LUKA 2

Isua pian thu

(Mt. 1:18-25)

1Chûng lai chuan Kaisara, Augasta chuan khawvêl zawng zawnga mite hming ziak vek tûrin thu a pe a. #Lk. 3:1. 2Chu chu Suria ram awptu Kurinia a nih laia chhiarpui hmasa ber a ni. 3Tichuan, mi zawng zawng mahni khua ṭheuhvah hming ziak tûrin an kal ta a. 4,5Josefa pawh, Davida chhûngte leh a thlah a nih avângin, Galili ram Nazaret khua aṭang chuan, a nupui hual Mari, rit tawh tak nên chuan, hming ziak tûrin Judai rama Davida khua Bethlehem an tihah chuan an kal ve ta a. 6Chuta an awm lai chuan a hrin a lo hun ta a; fa tîrah mipa a hring a. 7Puanin a tuam a, khualbûka an len ve tâk loh avângin ran chaw pêkna thlêngah a muttîr a.

Berâmpute leh vântirhkohte

8Chu lai ramah chuan berâmputen berâm an vêng a, zânah an riah chilh a. 9Lalpa tirh vântirhkoh an hmaah a lo ding a, Lalpa ropuina chuan an vêl chu a chhun êng ta pup a; an hlau êm êm a. 10Vântirhkoh erawh chuan an hnênah, “Hlau suh ula, ngai rawh u, mi tin tân Chanchin Ṭha lâwmawm êm êm ka rawn thlen che u a ni. 11Vawiin hian in tân Davida khuaah Chhandamtu a piang ta, Lalpa Krista chu.#Jn. 4:42; Tirh. 5:31; Mt. 16:16; Tirh. 2:36. 12Nausên, puana tuam, ran chaw pêkna thlênga mu in va hmuh chuan ani chu a ni tih hria ang che u,” a ti a. #1 Samu. 2:34; 2 Lal. 19:29; Isa. 7:14. 13Thâwklehkhatan vântirhkoh kiangah chuan vân mipuiho an lo awm ta chiam a, Pathian an fak a:

14“Chungnung berah khian

Pathian chu ropui takin awm sela,

Leiah hian a lawm êm êm

mihringte zîngah rem lêng rawh se,” an ti a.

15Vântirhkohten vâna an kalsan tâk veleh berâmpute chuan, “Hawh u, Bethlehem-ah kal ila, Lalpa thu min hrilh lo thleng chu i va en ang u,” an ti a. 16Tichuan, hmanhmawh takin an kal a, Mari te, Josefa te, ran chaw pêkna thlenga nausên mu te chu an va hmu a. 17An va hmuh chuan nausên chanchin vântirhkoh sawi kha an hrilh a. 18A hria apiang chuan berâmpute thu sawi chu mak an ti hle a; 19Mari chuan chûng chu a vawng reng a, a ngaihtuah neuh neuh ṭhîn a. #Lk. 2:51. 20Vântirhkoh hrilh ang ngeia engkim an hmuha an hriat avâng chuan berâmpute chu Pathian chawimawi leh fak chung zêlin an kîr leh ta a.

21Tin, ni riat a lo tlina a serh an tan ni chuan, a hmingah, chhûla a awm hma rênga vântirhkoh sak tawh sa Isua an sa a. #Lev. 12:3; Mt. 1:25.

Nausên Isua tempulah an hruai

22Mosia Dân anga an#2:22 Mss ṭhenkhatah Mari tih a ni. inthenna ni a lo thlen chuan nausên chu Lalpa hnêna hlân tûrin Jerusalem-ah an chhohpui a. 23Lalpa Dân thu-ah, “Fa tîr mipa tawh phawt chu Lalpa chanvo tûr a ni,” tih a ni a. #Exod. 13:2,12. 24Tin, Lalpa Dân angin ṭhuro pahnih emaw, pârva no pahnih emaw inthawi nân an hlân tûr a ni. #Lev. 12:6-8.

25Jerusalem-ah chuan mi pakhat, a hming Sumeona a awm. Ani chu mi fel leh sakhaw mi tak a ni a, Israel thlamuantu tûr chu a thlîr reng a; a chungah Thlarau Thianghlim a awm a. 26,27Lalpa Hriakthiha chu a hmuh hma chuan a thi lo vang tih Thlarau Thianghlimin a lo hrilh tawh rêng a. 28Thlarau hruaiin tempulah chuan a lo kal a, nausên Isua chu a nu leh pain Dânin a phût tihsak tûra an rawn hruai luh lai chuan a lo pawm a, Pathian a fak a:

29“Aw Lalber, tûnah i thu ang ngeiin

I bawih hi thlamuang takin i chhuahtîr dâwn ta a,

30I chhandamna mi tin hmuha i siam kha, #Isa. 52:10.

31ka mit hian a hmu ta e.

32Jentail-te hnêna i êng tilang tûr leh

I mi Israel-te ropuina tûr chu,” a ti a. #Isa. 42:6; 49:6; Tirh. 13:47; 26:23.

33A nu leh pa chuan nausên chungchâng a sawi chu mak an ti hle a. 34Sumeona chuan anni chu mal a sâwm a, a nu Mari hnênah:

“Ngai rawh, Israel zînga mi tam tak

Tlûkchhiat nân leh din chhuah nân

He nautê hi ruat a ni,

Chhinchhiahna, an hnial luai luai tûra chu.

35Nang pawh, ngûnhnâma

chhun angin i thin a la nâ ang,

Mi tam tak rilru chhûngril

tihlan a ni dâwn si a,” a ti a.

36Zâwlnei pakhat, Annii, Fanuela fanu, Asera hnam, tar tawh tak a awm bawk a. A pasal nên kum sarih an inneih hnuin, 37kum sawmriat leh pali a hmeithai tawh a. Ani chuan Tempul kalsan lovin chaw te a nghei ṭhîn a, a chhûn a zân ṭawngṭaiin Pathian a be ṭhîn a. 38Chutih lai chuan ani chu a lo kal a, Pathian hnênah lâwmthu a sawi a, Jerusalem#2:38 Mss ṭhenkhatah ‘Israel’ tih a ni. chhanchhuahna beiseitu apiang hnênah nausên chanchin chu a sawi ta a.

Nazaret khuaah an haw

39Lalpa Dân ang zêla thil an tih zawh vek hnu chuan Galili ramah, an khua Nazaret-ah chuan an haw leh ta a.

40Nausên pawh chu a ṭhang lian zêl a, a fing deuh deuh va, Pathian khawngaihna a chungah a awm reng a. #Ro. 13:24; 1 Samu. 2:26.

Naupang Isua tempulah

41A nu leh pate chu kum tin Jerusalem-ah Kalhlên Kût hmang tûrin an kal ṭhîn a. #Exod. 12:1-27; 23:15; Deut. 16:1-8. 42Ani chu kum sâwm leh pahnih a nihin dân pangngai anga Kût hmang tûrin an chhohpui a. 43Kût an ṭiak a, an hâw ta a, naupang Isua erawh chu a nu leh pa te hriat lohvin Jerusalem-ah a châm a. 44An pâwlte zîngah a awm a ni ang chu tiin ni khat an kal hman tawh a, an laichînte leh an hmêlhriatte zîngah an han zawn chuan an hmu ta lo va. 45Zawng zêl chungin Jerusalem-ah an kîr leh ta a.

46Ni thum ni chuan tempulah, zirtîrtuho bula a lo ṭhu ve chu an han hmu ta a; an thu a lo ngaithla a, thute a lo zâwt bawk a. 47Anni chuan a finzia leh a chhân thiamzia an hriatin mak an ti hle hlawm a. 48A nu leh a pa chuan an han hmuh chuan mak an ti êm êm a, a nu chuan, “Mama, engati nge hetia min tih? I pa nên thlaphâng takin kan zawng kan zawng che asin le,” a ti a. #Mk. 3:31-35. 49Ani erawh chuan, “Engah nge mi zawn? Ka Pa ina awm ngei tûr ka ni tih in hre lâwm ni?” a ti a. 50An hnêna a thu sawi chu a ngaihna an hre lo va. 51An rual chuan a haw ve ta a, Nazaret an thleng a, an thu a awih êm êm zêl a; tin, a nu chuan chûng thu zawng zawng chu a rilruah a vawng reng a.

52Tin, Isua chu a lo ṭhang lian telh telh a, a fing deuh deuh va, Pathian khawngaihna leh mite duhsakna a dawng zêl a. #1 Samu. 2:26; Thuf. 3:4.

Currently Selected:

LUKA 2: MIZCLBSI

Highlight

Copy