GENESIS 31
31
Jakoba a tlân chhuak
1Labana faten, “Jakoban kan pa thil neih zawng zawng a lâksak zêl a, kan pa ta tûrin a intihausa a ni,” an tih thâwm chu Jakoba chuan a lo hria a. 2Labanan a en dân pawh ni dang a ang ta lo tih a hmu bawk a. 3Lalpa chuan Jakoba hnênah, “I pianna, i pate ramah kîr leh tawh rawh, ka awmpui zêl ang che,” a ti bawk a.
4Jakoba chuan Rakili leh Leaii chu ran tlatna phûla lo kal tûrin a chah a; 5an hnênah, “In pa mi en dân hi tûn hma a ang ta lo tih ka hmu thei a ni; mahse, ka pa Pathian chuan min awmpui zêl a. 6In pa tân theihtâwp chhuahin ka thawk ṭhîn tih in hria e. 7Nimahsela, in pa hian a duh duhin min chawkzân a, ka hlawh tûr lah a nawm a mâkin a tidanglam a. Ka chhiat dêr erawh chu Pathianin a phal lo a ni. 8‘A ṭial ṭhik ṭhek i hlawh dâwn nia,’ a tih leh ran rualte chuan a ṭial thik thek hlîr no an nei a; ‘a vâr phoh phoh i hlawh dâwn nia,’ tia a thu a thlâk leh pawhin ran rual chuan a vâr phoh phoh hlîr an nei a. 9Chutiangin Pathianin in pa ran chi ṭha chu a chhuhsak a, min pe zêl a ni.
10“Vawi khat ran rual hur laiin mumang ka nei a, a bawhtu kêlpa zawng zawng chu a ṭial ṭhik ṭhek te, a vâr phoh phoh te, a vâr kah zeuh zeuh te vek an lo ni a. 11Ka mumangah chuan Pathian Vântirhkohvin min lo bia a, ‘Jakob,’ a ti a. Kei chuan, ‘Eng nge ni?’ ka ti a. 12‘Dâk la, en chiang teh, ran rual bawhtu, a pa zawng zawng saw, a ṭial ṭhik ṭhek te, a vâr phoh phoh te leh a vâr kah zeuh zeuhte an nih vek saw. Labanan i chunga thil a tih dân ka hmuh ve reng avângin sawtiang sâwn thil a awm a ni. 13Bethel-ah i lungphun hriak i hnawih a, thu i tiam a, khata i hnêna inlâr Pathian kha ka nih hi. Tho la, he ram hi chhuahsan la, i pianna ramah kîr leh tawh rawh,’ min ti a ni,” a ti a.
14Rakili leh Leaii chuan an chhâng a, “Kan pa ro kan chan ve tûr eng mah a awm tawh lo; 15mikhual ang lekah min ngai tawh a ni lâwm ni? Min hralh a, kan man te lah a ei zo vek tawh bawk si. 16Kan pa sum, Pathianin a chhuhsak zawng zawng hi kan chan tûr rêng a ni asin, Pathianin a hrilh che ang chuan ti zêl mai rawh,” an ti a.
17Tichuan, a fate leh a nupui te chu sanghâwngsei chungah a chuantîr a. 18A ran rualte chu a khalh a, a thil neih zawng zawng, Padan-aram-a a awm chhûnga a thil neih thar zawng zawng chu a keng a, Kanan ram, Isaka awmna ram chu pan tûr chuan a chhuak ta a.
19Chutih lai chu Labana, berâm hmul mêt tûra a thang bo hlân a ni a, Rakili chuan a pa chhûngkaw pathian milimte chu a rûksak#31:19 chhûng tinin Pathian anga an biak, milim, aien nân te pawha an hman an nei. Hêng lai mite dân chuan hêng milimte hi rokhâwmtuten an nei chhâwng ṭhîn. Rakili hian a pa rokhâwm thei nihna a la a ang hle. a. 20Jakoba pawh chuan Suria mi Labana chu a thlim a, eng mah hrilh lovin ngaihngam takin a awmtîr a ni. 21Chutiang chuan a neih zawng zawng nên a kal ta a, Eufretis lui chu a kân sawk sawk a, Gilead tlângram chu a pan ta vang vang a.
Labanan Jakoba a ûm
22A ni thum ni chuan Jakoba tlânchhiat thu chu Labana an hrilh a. 23A ṭhuihruaite a khâwm a, a ûm ta a. Ni sarih a kal hnu chuan Gilead tlângramah a va ûmpha a. 24Suria mi Labana chuan zâna a mumangah Pathian a hmu a, “A chhia a ṭha Jakoba hnênah fîmkhur takin thu sawi rawh,” a rawn ti a.
25Labanan a ûmphâk khân Jakoba chuan tlâng sâng laiah puan in a lo zâr tawh a, Labana leh a ṭhuihruaite chuan Gilead tlângah bâwk an zâr ve ta a. 26Labana chuan Jakoba hnênah, “Ngaihngam takin min awmtîr a, min bum a, ka fanute hi engtizia nge râl man ang hrima i lâk daih le? 27Min hrilh duh lo va, min thlim a, a rûka i tlân bo mai hi engtizia nge? Benchhek te leh perhkhuangte tumin hlim takin kan thlah tûr che alâwm. 28Ka tu leh fate thlahin a fawh takngial pawh min fawhtîr phal lo va. I thil tih dân hi a âtthlâk lutuk a ni. 29Tichhe vek thei che ka ni asin; mahse, nizâna ka mumangah i pa Pathian ka hmu a, ‘Jakoba hnênah a chhia emaw, a ṭha emaw, fîmkhur takin thu sawi rawh,’ min rawn ti a. 30I pa in lam i ngai a, i haw châk êm a nih pawhin kan chhûngkaw pathian leh zêl engati nge min rûksak?” a ti a.
31Jakoba chuan a chhâng a, “I fanute hi min chhuhsak mai ang tih ka hlau êm a ni. 32In chhûngkaw pathian erawh chu kan zînga lo la an awm a niha, i hmuh chhuah chuan thah ni rawh se. Hêng kan unaute hmaah ngei hian, eng pawh i ta i hmuh chuan la zêl ang che,” a ti a. Jakoba chuan Rakilin a lo ru tih a hre si lo.
33Jakoba puan in chu Labana chuan a dap hmasa a, Leaii puan in leh an chhiahhlawhte puan in chu a dap zêl a, a hmu zo lo va. Leaii puan in ata a lo chhuak a, Rakili puan inah chuan a lût a. 34Rakili chuan milimte chu sanghâwngsei zângdam zîngah a lo thukru hman a, a ṭhut hnan a. Labanan puan in chhûng chu a dap vek a, eng mah a hmu lo va. 35Rakili chuan a pa hnênah, “Ka lalpa chuan a hmaa ka tho lo hi ngaih loh lamah ngai teh suh se, hmeichhe dân angin ka fel loh lai a ni atin a ni,” a ti a. A dap ngun hle na a, milimte chu a hmu lo.
36Jakoba chu Labana chungah chuan a thinur a, a âng ve ta thung a. “Eng nge ka bawhchhiata, thil eng nge ka tih suala min rawn ûm hi? 37Ka neih zawng zawng i dap chhuak a, in chhûngkaw thil pakhat tê pawh i hmu em ni? I hmu a nih chuan han phawrh teh; hêng kan unaute hian kan inkâr thu rêl mai teh se.
38“Kum sawmhnih i hnuaia ka thawh chhûng khân i berâm leh kêlpuite chuan no an chhiat ngai lo va, i berâmpa lah ka talh ngai hek lo. 39Ramsa seh ka sawi ngai lo, keiman ka rûl zêl a. A bo rêng rêng, zâna bo emaw, chhûna bo emaw, min rulhtîr zêl a. 40Chhûn nisain min em chau fo va, zân vûr tla khaw vawtin min hmet khawng fo bawk a, mutmu pawh ka tuah thei ṭhîn lo a ni. 41Kum sawmhnih i hnêna ka awm chhûng khân i fanute pahnih hlawh tûrin kum sâwm leh pali min chhawr a. Kum ruk, i ran hlawh tûra i ran ka vên chhûngin ka hlawh vawi sâwm i tidanglam a. 42Ka pa Pathian, Abrahama Pathian, Isaka Ṭiha chu ka lamah ṭang lo se kut bêngin min kaltîr dâwn a nih hi. Amaherawhchu, Pathianin ka hahzia te, ka thawhrimzia te a hmu a, nizân khân i hriat tûrin ka thu a lo rêl fel a nih chu,” a ti a.
Jakoba leh Labana inbiakremna
43Labana chuan Jakoba chu a chhâng a, “Hêng hmeichhiate hi ka fanute an ni a, an fate pawh ka ta an ni, ran rual chen hian ka ta a ni, dân ang chuan i hmuh apiang hi ka ta a la ni. Ka fanute leh an fa hrinte hi vawiin hian eng nge ka tihsak tâk ang? 44Ti teh, keini pahnih hi, kan inkârah thu i thlung teh ang; lung rem vûm ila, chu chu a chhinchhiahna ni rawh se,” a ti a.
45Jakoba chuan lung a la a, a phun ta a. 46Jakoba chuan a ṭhuihruaite chu, “Lung pu khâwm teh u,” a ti a. Lung a la khâwm a, an rem vûm a, chutah chuan chaw an ei ho ta a. 47Labana chuan chu chu Jegarsahadutha#31:47 Aramaik ṭawng a ni - ‘thuhretu (hriatrengna) atâna dah vûm’ tihna. a vuah a; Jakoba erawh chuan Galeed#31:47 Hebrai ṭawnga ‘thuhretu (hriatrengna) atâna dah vûm’ tihna bawk. a vuah a. 48Labana chuan, “He lung rem vûm hi vawiin aṭangin kan inkâra thuthlung chhinchhiahna ni rawh se,” a ti a. 49Chuvâng chuan a ni, a hmingah Galeed an vuah tâk ni. Mizpa#31:49 ‘vên bûk’ tihna nên a inang. an ti bawk, Labana chuan, “Hmêl kan inhmuh loh chhûngin Lalpa chuan min vêng tawn rawh se. 50Ka fanute hi i tihnawmnah emaw, nupui dang i neihsan emaw a nih chuan tu dangin min hre lo mah se, kan inkâra thuhretu chu Pathian a ni tih hre reng ang che,” a ti a.
51Labana chuan Jakoba hnênah, “Hei, lung vawm vûm leh kan inkâra lungphuna ṭang tûr ka phun hi. 52Ka lung rem vûm leh lungphun hi ka pawi khawih tûrin i rawn pêl tûr a ni lo tih hriatna ni rawh se. 53Abrahama Pathian, Nahora Pathian, an pahniha Pathian chuan kan inkâr thuthlung hi vawng him rawh se,” a ti a. Jakoba chuan a pa Isaka Ṭiha chhâlin chhia a chham a.
54Tlâng sângah chuan Jakoban ran a hlân a, a sa ei tûrin a ṭhiante chu a sâwm a. An ei zawh chuan tlâng sângah chuan an riak a.
55A tûk zîngah chuan a fanute leh a tute chu Labana chuan a fâwp a, “Dam takin,” a ti a, a awmna lamah a haw ta a.
Currently Selected:
GENESIS 31: MIZCLBSI
Highlight
Share
Copy
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
