TIRHKOHTE 8
8
Saulan Kohhran a tiduhdah
1Saula pawh chuan Stefana thah chu a remti ve rêng a. Chumi ni aṭang chuan Jerusalem-a kohhran chu nasa takin an tiduhdah ta a. Tichuan, tirhkohte chauh lo chu Judai leh Samari ram khaw tinah an darh ta vek a.#Tirh. 7:58; 11:19; 22:20. 2Pathian ngaihsak ṭhenkhatten Stefana chu an phûm a, nasa takin an ṭah a. 3Saula erawh chu kohhranho nuai bo tumin inahte a lût a, a hmei a pain a hnûk chhuak a, tân inahte a khung a. #Tirh. 9:1; 22:4,5; 26:9-11.
Samaria rama Chanchin Ṭha hril thu
4Tin, a darhte chu hmun tinah an kal a, Chanchin Ṭha an hril zêl a. 5Filipa chu Samari khawpuiah a chhuk a, an hnênah Krista thu a hril a. 6Mipuiten Filipa thu sawi an hriata, a thil mak tihte an hmuh chuan a thusawite chu an bengkhawn tlâng hle a. 7Ramhuai bawlhhlawhte chu ring taka auvin mi tam tak kawchhûng ata an lo chhuak a, zeng leh kebai tam tak pawh tihdam an ni a. 8Chu khua chu an lâwm ta êm êm a. #Jn. 4:40-42.
9Chu khuaah chuan mi pakhat, Simona an tih, dawithiam a awm a. Mi ropui tak niin a insawi a, Samari mite chuan a dawi chu mak an ti êm êm a. 10Mi zawng zawngin, a lian a têin a thu chu an bengkhawn hle ṭhîn, “He mi hi Pathian thiltihtheihna, ‘Ropui,’ an tih kha a nih hi,” an ti a. 11A mitdawivaih thiam chu hun rei tak mak ti taka a lo siam tawh avângin a thu chu an ngaichâng ṭhîn a ni. 12Pathian ram Chanchin Ṭha leh Isua Krista hming Filipan a hril chu an rin tâkah chuan, a hmei a pain baptisma an chang ta hlawm a. 13Simona meuh pawhin a ring ve ta a, baptisma a chang a, Filipa chu a kawp ta tlat a, chhinchhiahna leh thil mak ropui tak a tihte chu a hmu a, mak a ti êm êm ṭhîn a.
14Jerusalem-a tirhkoh awmte chuan Samari khaw miten Pathian thu an awih ta tih an hriat chuan an hnênah Petera leh Johana an tîr a. 15Anni chu an zu kal a, Thlarau Thianghlim an dâwn theih nân an ṭawngṭaisak a. 16An zînga tu mahin Thlarau Thianghlim chu an la dawng rih lo; Lalpa Isua hmingin baptisma an chang chauh a la ni si a. 17Tichuan, tirhkohten an lu chungah kut an nghat a, Thlarau Thianghlim an dawng ta a. #1 Tim. 4:14. 18Tirhkohten an chunga kut an nghahin Thlarau Thianghlim pêk an ni tih Simona chuan a hmuhin pawisa pêk a tum a, 19“Hetiang thiltihtheihna hi mi pe ve rawh u, an chunga kut ka nghahna apiangin Thlarau Thianghlim an dawn ve theih nân,” a ti a. 20Nimahsela, Peteran a hnênah, “I tangka nên hian boral rawh u: Pathian thilthlâwn pêk tangka suma lei i tum avângin. 21I rilru put dân Pathian mit hmuhah a dik lo va, hêng thilah hian tel vena leh chanvo i nei ve lo.#Sam. 18:37; Efe. 5:5. 22Amaherawhchu, i sual hi sim la, Lalpa hnênah ṭawngṭai la, i ngaihtuahna sual hi a ngaidam mial mahna che. 23Awhna rilru chhe tak i pu a, sualin a phuar tlat che tih ka hmu a ni,” a ti a. #Deut. 29:18; Isa. 58:6; Heb. 12:15. 24Simona chuan, “I thil sawite chu eng mah ka chunga a lo thlen loh nân nangnin Lalpa hnênah mi dîlsak rawh u,” a ti a.
25Chutichuan, Lalpa thu chu an hriattîra an sawi hnu chuan, Petera leh Johana chu Jerusalem lamah an haw leh ta a. An haw pah chuan Samari rama khaw tam takah Chanchin Ṭha an hril a.
Filipa leh mi tilreh
26Lalpa tirh vântirhkohvin Filipa chu a bia a, “Tho la, Jerusalem aṭanga Gaza khaw zuk chhun, chhim lam thlalêr kal tlang kawngah khuan#8:26 Mss ṭhenkhatah, ‘thlalêr kawng ram’ tih a ni. kal rawh,” a ti a. 27Tichuan, a tho va, a kal ta a. Tin, Ethiopia rama mi pakhat an lalnu Kandaki hnuaia mi tilreh lal tak, a sum zawng zawng enkawltu chu Jerusalemah Pathian be tûrin a han kal a; 28a haw lamah chuan tawlailîra ṭhu chungin zâwlnei Isaia lehkhabu a chhiar a. 29Thlarauvin Filipa hnênah, “Tawlailîr saw pan la, va pawh rawh,” a ti a. 30Tichuan, Filipa chu a va tlân a, mi tilrehin zâwlnei Isaia lehkhabu a chhiar chu a ngaithla a, “I chhiar chu a awmzia i hria em?” a ti a. 31Ani chuan, “Tu ma mi hrilh fiah lohvin engtin nge ka hriat ang?” a ti a. Filipa chu a bula ṭhu-a chuang ve tûrin a sâwm a. #Jn. 16:13. 32Lehkha Thu a chhiar lai chu hei hi a ni:
“Berâm talh tûr angin ani chu an hruai a,
Berâmno a hmul mêttu hmaa a ngawi reng angin,
Ani pawhin a ka a âng lo, #Isa. 53:7,8 (LXX).
33Tihmualpho a ni a, dik lo taka rêlsak a ni,
A thlahte chanchin tuin nge la sawi ang?
Khawvêl aṭangin a nun an lâksak ta si a,”
tih hi.
34Mi tilreh chuan Filipa hnênah, “Zâwlnei hian tu thu nge a sawi, ama thu nge mi dang thu? Mi hrilh teh,” a ti a. 35Filipa chuan Lehkha Thu aṭang chuan sawi ṭanin, Isua chanchin a hrilh ta a. 36Chutia kalkawnga an kal lai chuan tui awmna an thleng a, mi tilreh chuan, “En teh, heta hi tui a awm a, baptisma ka chan engin nge dâl?” a ti a.#8:36 Mss ṭhenkhatah châng 37-na Filipa chuan, “I thinlung zawng zawnga i rin chuan baptisma i chang thei ang,” a ti a. Ani chuan, “Ring e, Isua Krista chu Pathian fapa a nih ka ring e,” a ti a, tih a tel. #Tirh. 10:47. 38Tichuan, tawlailîr chu a tiding a, Filipa leh mi tilreh chu an pahnihin tuiah chuan an chhuk a; Filipa chuan a baptis ta a. 39Tui ata an lo chhuah chhoh chuan Lalpa Thlarauvin Filipa chu a la bo ta a. Mi tilreh chuan a hmu ta lo va; nimahsela, hlim takin a kal ta zêl a. #1 Lal. 18:12. 40Filipa chu Azota khuaah miin an lo hmu a, Kaisari khua a thlen hma chu khaw tinah a kal a, Chanchin Ṭha a hril zêl a.
Currently Selected:
TIRHKOHTE 8: MIZCLBSI
Highlight
Share
Copy
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
