MARKA 16

Isua thawhleh thu

(Mt. 28:1-8; Lk. 24:1-12; Jn. 20:1-10)

1Sabat ni a lo ral a, Magdala mi Mari te, Jakoba nu Mari te, Salomi te chuan a ruang va hnawih atân hriak rimtui an lei a. #Lk. 23:56; Jn. 19:39; Mt. 26:32; 28:7; Mk. 14:28. 2Pathianni zîngah thlânah an va kal a, ni pawh a chhuak tawh a. 3“Thlân kawngka ata lung chu tuin nge min lum sawnsak ang,” an intih lai mêkin, 4(lung lian tak a ni rêng a) an han dâk a, lung chu lum sawn sa-in an hmu ta a. 5Thlânah chuan an lût a, tlangvâl pakhat puan vâr sin, ding lam panga ṭhu an hmu a, an bîng ta chûk chûk a. 6Tichuan, ani chuan an hnênah, “Hlau suh u, Nazaret Isua, an khenbeh kha, in zawng a ni âwm a, kaihthawh a ni tawh a, hetah a awm tawh lo; en teh u, an zalhna chu hei hi a ni. 7Nimahsela, kal ula, a zirtîrte leh Petera hnênah chuan, ‘A hrilh che u ang ngei khân Galili-ah a lo kal hmasa dâwn a, chutah chuan in hmu ang,’ tiin va hrilh rawh u,” a ti a. 8An khûr a, an thauvah a man tâk avâng chuan thlân ata chu an chhuak a, an tlânchhe ta a; tu ma hnênah eng mah an sawi lo, an hlau êm a ni.

Magdala mi Mari hnênah a inlâr

(Mt. 28:9,10; Jn. 20:11-18)

9(Tin, Pathianni zînga a thawhleh khân Magdala mi Mari, a kawchhûng ata ramhuai pasarih a hnawh chhuahsak hnênah khân a inlâr hmasa ber a. 10Ani chu Isua ṭhiante hnênah a kal a, mitthi ngaia an ṭap lai chu a va hrilh a. 11Nimahsela, a nung leh a, hmuh pawh a hmu tih an han hriat pawhin an awih chuang lo.

Zirtîr pahnih hnênah a inlâr

(Lk. 24:13-25)

12Chumi hnu chuan an zînga mi pahnih, thingtlâng khaw lam pan laite hnênah pawh, hmêl danglam puin a inlâr a. 13Anni pawh chuan mi dangte chu an rawn hrilh a; mahse, an lo awih chuang lo.

Zirtîr Sâwmpakhatte hnênah a inlâr

(Mt. 28:16-20; Lk. 24:36-49; Jn. 20:19-23; Tirh. 1:6-8)

14Chumi hnu chuan Sâwmpakhatte hnênah, chaw an kîl laiin a inlâr a, a tholeh hmutute thu an awih loh avângin an rin loh leh an thinlung sak kawngah chuan a zilhhau ta a. 15An hnênah, “Khawvêl ram zawng zawngah kal ula, thil siam tinrêng hnênah Chanchin Ṭha hi hril rawh u. #Tirh. 1:8. 16Tu pawh a ringa, baptisma chang chu chhandam an ni ang a, tu pawh a ring lo chuan thiam loh an chang ang. 17Hêng chhinchhiahna thil makte hi ringtute zîngah a awm zêl ang: Ka hmingin ramhuaite an hnawt chhuak ang a, ṭawng thartein an ṭawng ang a, 18kutin rûlte an man ang a, thihna tûr eng pawh in mah se, eng mah an ti lo vang; damlote chungah kut an nghat ang a, an dam zêl ang,” a ti a.

Isua vân lâwn

(Lk. 24:50-53; Tirh. 1:9-11)

19Chutichuan, an hnêna thu a sawi zawhin Lalpa Isua chu vâna hruai chhohvin a awm a, Pathian ding lamah a han ṭhu ta a. #Tirh. 1:9-11. 20Anni pawh chu an chhuak a, ram tinah thu an hril ta a, Lalpan anmahni a thawhpui a, an thu chu chhinchhiahna thil maktein a tinghet zui zêl a. Amen.)

MARKA ZIAK TÂWPNA TAWI ZÂWK

9(Tichuan, an hnêna a thu hrilh zawng zawng chu hmeichhiate chuan Petera leh a ṭhiante hnênah an va sawi vat a. 10Chumi hnu chuan, Isua ngeiin, anmahni hmangin, chatuan chhandamna thu ril thianghlim leh chhe thei lo chu, chhak leh thlang, ram tinah a theh darh ta a. Amen)#16:10 Mss ṭhenkhatah ‘tâwpna sei zâwk leh tawi zâwk’ hi a tel lo. A ṭhenah a tel kawp a, a ṭhenah a sei zâwk emaw, a tawi zâwk emaw chauh hi a tel.

Currently Selected:

MARKA 16: MIZCLBSI

Highlight

Copy