JOHANA 12

Bethani-a Isua hriak rimtui chulh thu

(Mt. 26:6-13; Mk. 14:3-9)

1Kalhlên Kût hma ni rukah, Isua chuan a mitthi kaihthawh Lazara awmna Bethani a lût a. 2Chutah chuan a tân zanriah an buatsaih a, Marthiin chaw kîl ho chu a vil a, Lazara pawh a kîlpuitute zîngah a tel a. 3Marin nard hriak rimtui hlîr hlak, man tam tak, no khat#12:3 Rom mite tui tehna no, gram 324 vêl dawng. a rawn keng a, Isua keah a chulh a, a ke chu a samin a hru a. Hriak rim chu inah chuan a khat ta rum rum a. #Lk. 7:37,38.

4A zirtîrte zînga pakhat, Juda Iskariota, amah mantîrtu tûr chuan, 5“Engati nge he hriak rimtui hi duli zathuma hralhin mi retheite an pêk zâwk loh?” a ti a. 6Mi retheite a ngaihsak avânga chu chu sawi a ni lo, rûkru a ni a, tangka ip a kawl a, a chhûnga awm chu a lâk ṭhin avâng zâwk a ni. 7Isuan, “Eng mah tih suh u, mi phûm ni atân ring rawh se. 8In zîngah mi retheite chu an awm reng alâwm, kei erawh chu in zîngah ka awm reng dâwn lo,” a ti a. #Deut. 15:11.

Lazara phiar thu

9Juda mi tam takin chutah chuan a awm tih an lo hre ta a, Isua chauh hmuh duha lo kal an ni lo va, mitthi zîng ata a kaihthawh Lazara hmuh an duh bawk a ni. 10Puithiam lalte chuan Lazara pawh chu tihhlum an tum ta a, 11amah avânga Juda-te tam takin an pakaisana, Isua an rin tâk avângin.

Jerusalem-a lal anga a luh thu

(Mt. 21:1-11; Mk. 11:1-11; Lk. 19:28-40)

12A tûkah chuan kûta lo kal mipui nasa takin Isua Jerusalemah a lo lût dâwn tih an hria a, 13tûmkaute an keng a, a hmuak tûrin an chhuak a, “Hosana, Lalpa hminga lo kal chu fakin awm rawh se, Israel lal chu fakin awm rawh se,” tiin an au dual dual a. #Sam. 118:25,26.

14Isuan sabengtung a hmu a, a chungah a chuang a,

15“Hlau suh, Zion fanu,

En teh, i lal chu a lo kal e,

Sabengtung no chunga chuangin,”

tih ziak ang khân. #Zak. 9:9.

16Chûng chu a zirtîrten a tîrin an hrethiam lo va; nimahsela, Isua chawimawia a awm hnu chuan a chungchâng chutianga ziak a ni a, a chungah chûng thil chu an lo ti a ni tih an hre ta a.#Mk. 9:32; Jn. 2:22. 17Lazara thlân ata a koh chhuaha, mitthi zîng ata a kaihthawh laia a hnêna mipui awmte khân chu thu chu an hriattîr zêl bawk a. 18Chu chhinchhiahna thil mak chu a ti tih an hriat avângin a ni, mipuite chuan amah an va hmuah ni. 19Farisai-te chuan, “Eng mah in tih thei lo a nih hi; en rawh u, khawvêlin amah an zui tâk hi,” an in ti a.

Grik mi ṭhenkhatin Isua an zawng

20Kût laia Pathian chibai bûk tûra han kalte zîngah Grik tute emaw an tel a. 21Chûngte chu Galili rama Bethsaida khaw mi Filipa hnênah an kal a, “Ka pu, Isua hmuh kan duh e,” tiin an ngên a. 22Filipa chuan Andria a rawn hrilh a, Andria leh Filipa chuan Isua an va hrilh a.

23Isuan a lo chhâng a, “Mihring Fapa chawimawia a awm hun a lo thleng ta. #Jn. 13:1; 17:1; Mk. 14:25,41. 24Thu dik tak ka hrilh a che u; buh fang leia a tlâka a thih loh chuan, a malin a awm reng mai a, a thih erawh chuan rah tam tak a chhuah ṭhîn. #1 Kor. 15:36. 25Mahni nun thlahleltu chuan a hloh ṭhîn, he khawvêla mahni nun hawtu chuan a vawng reng ang a, chatuan nun a nei bawk ang.#Mt. 10:39; 16:25; Mk. 8:35; Lk. 9:24; 17:33. 26Tu pawhin ka rawngbâwl an tum chuan mi zui rawh se, ka awmnaah ka rawngbâwltu pawh an awm ve ang. Tu pawhin ka râwng an bâwl chuan Pain a chawimawi ang.

Mihring Fapa khai kânin a awm tûr a ni

27“Tûnah ka rilru a mangang hle, eng nge ka sawi tâk ang le? ‘Ka Pa, hemi hun lakah hian mi chhandam rawh,’ ka ti dâwn em ni? Dâwn lo ve, he thil tuar tûr hian he hun hi ka lo thleng a ni. #Mt. 26:38; Mk. 14:34; Jn. 11:33. 28Ka Pa, i hming#12:28 Mss ṭhenkhatah ‘Fapa,’ tih a ni. chawimawi rawh,” a ti a. Chutichuan, vân aṭangin aw a lo chhuak a, “Ka chawimawi tawh, ka chawimawi leh ang,” a ti a.

29Chuta mipui ding vete chuan aw chu an hriatin, “Khawpui a ri a ni,” an ti a; a ṭhenin, “Vântîrhkohvin a bia a ni,” an ti a. 30Isuan a chhâng a, “Chu aw chu ka tâna lo chhuak a ni lo, in tân a ni zâwk e. 31Tûn hi khawvêl chungchâng ngaihtuah lai a ni, tûnah he khawvêl rorêltu hi paih chhuah a ni ang. #Jn. 16:11. 32Kei lei ata khai kâna ka awm chuan, mi zawng zawng ka lamah ka hîp ang,” a ti a. #Jn. 3:14; 8:38. 33Chu chu eng tiangin nge a thih dâwn entîr nân a sawi a ni. 34Mipui chuan an chhâng a, “Krista chu kumkhuain a awm reng dâwn tih Dân lehkhabu aṭangin kan hria a ni, engtiziaa nangin, ‘Mihring Fapa chu khai kânin a awm ang,’ ti nge i nih? Chu Mihring Fapa chu tu nge ni?” an ti a. #Sam. 110:4; Isa. 9:7; Ezek. 37:25; Dan. 7:14.

35Isuan an hnênah, “Êng hi rei lo tê in zîngah a la awm rih ang; êng in la neih chhûng hian lêng rawh u, thimin a nang dâwn lo che u nia; thima lêng chuan a kalna chin a hre si lo; #Jn. 7:33; 9:4; Efe. 5:8; 1 Jn. 2:11. 36êng in la neih chhûng hian êng hi ring rawh u, êng fate in nih theih nân,” a ti a. #Lk. 6:8.

Juda-te rin lohna

Chûng thu chu Isuan a sawi a, a kal ta daih a, an hmuh loh tûrin a biru ta a. 37Chutiang chhinchhiahna thil mak tam tak chu an mit hmuhah ti mah se amah an ring si lo, 38Zâwlnei Isaian:

“Lalpa, kan thu sawi tuin nge ring?

Lalpa kut pawh tu hnênah nge a lan?”

a tih kha a lo thlen nân. #Isa. 53:1 (LXX); Rom. 10:16.

39Hemi avâng hian an ring thei lo va ni, Isaian,

40“An mit a tidel a, an thinlung a tingawng a,

An mitin a hmuh loh nân leh, an thinlungin a hriatthiam loh nân.

Chuti ni lo se, an hawi kîr leh ang a,

Anni chu ka tidam tûr,” a tih leh ang khân. #Isa. 6:10 (LXX); Mt. 13:14.

41Isaian chûng thu a sawi chu a ropuizia a hmuh avângin a chanchin a sawi a ni.

42Chuti chung pawhin hotute zînga mi tam takin Isua chu an ring ta a; amaherawhchu, Farisai-te avângin an insawi lang ngam lo, sunagog-a an hnawn loh nân.#Jn. 9:22. 43Pathian chawimawina aiin mihring chawimawina an duh zâwk si a.

Isua thu, rorêlna

44Isua a au chhuak a, “Tu pawh mi ring chu kei mi ring a ni lo va, mi tîrtu ring a ni zâwk e. #Mt. 10:40; Jn. 5:24. 45Tu pawh mi hmu chu mi tîrtu hmu a ni. #Jn. 14:9. 46êntu atân khawvêla lo kal ka ni, mi ring apiang chu tu mah thima an awm loh nân. #Jn. 8:12; 9:5. 47Tu pawhin ka thu hriain zâwm lo sela, ani chu keiin thiam loh chantîr tûra lo kal ka ni lo va, khawvêl chhandam tûra lo kal ka ni zâwk si a. 48Tu pawh mi hnara, ka thu pawm lo chuan a chungthu rêlsaktu tûr pakhat a nei. Ka thu sawi ngei kha ni kin ni-ah chuan a chungthu rêlsaktu a ni ang.#Mt. 10:14,15. 49Keima phuahchawpin ka sawi lo va, mi tîrtu, Pa ngei chuan, ka sawi tûr leh ka ṭawng tûr thu mi pe zâwk a ni. 50A thupêk chu chatuan nunna a ni tih kan hria. Chuvângin, Pain sawi tûra mi hrilh ang chu ka sawi a ni,” a ti a.

Currently Selected:

JOHANA 12: MIZCLBSI

Highlight

Copy