TIRHKOHTE 9
9
Saula pianthar
(Tirh. 22:6-16; 26:12-18)
1Saula erawh chuan Lalpa zirtîrte chu thah atân a la vau ta zêl a. #Tirh. 8:3. 2Kawnga mite, a hmei a pa, a hmuh apiang mana, Jerusalem-a a rawn hruai theihna tûrin Damaska khaw sunagog hotute pêk tûr lehkha Puithiam lalber a va dîl a. 3Damaska pana a kal laiin, a thlen dâwn ruaiah, thâwklehkhatan vân aṭangin êng a vêlin a lo êng ta phut a. #1 Kor. 15:8. 4Leiah a tlu a; aw a hria a, “Saula, Saula, engati nge mi tihduhdah?” a rawn ti a. 5Ani chuan, “Lalpa, tu nge i nih?” a ti a. Aw chuan, “Isua, i tihduhdah hi ka ni e; 6tho la, khuaah lût la, i tih tûr an lo hrilh ang che,” a ti a. 7A kalpuite chu hrilhhai takin an ding a, aw chu an hre na a, tu mah an hmu si lo. 8Saula chu a lo tho va, a han meng a, eng mah a hmu thei ta lo va; tichuan, an kai a, Damaska-ah chuan an hruai lût a. 9Ni thum khaw hmu lovin a awm a, eng mah a eiin a in lo.
10Damaska-ah chuan zirtîr pakhat, Anania a awm a. Lalpa chu a hnênah a inlâr a, “Anani,” a ti a. Ani chuan, “Lalpa, heta hi ka awm,” a ti a. 11Lalpa chuan, “Tho la, kawtthlêr, ‘ngîl,’ an tihah chuan kal la, Juda inah Tarsa khuaa mi Saula zawng chhuak rawh. Ani chu a ṭawngṭai mêk a, #Tirh. 21:39. 12mi pakhat, Anania lo lûta, a mit tivâr tûra a chunga kut a nghat a hmu a ni,” a ti a. 13Anania erawh chuan, “Lalpa, chu mi chuan Jerusalem-a i mi thianghlimte nasa takin a tiduhdah tih mi tam takin mi hrilh a. 14Hetah pawh i hming lamtu zawng zawng man theihna thu puithiam lalte hnên aṭanga hmua lo kal a ni asin,” a ti a. #1 Kor. 15:9; Gal. 1:13. 15Lalpa chuan, “Kal mai rawh, he mi hi Jentail-te, lalte leh Israel-te hnêna ka hming pu lûttu atâna ka mi ruat a ni asin. #Rom. 1:5; Tirh. 27:24. 16Ka hming avângin hrehawm engtia nasa nge a la tuar dâwn amah ka la hriattîr ang,” a ti a. 17Tichuan, Anania chu a chhuak a, inah chuan a va lût a, a chunga kut nghatin, “Unau Saul, i mit a vâr leh theih nân leh Thlarau Thianghlima i khah theih nân, i lo kalna kawnga i hnêna inlâr Lalpa Isua khân i hnênah mi rawn tîr a ni,” a ti a. 18Thâwklehkhatah a mit a vâr leh ta a. Tichuan, a tho va, baptisma a chang ta a. 19Chaw a ei a, a lo harh leh ta a.
Saulan Damaska-ah thu a hril
Damaska-ah chuan zirtîrte hnênah ni eng emaw zât a châm a. 20Sunagog-ahte chuan Isua chu Pathian Fapa a ni tih a hril ṭan ta nghâl a. 21A thu sawi hria zawng zawngin mak an ti hle a, “He mi hi Jerusalem-a he Hming lamtute tiduhdahtu kha a ni lâwm ni? Puithiam lalte hnêna hruai atân he Hming lamtute man tumin hetah pawh a lo kal a ni lâwm ni?” an ti a. #Tirh. 8:1. 22Saula thu sawi chuan mi a hneh deuh deuh va, Isua chu Mesia a ni tih chiang takin a hrilh fiah ṭhin avângin Damaska-a Juda-te chu a tidang a, a tibuai zo ta a.
Saula Juda-te lakah a relh ru
23Ni rei tak chhûng chu Saula thah tumin Juda-te an inrâwn khâwm ṭhîn a. 24Amah an phiar tih Saulan a lo hria a. Thah tumin chhûn leh zân kulh kawngkaahte an châng reng a. 25Nimahsela, a zirtîrten ani chu an hruai a, zânah kulh bang pâwnah bâwmin an thlâk thla ta a. #2 Kor. 11:32,33.
Saula Jerusalem-ah
26Tin, Saulan Jerusalem a lo thlen chuan zirtîrte zînga tel a tum a, anni erawh chuan zirtîr a nih ve an ring thei lo va, an za-in an hlau hle a. #Gal. 1:17-19. 27Nimahsela, Barnaba chuan tirhkohte hnênah a kalpui a, kalkawnga Lalpa a hmuha, Lalpan amah a biak thu te, Damaska-a Isua hminga huai taka thu a hril chanchin te a hrilh hlawm a. 28Tichuan, Saula chu Jerusalem-ah chuan an zîngah a chêng ve ta a. Lalpa hmingin huai takin thu a hril ṭhîn a. 29Grik ṭawng hmang Juda-te hnênah pawh thu a sawi a, a hnial a, anni chuan thah an lo tum ta mai a. 30Unauten chu chu an hriatin Kaisari khuaah an hruai chhuk a, Tarsa khuaah an kaltîr ta daih a. #Gal. 1:21.
31Judai ramah te, Galili ramah te, Samari ramah te, ram pumah kohhran mite chu muang takin an awm a, an intinghet deuh deuh va, Lalpa ṭih takin an khawsa a. Thlarau Thianghlimin a thlamuan a, an lo pung ta telh telh a.
Ainia tihdam
32Petera khaw fang chuan Luda khuaa mi thianghlimte a zu tlawh a. 33Chutah chuan mi pakhat Ainia, a zen avânga kum riat lai khuma mu tawh a hmu a. 34Petera chuan a hnênah, “Aini, Isua Krista chuan a tidam a che, tho la, i khum kha siam fel rawh,” a ti a. Tichuan, a tho ta nghâl a. 35Luda leh Saron phaia awm zawng zawngten Ainia chu an hmu a, Lalpa lam an hawi ta hlawm a.
Dorki kaih thawh
36Tin, Joppa khuaah zirtîr pakhat, Tabiti a awm a, a Grik hming chu Dorki a ni, chu chu sazukla tihna a ni. Thil ṭha ti leh retheite thil pe-a inhmang zo mi a ni. 37Chûng lai chuan a dam lo va, a thi ta mai a. An bual fai a, pindan chungnungah an zalh a. 38Luda chu Joppa khaw kiang lawka awm a ni a. Luda khuaah Petera a awm tih zirtîrten an hriat chuan, “Khawngaih takin lo kal thuai teh,” tia ngên tûrin a hnênah mi pahnih an tîr a. 39Tichuan, Petera chu a tho va, an rual chuan a kal ve ta nghâl a. A va thlen chuan pindan chungnungah an hruai chho va, hmeithai zawng zawng chu a kiangah an ding a, an ṭap a. Dorkiin a dam laia kawr leh thawmhnaw dang a siamsakte chu an entîr a. 40Petera chuan an vaiin a chhuahtîr vek a, ṭhingṭhiin a ṭawngṭai a, ruang lam chu a hawi a, “Tabit, tho rawh,” a ti a. Tichuan, Tabiti chu a lo meng a, Petera chu a hmu a, a ṭhuchhuak ta a. 41Petera chuan a ban a, a kai tho va, mi thianghlimte leh hmeithaite chu a ko va, damin an hnênah a hruai ta a. 42Chu chu Joppa khaw pum puiin an hria a, mi tam takin Lalpa an ring ta a. 43Petera chu Joppa-ah chuan ni rei tak a châm a, savun siamtu Simona inah a thleng a. #Tirh. 10:6.
Currently Selected:
TIRHKOHTE 9: MIZCLBSI
Highlight
Share
Copy
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
