1 KORINTHMAI 12
12
Rako Mashi vei Kukuyu Sapeinatao
1Chuo neletao nou Rako Mashi vei sapeinatao vanou chi nouyu süna vanou phalai.
Athaihou jürai khemai, Enou neletaoye panou sütao vanou cheche nasü sülouyu züpawe. 2Neletao nou süwe süolouzü neletao nou zhaohshoa bubu kisü neletaoye sü ludu taoli hinou sümah sümo peiwu-a panou hrirai hayu basharataoye thowe. 3Südonou Enou neletaoye panou sülou nüwe süolouzü Ramai Rako nou süthaia laiyu maitalinoua, “Jisu hai cha ngaotheo!” tea paolou hoe, alia maitaliye Rako Mashi nou süthai peimoa, “Jisu hai Mapaowo süe,” tea paopa louhoe.
4Chuo rako vei sapeina hai tyatyali bue, ana sütaosü Rako alinou peibaie. 5Alia kuvah kukua bue, ana Mapao aliye kuvah soubaie. 6Vah souloure khouko kukua bue, ana Ramai alinou mai hrülai hisü lah lahvei vah sourevei khouko sü peie. 7Mai hrülaiye panou veire donou bo kukheli hinou mailili hisü Rakoye ngaopeiyu sünasü peiwure. 8Daiolouzü Rakonou mai ali hisü ratsüvei chipao peikhaitoue, alia kukhemai ali hisü Rako sünanou tsüvei chipao peikhaitoue. 9Kukheli hisü Rako sünanou lü peikhaitoue, kukhemaili hisü Rako sünanou sounou souvei peiyu khouko peikhaitoue. 10Rako sünanou mai kukheli hisü khupa vah souloure khouko peikhaitoue; kukheli hisü rachi paopayu, kukheli hisü rakoye sükuyu, kukheli hisü la sütho tyali paoyu ea kukheli hisü puhnou la dapayu khouko peikhaitoue. 11Ana haitao teitei sü likhei baiyu ea kheihao baiyu Rako puhnou süpeibaie; alia puh leli thaifüa mai alili hisü puhnou tya kukuyu sapeina peie.
Pfüphao Ali hinou Zha Alao Buyu
12Daiolouzü pfüphao hai ali baikhaia zha alao buyu büa, alia pfüphao zha teitei hai alaokhaia pfüphao ali baiyu kua, Khrista-a sübübaie. 13Daiolouzü Jihudimai khaia, moa tahrüh kukhemai khaia; qilatao khaia moa do soumaitao khaia Rako alinou Eletao hrülaiye sü pfüphao ali hinou dzükhao dapeire, alia Eletao hrülaiye panou Rako ali hinou küloure.
14Daiolouzü pfüphao hisü zha alikhei bubaimoe ana alaosou bue. 15Phinou, “Ewo bah moyu donou, Ewo pfüphaohi bumoe,” tea paolouzü, sünanou sünaye sü pfüphao vei zha ali souyu hinou soukua khailouhoe. 16Alia nounou, “Ewo nghithou moyu donou, Ewo pfüphao hi bumoe,” tea paolouzü, sünanou sünaye sü pfüphao vei zha ali souyu hinou soukua khailouhoe. 17Pfüphao teitei hai nghithou bailouzü, sünanou kakua chouloulai? Alia pfüphao teitei hai nou bailouzü, sünanou kakua kai hüloulai? 18Ana Ramai nou lah puhvei leli thaifüa takukuyu zha sütao teitei sü sübüa pfüphao hi khaipei khaitoue. 19Teiteinou zha alikhei bailouzü pfüphaosü kahi bulai? 20Sübüanou zha alao bukhaia, pfüphao louzü ali baie.
21Südonou nghithounou bah hi, “Ewo neye koyu hae!” tea paolou hoe. Moa peinou phi hi, “Ewo neye koyu hae!” tea paolou hoe. 22Moe, lelouhoka-a ngaoyu pfüphao vei zha sütaonou koulih soua matsüka baie; 23alia Eletao nou khaishoa tsükhou peizüe tea choyu pfüphao zha sütaoye Eletao nou koushoa tsükhoupeie, alia maiye panou ngaolou shiyu Eletao vei pfüphao zhataoye sü Eletao nou zhaivei koushoa tutoupeie, 24sübüa tupeiyu sü mainou ngaolou veiyu Eletao vei pfüphao zhatao donou koyu hae. Lah Ramai puhnou khaia tsükhouyu zha sütaoye panou koua tsükhou loure donou sübüyu zhai hinou pfüphao hai podzüpei khaitoue. 25Alia südonou pfüphao hisü kuku-a zhiyu hae, ana sünavei kukuyu zha pfüphou nou alinou aliye donou kheihao-a zhutou peiwe. 26Pfüphao zha alinou veaho louzü, zha kukhe teiteinou sünaye koa veahozho peiwe, zha aliye tsükhou peilouzü, zha kukhe teiteinou koa sazhowe.
27Neletao hrülai sü Khrista vei pfüphaoe, alia neletao mai ali linou sünavei zhataoe. 28Alia lüloumaime hisü Ramai nou mai hrülaiye lah lah buh dopei khaitoue: rairaikai hinou sei-atamaitaoe, ahai chena hinou rachipaola maitaoe, asü chena hinou dou-apei maitaoe; süthaisü khupa vah souyu maitaoe, süthaisü sounou souvei peimaitao, maiye soukha peimaitao, süthai-apeimaitao ea süthoyu la paopamaitaoe. 29Puletao hrülainou sei-atamaitao moe, moa rachi paolamaitao moe, moa dou-apeimaitao moe. Mai hrülainou khupa vah soure khouko hae, 30moa sounou souvei peire khouko hae, moa mai hrülainou sütho la paoyu khouko hae moa la dapayu khouko hae. 31Ana kou lih soua veikouyu rako vei sapeina taosü züpalo.
Alia Enou neletao hi chua veiveilai ludu nasü ngaopeilai.
Currently Selected:
1 KORINTHMAI 12: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.