GENESIS 50

1Josefa chuan a pa ruang chu a bawh a, a ṭah a, a fâwp a. 2Josefa chuan a hnuaia thawk damdawi thiamte ṭawih thei lo tûrin a pa ruang chu a siamtîr a. 3Chutianga ruang siam chuan ni sawmli a awh ṭhîn; Aigupta mite chuan ni sawmsarih chhûng an ṭah a. 4A sûn hun chhûng a ral hnuin Josefa chuan Farawa miliante hnênah, “Min khawngaih ula, Farawa hnênah hei hi min dîlsak teh u. 5Ka pa khân ‘Kanan rama ka thlân buatsaihah min phûm ngei ang che,’ a ti a; chhia min chhamtîr a. #Gen. 47:29-31. 6Chuvângin, tûnah ka pa chu han phûm tûrin ka chho thei dâwn lâwm ni? Ka lo kîr leh mai ang,” a ti a. Farawa chuan, “Chhia a chhamtîr che ang chuan kal la, i pa chu han phûm rawh,” a ti a.

7Josefa chu a pa phûm tûr chuan a chhuak a, a rual chuan Farawa sawrkâr hotu rual leh Aigupta ram milian zawng zawng pawh an chho ve a. 8Josefa chhûngte pawh, a unaute, a pa chhûngte nên, an kal ve vek a ni; an fanaute leh an ran rualte erawh chu Gosen ramah an hnutchhiah a. 9Tawlailîrte, sakawr chungchuang mite pawh a rual chuan an kal ve a, an kawi duah mai.

10Jordan ral hlîng hmun hruihzâwl#50:10 Heb. Garen-ha-a-tad. an han thlen chuan urhsûn takin an sûn a, Josefa chuan a pa chu ni sarih chhûng a ṭah a. 11Kanan mite chuan chu hmuna an lusûn an hmuh chuan, “Aigupta mite lusûn dân a nih hi,” an ti a. Chuvângin, chu hmun hmingah chuan Abel-mizraim, ‘Aigupta mite lusûn mual’ an vuah a, Jordan râla awm a ni.

12Jakoba fate chuan an pa sawi angin an ti a. 13A fate chuan Kanan ramah an zâwn lût a Makpela hmuna pûk, Mamre zâwn, Hit mi Efrona hnên aṭanga Abrahaman thlân atân a leiah chuan an phûm ta a. #Tirh. 7:16.

14A pa a phûm zawh chuan Josefa chu Aigupta ramah a haw leh a. A unaute leh a ruala a pa phûm tûra chho zawng zawng pawh an haw vek a.

Josefan a unaute a ṭawng thlamuan

15Josefa unaute chuan an pa a thih tâk hnu chuan, “Josefa hian min la haw rilru rengin a chunga thil dik lo kan tih ang khân kan chungah a ti ve mai ang a!” an ti a. 16Tichuan, Josefa hnênah thu an chah a, “A thih hma khân i pa chuan hetiangin thu min chah a ni. 17Josefa hnênah, ‘i ûte thil sual tih leh thil ṭha lo tak an tih ngaidam tûrin ka ngên a che, tiin in sawi tûr a ni,’ min ti a. Chuvâng chuan, i pa Pathian chhiahhlawhte thil sual tih kha khawngaih takin ngaidam ang che,” an ti a. An thu a lo hriat chuan Josefa chu a ṭap a.

18A ute chu anmahni ngei a hnênah chuan an va kal a, a hmaah an bawkkhup a, “I chhiahhlawhah kan ṭang mai ang e,” an ti a. 19Josefa erawh chuan, “Hlauthâwng suh u, Pathian tlukah ka insiam ngam hlei nêm. 20Min tihboral zawng in tum ngei a, Pathianin hmanraw ṭhaah a hmang ta hlauh zâwk a ni. 21Chuvângin, tûnah hlauthâwng rêng rêng suh u, nangni leh in fate ei tûr zawng ka tum zêl ang,” a ti a. An hnêna ngilnei taka thu a sawi chuan an thla a timuang ta a.

22Josefa chu a pa chhûngte nên chuan Aigupta ramah an awm ta reng a. 23Josefa chu kum za leh sâwm a dam a, Efraima fa, khûp thum thlengin a hmu a, Manasea fa Makira fa pawh a malchungah a chawi hman a ni.

Josefa thih thu

24A tâwpah, Josefa chuan a unaute hnênah, “Ka thih a hnai ta, Pathianin a hre reng ang che u a, he ram aṭang hian Abrahama te, Isaka te, Jakoba te hnêna pêk a tiam ramah chuan a hruai chho vang che u,” a ti a. 25Josefa chuan Israel fate chu chhia a chhamtîr a, “Pathianin a rawn kan hunah che u ka ruhte hi heta ta la chhuak ngei ang che u,” a ti a. #Exod. 13:19; Jos. 24:32; Heb. 11:22.

26Josefa chu kum za leh sâwm mi a nihin a thi ta a. A ruang chu ṭawih thei lo tûrin an siam a, Aigupta ramah chuan kuangah an zalh a.

Currently Selected:

GENESIS 50: MIZCLBSI

Highlight

Copy