1 KORINTHMAI 11
11
1Südonou Enou Khrista zhai douyu kua neletao-a Azhai doulo.
Naotumai nou Sah Peidoyu
2Enou neletaoye paoshowe daiolouzü neletao nou Eye teisanou licho peiwe ea Enou neletao hi peikhai touyu doupeiyu sütaosü neletao nou thaifüa tawe. 3Ana Enou neletaoye panou sülou nüwe süolouzü poutumai hrülai peichanawo louzü Khristae, naotumai pei hi chanawo louzü puh chaa-e, alia Ramai nou Khrista pei chanae. 4Südonou maisou koa rathoyuki puhpei doloua veachi paoyu moa Ramai chipao shayu poutumai sünanou Khristaye sou ahrao peiwe. 5Alia maisou koa rathoyuki puhpei domoa veachi paoyu moa Ramai chipao shapayu naotumai talinou puh chaaye sou ahrao peiwe; daiolouzü puh hai peishu sailaiyu naotumai ali jünou takuyu hae. 6Naotumai alinou puh peihai domore toulouzü, puh peishua beiwuwo; ana naotumai ali donou peisaiyu moa peishu beiyu hai ahraoyu alie toulouzü puhye panou peidoloukhaio. 7Poutumai ali donou puhpei doyu matsü hae, daiolouzü puhsü Ramai vei zhu ea khouko ava baie. Ana naotumaiwo poutumai vei khouko ava baie. 8Daiolouzü poutumaiye sü naotumai hinou soupeimoe, ana naotumaiye sü poutumai hinou soupeie. 9Moa poutumaiye sü naotumai donou soupeimoe, ana naotumaiye sü poutumaiye donou soupeire. 10Südonou, rakivamaitao vanou, naotumai alinou puh hai puh chaa kharo khehi bue touyu pongaore donou puh peisü doloulai. 11Sütoukhaia, Mapaowo hinou Eletao hrümai hai, naotupai-a poutupu hinou do soumoe, moa poutupu hai naotupai hinou do soumoe. 12Daiolouzü naotupaiye poutupu hinou soulouyu süzhaibüa poutupuye sü naotupai hinou naloure alia hateitei sü Ramai hinou veloubaie.
13Naotumai aliye donou maisouye koa rathoyuki puhpei domoa Ramai hi veachi paoyu hai züho zümoe touyu sü neletao lahnou chikukhaio. 14Lah zhainoua netaoye poutumai donou peishu shoa pfüyu hai ahrao baie touyu sü doupeibaie, 15Ana naotumai ali donou louzü haisü puhvei kathebaie. Daiolouzü puh peishu shoyu sünanou puhye sü peidopeire. 16Ana maitalinou süna vanou veiva nülouzü, Enou paore pfüphou süwo louzü Eh-a moa Ramai vei lüloumaimetao-a rathozhai kukhe talia hare.
Mapao vei Lito Touyu
(Mt 26.26-29; Mk 14.22-25; Lk 22.14-20)
17Sütoukhaia, khekou hi paodou peiyu taosü, Enou neletaoye paosho moe, daiolouzü neletao nou rathore donou tave dzüyu hai veipure donou moe ana shipure donou baie. 18Daiolouzü rairailai hinou neletao nou lüloumaime alisoua vedzüyu hisü neletao hrohi hai me kukuyu bue tea Enou chouwe; alia süsü Enou taoli louchewe. 19(Veikhaimoa, neletao hrohi sü cheche-a, buyu puletaoye sü panou sheesha-a ngaoloure donou me kukua buvu zülai.) 20Me alisoua neletao nou tave dzüyu kisü, neletao nou toua buyu süsü Mapao vei Lito sünamoe. 21Daiolouzü neletao nou toua buyu hisü, maili linou lah lah tovaisü potouwe, sükua kamaisü houwe ea kukhemai taonou shozhia bue. 22Neletaoye donou toure, shore ki hawu? Moa neletaowo Ramai vei lüloumaime donou tsükhouyu hawu, alia toure hamaitaoye sou ahrao peiwu bailaiwu? Haina vanou Enou neletao hi dai paopei shulai tea neletao chowe? Enou neletaoye paosho laiwu? Moe, Enou paosho laimoe.
23Daiolouzü Enou neletao hi pei-a buyu doupeiyu haina hai Enou Mapaowo hinou ngaoloue; süolouzü Mapao Jisu nou puhye thoupeiyu khei sühinou raokhao pho ali poloue, 24alia puhnou Ramai hi kalo paowu-a süsü soukhoe, alia haibüa paoe, “Haisü neletaoye donou soukhoyu Apfüphaoe. Eye licho loure donou haisü soukhaio.” 25Süzhaibüa, vailouyu thaisü puhnou pai poloua paoe, “Pai hainasü Azhenou paoshee soukhai touyu Ramai vei Vo Ashu nasüe. Neletao nou haina pokütsüsü Eye licho loure donou soukhaio.”
26Daiolouzü neletao nou raokhao haina touyu tsü ea pai haina pokütsü sü, Mapaowo khaivemo koute sü puhvei athaisü neletao nou shangaoa bue. 27Südonou maitalinou züdoumoyu zhai hinou Mapao vei raokhao toulouzü ea puh pai pokülouzü Mapaowo vei pfüphao ea zheye zhaiwuyu vei mah bue. 28Südonou mai hrülainou lahye raia chikutou louyu thainou raokhao nasü toulai ea pai nasü külai. 29Daiolouzü maitalinou Mapao vei pfüphao hai daisa touyu vei kosü sümoa raokhao nasü toulouzü ea pai nasü pokülouzü, puhsü lahnou puh vahi Ramai vei chikuyu sü touthou, shothou baiwe. 30Sükuyu vanou neletao hrohinou mai taolisü lelou hoe, sou-noua bue, alia kamaisü thaitare. 31Ana Eletao nou raia lah Eletaoye chiku loure toulouzü, Eletao sü Ramai vei chikuyu sü daowu paimoe. 32Ana deiphao maiye koa Eletao pei hi mah dukakhai more donou Mapaowo nou Eletaoye chikuwure ea tudee peire.
33Sübüyu thaisü, Athaihou jürai maitao, neletao nou Mapao vei Lito toure donou tave dzüyu kisü, alinou aliye kholo. 34Alia maitalinou houa bulouzü, neletao vedzüyu hisü Ramai vei chikuyu sü panou velou more donou, houyu puhsü raia puh ki hinou toulo. Chi kukhe taosü E veyu kinou ve paoshee peilai.
Currently Selected:
1 KORINTHMAI 11: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.