1 KORINTHMAI 13
13
Leshi vei Ludu
1Enou emai ea rakivamai la taonou paokhaia, leshi halouzü, Esü hu dayu kho moa hu baiyu kho bübaie. 2Alia Ahi rachi paopayu vei sapeina bukhaia alia kheitsü ea tsü teitei sükhaia, alia Ahi deichitao podalou süyu lü teitei bukhaia, leshi halouzü, Esü halia moe. 3Enou Avei buyu na veishi toure hamai hi peikhaia, alia Apfüphao hai mei deire donou thoupeiwu khaia, leshi halouzü, Esü halia zhimoe.
4Leshi nou shamea peie ea zhuvea peie; leshinou maiye ngaorai moe, zho soumoe moa khaophu soumoe; 5leshi nou zhaishi soumoe, dutounü moe, rarou hahamoe moa ashi chomoe; 6leshi nou ashiye koa sazho moe, ana chechenaye koa sazhowe. 7Leshi nou ha teitei pfüpeie, ha teitei louche peie, ha teitei reipeie ea ha teitei shamea peie.
8Leshi hai akhai hae; rachi paopayuwo hata bailai; süthoyu latao-a sobailai; tsü-a hata bailai. 9Daiolouzü Eletao vei tsü sü liche moe ea Eletao vei rachi paopayu sü liche moe; 10Ana licheyu süna veyu kisü, liche moyu sünasü hata bailai.
11Enou taibu kisü, Enou nahmai ali büa chi paoe, nahmai ali büa süe, alia nahmai ali büa tsü choe; chuo Enou tsüpayu kisü, Enou nahmai vei zhai nasü thaowure. 12Chu Eletao nou ngaoa buyu sünawo louzü zhuzhu hinou ngaorarayu khu bübaie; ana sükisü zhu haonou ngaolai. Chu Enou süa buyu sünawo louzü kaitouli hinou baie, sükisü Ramai nou chu Eye sükhaia buyu sübüa E-a sükhailai.
13Südonou chuo lü, areih ea leshi haitao asü hai bue; ana haitao hronou dukayu nawo louzü leshina baie.
Currently Selected:
1 KORINTHMAI 13: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.