlin hi leia lo uai thla a hmu a. #Tirh. 11:5-17. 12Bâwm chhûngah chuan ran ke pali nei te, bawkvâka kal leh tleng chi te, chunglêng sava tinrêngte a awm a. 13Aw hian, “Peter, tho rawh, talh la, ei rawh,” a rawn ti a. 14Petera erawh chuan, “Ni lo ve, Lalpa, thiang lo leh bawlhhlawh eng mah ka ei ngai hlei nêm,” a ti a. #Lev. 11:1-17; Ezek. 4:14. 15Aw chuan, “Pathianin a tihthianghlim tawh chu nangin bawlhhlawh ti suh,” a rawn ti leh a. 16Chutiangin vawi thum a rawn ti a. Bâwm chu vâna khai chhoh a ni leh ta a.
17Peteran a thil hmuh chu a ngaihna hre lova a awm lai chuan, Kornelia mi tirhte kha Simona in zâwt chhuakin, a kawt kawngkhâr bulah an lo ding a, 18“Hetah hian Simon Petera a thleng em?” tiin an lo zâwt a. 19Peteran a inlârna hmuh chu a ngaihtuah laiin, Thlarauvin a hnênah, “Mi pathumin#10:19 Mss ṭhenkhatah, ‘pahnih,’ tih a ni. an zawng a che. 20Tho la, chhuk rawh, eng mah ringhlel lovin anmahni zui ang che; anni chu ka tirh an ni e,” a ti a. 21Chutichuan, Petera chu a chhuk a, mite hnênah chuan, “In zawn chu ka ni e. Eng nge in lo kal chhan?” a ti a. 22Anni chuan, “Pathian ṭih mi, Juda hnam zawng zawngin an fak, sipai za hotu fel tak Kornelia chu vântirhkoh thianghlimin a bia a, i thu sawi a ngaihthlâk theih nân, a ina kala sâwm tûr chein a hrilh a, keini hi min rawn tîr a ni,” an ti a. 23Chu mite chu a ko lût a, a riahtîr ta a.
A tûkah chuan Petera chu a tho va, chu mite chu a zui ta a, Joppa-a unau ṭhenkhatte pawhin Petera chu an zui ve a. 24A tûk lehah chuan Kaisari chu an thleng ta a. Kornelia chuan a laichîn unaute leh a ṭhian ṭhate a lo sâwm khâwm a, Petera te chu an lo nghâk reng a. 25Peteran in a luh dâwn chuan Kornelia chuan a lo hmuak a, a ke bulah a bawkkhup a, chibai a bûk a. 26Petera chuan ani chu a kai tho va, “Tho rawh, kei pawh mihring mai ka nih hi,” a ti a. #Thup. 19:10; 22:8. 27Inbe zêl chungin an lût a, mi tam tak awm khâwm chu a va hmu a. 28An hnênah chuan, “Juda-te tân hnam dang zînga chêttlat leh anmahni tlawh a thian lohzia nangni ngeiin in hria e. Nimahsela, tu mah thiang lo leh bawlhhlawh ka ti tûr a ni lo tih Pathianin chiang takin mi hriattîr a ni. 29Chuvângin, mi rawn sâwm veleh hnial lovin ka lo kal a nih hi. Eng nge mi rawn sâwm chhan le?” a ti a.
30Kornelia chuan, “Vawiin hi a ni lina a ni ta, tûn ang hun tlai dâr thumah#10:30 Mss ṭhenkhatah, ‘chaw ngheia,’ tih a tel. ka ṭawngṭai laiin, ngai teh, mi pakhat puan vâr sin ka bulah a lo ding a, 31‘Korneli, i ṭawngṭaina leh i thil pêkte Pathianin a hre reng e. 32Chutichuan, Joppa-ah mi tîr la, Simon Petera kohtîr rawh. Tuipui kamah savun siamtu Simona inah a thleng a ni,’ a ti a. 33Chuvângin, i hnênah mi ka rawn tîr ta nghâl a ni; i lo kal thei hi a ṭha e. Tûnah hian Lalpan thu a pêk apiang che ngaithla tûrin Pathian hmaah#10:33 Mss ṭhenkhatah, ‘I hmaah leh Lalpa hmaah,’ tih a ni. kan za hian kan lo awm khâwm a nih hi,” a ti a.
Kornelia ina Petera thu sawi
34Petera chuan, “Pathianin mi duhsak bîk a neih lohzia ka hre chiang ta. #Deut. 10:17; 1 Samu. 16:7; Rom. 2:11. 35Hnam tin zîngah tu pawh amah ṭiha, thil dik taka ti apiang a lâwm zâwng mi an ni.#Jn. 9:31. 36Israel fate hnênah Pathian chuan thu a rawn thlen a, remna Chanchin Ṭha chu Isua Krista hmangin a rawn puang ngei a; mahse, Isua chu mi zawng zawng Lalpa a ni. #Sam. 107:20; Isa. 52:7; Num. 1:15. 37Johanan baptisma thu a hril hnua Galili rama inṭan, Judai ram puma thil lo thleng thu kha in lo hre tawh phawt ang a. 38Nazaret Isua chu Pathianin Thlarau Thianghlim leh thiltihtheihnain a thuam a, Pathian chuan a awmpui reng a, thil ṭha tia zin vêlin Diabola sawisak zawng zawng a tidam zêl a. 39Judai ram leh Jerusalem-a a thil tih zawng zawng hretute kan ni; ani chu krawsa khêngbetin an tihlum a nih kha. 40Mahse, Pathianin ni thum ni-ah a kaitho leh a, a inlârtîr a. 41Mi tin hmuhah erawh chuan a inlâr lo, Pathianin hretu atâna a lo ruat lâwk keiniho chauh hian kan hmu; a thawhleh hnu khân kan eiin kan in ho va. #Jn. 14:22. 42Chu chu tlângaupui tûr leh, Ani chu mi nung leh mitthi chunga rorêltua Pathian ruat chu a ni tih mite hriattîr tûrin thu min pe a ni. 43Zâwlnei zawng zawng pawhin, amah ring apiang a hming avângin an sual ngaihdam a ni ang tih an lo hril ṭhîn a nih kha,” a ti a. #Jer. 31:34; Ezek. 34:16; Dan. 9:24.
Jentail-ten Thlarau Thianghlim an dawng
44Peteran chûng thu chu a sawi laiin, a ngaithlatu zawng zawng chungah chuan Thlarau Thianghlim a lo thleng a. 45Serh tanho zînga ringtu, Petera rawn zuitute chuan, Thlarau Thianghlim thilpêk, Jentail-te hnênah pawh pêk a ni ve chu mak an ti êm êm a: 46ṭawng hriat lohtea thu an sawi leh Pathian an fak chu an hre si a. #Tirh. 19:6; 1 Kor. 12:10. 47Peteran, “Hêng mite hian kan dâwn ang bawk khân Thlarau Thianghlim an dawng si a, tui hmanga baptisma an chan tuin nge khap thei ang?” a ti a. 48Tichuan, Isua Krista hminga baptisma chan tûr thu a pe a. Chûng zawhah chuan châm rih tûrin an ngên a.
Currently Selected:
TIRHKOHTE 10: MIZCLBSI
Highlight
Share
Copy
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
