LUKA 1

Theofila hnênah

1Kan zînga thil lo thleng chanchin, a tîr aṭanga mita hmutute leh thu rawngbâwltuten min hrilh chhâwn ang kha, mi tam takin ziak chhuah an tum ta a; 2chuvângin, Theofil zahawm ber, a bul aṭangin engkim ngun takin keimah ngeiin ka chhui a, #Tirh. 1:1; 1 Jn. 1:1; Heb. 2:3. 3mumal nei deuhvin ziaksak che ila a ṭha ang ka ti a ni, 4an thu zirtîr che kha a dikzia i hriat theih nân.

Baptistu Johana pian thu

5Judai rama Heroda a lal lai khân Abija pâwla mi puithiam pakhat, a hming Zakaria a awm a; a nupui chu Arona thlah zînga mi a ni a, a hming chu Elizabeti a ni. #1 Chr. 24:10; 2 Chr. 31:2. 6An pahnih chuan Pathian mit hmuha mi fel an ni a, sawisêlbova Lalpa thupêkte leh a Dân zawng zawng zâwm mi an ni a. 7Nimahsela, Elizabeti chu a chin avangin fa an nei thei lo va, anmahni pawh an upa tawh hle a.

8An pâwl rawngbâwl huna Pathian hmaa puithiam hna a thawh ve lai chuan, puithiamte tih dân pângngai angin, 9Tempul chhûnga lûta, rimtui hâltu tûr ṭhumvâwra an en chu a chungah a tla a. #Exod. 30:7-11. 10Rimtui a hâl lai chuan mipui zawng zawng chu pâwnah an ṭawngṭai a.

11Rimtui hâlna maichâm ding lama dingin Lalpa tirh vântirhkoh pakhat a hnênah a rawn inlâr a. 12Zakarian a hmuh chuan a phu zawk a, a hlau ta hle a. 13Nimahsela vântirhkoh chuan, “Zakari, hlau suh, i ṭawngṭaina chu hriat a ni e. I nupui Elizabeti chuan fapa a hrinsak ang che, a hmingah Johana i sa dâwn nia. 14Nang lâwmin i hlim ang a, mi tam tak pawh a lo pian avângin an lâwm bawk ang. 15Lalpa ngaihin mi lian a ni ang a, uain leh zu a in tûr a ni lo va; a nu pum chhûng aṭang rêngin Thlarau Thianghlimin a khat ang a.#Num. 6:3; Lk. 7:33; Mal. 4:5,6. 16Israel thlahte zînga mi tam tak chu Lalpa an Pathian lamah a hawi kîrtîr leh ang. 17Pate chu an fate ngaihsaktîr tûr te, mi tihmawhte chu mi felte rilru put ang pu tûr te, Lalpa tâna mite inpeih tûra lo buatsaih tûrtein Elija thlarau dawn leh a thiltihtheihna neiin Lalpa hmaah chuan a lo kal hmasa dâwn a ni,” a ti a.

18Vântirhkoh hnênah Zakaria chuan, “Chu chu engtin nge ka hriat chian theih ang? Kei putar ka ni a, ka nupui pawh a upa hle tawh si a,” a ti a. 19Vântirhkoh chuan, “Kei hi Pathian hmaa ding ṭhîn Gabriela ka nih hi, nangmah be tûr leh chûng thu lâwmawm chu hrilh tûr che-a tirh ka ni.#Dan. 8:16; 9:21. 20Ngai rawh, a hun taka lo thleng ngei tûr thil ka sawite hi i awih lo vei a, a lo thlen tak tak hma chu i ngawi reng ang a, ṭawng pawh i ṭawng thei lo vang,” a ti a.

21Mipui chuan Zakaria chu an lo nghâk ṭhuap a. Tempul chhûnga chuti chen chen a awm ta chu mak an ti hle a. 22A lo chhuah chuan an hnênah eng mah a sawi thei lo va, Tempul chhûngah inlârna a hmu a ni tih an hre ta a; an hnênah zaizirin thu a sawi a, a ṭawng thei ta hauh lo va. 23A rawngbâwl hun bi a lo kim tâk hnu chuan in lamah a haw ta a.

24Chûng hnu chuan a nupui Elizabeti chuan nau a pai ta a. 25“Mi zînga ka hming chhia chhilh nân Lalpan mi khawngaih a, heti hian mi tihsak ta,” a ti a. Thla nga a inkhûrkhung a. #Gen. 30:23; Isa. 4:1-6; Mt. 1:18.

Isua pian tûr thu

26A thla ruknaah chuan Galili rama khaw pakhat Nazaret an tiha awm, nula thianghlim pakhat, Davida thlaha mi, Josefa nupui hual hnênah chuan. 27Pathianin vântirhkoh Gabriela chu a tîr a; chu nula hming chu Mari a ni. 28Inah chuan a va lût a, a hnênah, “Chibai, vohbîk, Lalpa i hnênah a awm,” a ti a. 29A thu sawi chuan a timangang ta êm êm a, a chibai bûkna chu eng tihna tak ni ang maw tiin a inngaihtuah a.

30Vântirhkoh chuan, “Mari, hlau suh, Pathian duhsakna i dawng e. 31Ngai teh, nau i pai ang a, fapa i hring ang; a hmingah Isua sa ang che. #Lk. 2:21; Mt. 1:21. 32Ani chu mi ropui tak a la ni ang a, Chungnungbera Fapa an ti ang; Lalpa Pathianin a thlahtu Davida lalṭhutthlêngah a ṭhuttîr ang a; #2 Samu. 7:12,13,16; Isa. 9:7; Dan. 2:44. 33Jakoba thlahte chungah chatuanin a lal ang, a ramin kin ni a nei lo vang,” a ti a. 34Mari chuan Vântirhkoh hnênah, “Pasal ka la nei si lo va, engtin nge ni ang?” a ti a.

35Vântirhkoh chuan a chhâng a, “Thlarau Thianghlim chu i chungah a lo awm ang a, Chungnungbera thiltihtheihna chuan a hliahkhuh ang che; chuvângin, nau lo piang tûr chu mi thianghlim, Pathian Fapa an ti ang. 36Tin, ngai teh, i laichînnu, a ching an tih ṭhin, Elizabeti pawhin a tar hnuin mipa a pai ta, tûn thla hi a thla rukna a ni tawh. 37Pathian thuchhuak rêng rêngin tih theih loh a nei lo vang,” a ti a. #Gen. 18:14. 38Mari chuan, “Ngai teh, Lalpa bawihnu ka ni, i thu ang chuan ka chungah lo thleng rawh se,” a ti a, vântirhkoh chuan a kalsan ta a.

Marin Elizabeti a tlawh

39Chûng lai chuan Mari chu a tho va, tlângrama Juda-ho khaw pakhat panin a chho ta vang vang a; 40Zakaria in a han thlenga, Elizabeti chu chibai a bûk a. 41Mari chibai bûkna aw chu a hriatin a pum chhûnga nautê chu a lo chê a. Elizabeti chu Thlarau Thianghlimin a khat a, ring takin a au va, 42“Nang hi hmeichhia azawngah i vânnei ber e; i rîla rah pawh a vânnei e; #Lk. 11:27,28. 43Engtizia kher nge ka Lalpa nu ka hnênah i lo kal le? 44Ngai teh, i chibai bûkna aw ka hriat veleh a lâwm avângin nautê pawh ka pum chhûngah a che asin. 45I hnêna Lalpain thu a sawi kha a thleng ngei dâwn tih i rin avângin i nihlawh e,” a ti a.

Mari hla

46Tin, Marin,#1:46 Mss ṭhenah ‘Elizabet’ tih a ni.

“Thinlung takin Lalpa ka chawimawi a. #1 Samu. 2:1-10.

47Min chhandamtu Pathian chungah ka lâwm êm êm a ni,

48A bawihnu tlâwm tak hi a rawn ngaihsak a.

Ngai rawh, tûn chinah chuan ṭhangthar

zêl pawhin nihlawh min ti ang. #1 Samu. 1:11.

49Thiltitheia khân thil ropui tak min tihsak ta.

A hming pawh a thianghlim e.

50A khawngaihna chu ṭhang lo thar zêl thlengin

Amah ṭihtute tân a dai ngai lâwng.

51A bânin a chakzia a lantîr a, thinlunga chapote chu a vai darh a,

52An ṭhutthlênga lal ṭhute chu a hnûk thla a,

Rethei daikilkâra mite a chawi kâng a. #Job. 5:11; 12:19.

53Rilṭâmte chu thil tui tinrêngin a hrai tlai a,

hausate erawh chu kut ruakin a kaltîr a.

54Min thlahtute hnêna a tiam ang khân a chhiahhlawh Israel-te pui tûrin a lo thawk ta.

55Abrahama leh a thlahte a khawngaihna kha kumkhuain a hre reng a nih hi,” a ti a. #Mik. 7:20.

56Mari chu thla thum lai a châm a, a haw leh ta a.

Baptistu Johana pian thu

57Elizabeti nau hrin chu a lo hun ta a, fapa a hring a. 58A ṭhenawmte leh a laichînte chuan Lalpan a khawngaihzia an hriat chuan an lâwmpui hle a.

59A ni riat ni chuan nausên serh tan tûrin an lo kal khâwm a, nau hmingah a pa hming vêk, Zakaria, sak an tum a; #Lev. 12:3; Gen. 17:12. 60mahse, a nu chuan, “Ni lo ve, Johana sak tûr a ni,” a ti a. 61Anni chuan, “I laichînte zîngah he hming pu hi tu mah an awm hlei nêm,” an ti a. 62A pa chu a hmingah eng nge sak a duh tih zaizirin an zâwt ve a. 63Ani chuan ziakna phêk a han dîl a, “A hming chu Johana a ni,” tiin a ziak a. 64An za chuan mak an ti hle a. Chu veleh a ka leh a lei chu phelh a lo ni ta nghâl a. Pathian fakin a lo ṭawng chhuak thei leh ta a. 65An ṭhenawm zawng zawng chuan an hlau va, chûng thu chu Judai tlângramah chuan an sawi ta huai huai a. 66A hria apiang chuan an ngaihven a. “Chu nau chu engtin tak la awm ang maw!” an ti a. Lalpa pawhin amah a awmpui zêl a.

Zakaria hla

67A pa Zakaria chu Thlarau Thianghlimin a lo khat a, heti hian a ti a:

68“Lalpa, Israel-te Pathian chu fakin awm rawh se,

A mite tlawhin a rawn tlan ta si a.

69A chhiahhlawh Davida chhûngte zîngah

Kan tân chhandamtu ropui tak a din ta.

70Hmânlai zâwlnei thianghlimte kâa

A sawi tawh ang khân.

71Kan hmêlmate leh min hawtute laka

Min humtu tûr chu.

72Min thlahtute a khawngaihzia a tilang a, a thuthlung thianghlim a hre reng a ni.

73Kan pu Abrahama hnênah thu a tiam tlat a, kan hmêlmate laka min chhan a,

74Thlaphâng lova a rawng kan bâwla,

Kan dam chhûng zawng,

75A hmaa thianghlim leh fel taka kan awm a tiam kha.

76Mama, nang zawng chungnungbera zâwlnei i ni ang a,

Lalpa kawng buatsaihin i kal hmasa dâwn a ni, #Mal. 3:1.

77An sualte ngaidamin a mite a chhandam tih hriattîr tûrin.

78Kan Pathian khawngaihna nasa tak avâng hian chung lam ni chhuak chuan mi rawn tlawh dâwn, #Mal. 4:2.

79Thih hlau rêng rênga awmte leh thim zînga ṭhute chhun ênga,

Thlamuanna kawnga kan kête pêntîr tûrin,” a ti a. #Isa. 9:2; Mt. 4:16.

80Nausên chu a lo ṭhang lian a, thlarau lamah a lo puitling deuh deuh va, Israel mipui hmuha a rawn lan hma kha chuan thlalêrah a awm reng a ni. #Lk. 2:40,52.

Currently Selected:

LUKA 1: MIZCLBSI

Highlight

Copy