1 KORINTHMAI 14
14
Rachi Paopayu ea Latao
1Koulihsoua leshi phoulo, alia lenoua rako vei sapeinatao, matsüsoua neletao nou rachi paopa loure donou züpalo. 2Daiolouzü sütho lanou paoa buyu puhnou emai hi paomoe ana Ramai hi paobaie, daiolouzü maitalinoua puhnou paoyu sü sümoe, ana puhsü rako vei khouko hinou kheitsü nasü paopa-a bue. 3Ana rachi paopa-a buyu puhnou maikhemai hi puletaoye soudupa peire donou, süpeire donou ea le sousa peire donou paoe. 4Sütho la paoyu puhnou lah puhye likhei soudupei baiwe, ana rachi paopayu puhwo lüloumaime teiteiye soudu peiwe.
5Enou neletao hrülaiye panou sütho la paonüwe; ana koulih soua panou rachi paopa nüwe. Daiolouzü lüloumaime teiteiye soudu peiloure donou mai kamainou la nasü dapa peimo louzü, rachi paopayu puhnou sütho la paoyu puh jünou dukou hie. 6Südonou Athaihou jürai maitao, Enou sütho lanou paoa neletao hi velouzü, sünanou neletaoye donou dai koyu bue? Enou neletao hi Ramai hinou ngaopeiyu li moa kukhe tsüli moa rachi paopayu li, moa doupeiyu li pove peimo louzü halia koyu hae.
7Hrirai hayu lou souyu baseitao koutea süolouzü shaa moa lanabvü aduna-a kho sheetoua houngpei molouzü maitalinoua dai houngsa touyu sü sükupei louhoe? 8Alia reih soure be nasü kho sheetoua houngpei molouzü, reihmai thaohnou reih soure donou soudalai? 9Süzhaibüa, neletao nou sütho la hinou paoyu chipao nasü paosheetou peimolouzü, maitalinou kazhaibüa neletao nou pao-a buyu sü süloulai? Neletao vei chipaosü teikhaihi paokhai bailai! 10Deiphao hi la takukuyu alaosoua bue, sütoukhaia sütao hisü ko hayu ali-a hae. 11Ana paoa buyu la sünasü Enou sümo louzü, Ahi chipao-a buyu puhsü Eye donou vakoumai ali bübaie ea Esü puhye donou vakoumai ali bübaie. 12Südonou lah neletao hia sübübaie, neletao nou Rako vei sapeinatao sü ngaolou nüshoa buyu donou, ha teitei jünou lüloumai meye soudupa peiloure veikayu sütaosü phoulou vuzükhaio.
13Südonou sütho la pao-a buyu puhye panou la dapa loure donou veachi paokhaio. 14Daiolouzü Enou sütho la hinou veachi paolouzü Arakonou chechenou veachi paoe, ana Atsüwo louzü sühisü lou zha lia ngaozho moe. 15Sükuyu thaisü Enou dai soulai? Enou Arakonou veachi paolai, ana Enou Atsünou-a veachi paolai; Enou Arako nou lou soulai, ana Enou Atsünou-a lou soulai. 16Nenou rako hinou likhei Ramai hi kalo paoyu kisü, kabüa rako meime hinou lou zha ngaozhoa buyu maitalinou nevei kalo paoyu veachi hisü “Amen” tea paolai? Nenou paoa buyu hisü puhnou süloure ludu lia hae. 17Ramai hi kalo paoyu nevei veachi sü veishoa malae, ana kukhe maiye sü soudu peiyu halia hae.
18Enou Ramai hi kalo paowe daiolouzü neletao hrülai jünou koushoa Enou süthola paowe. 19Ana kukhe maiye doupeire donou lüloumaime vei rathoyu hiwo louzü, sütho lanou chipao the kiruo paoyu jüwo Enou Atsü hinou chipao angou paobailai.
20Athaihou jürai khemai, neletao nou tsü choyu hisü nahmai büwuso; ana ashi hinou nahmai büloua neletao nou tsü choyu hisü liche-a bulo. 21Razhai hinou haibüa rüwure,
“Sütho la paoyu maikhe maitao vanou
Enou Amaitao hisü chi paolai, tea Mapao nou paoe,
Vakou teideimai mali vanou, Enou chi paolai,
ana sükoutea Amaitao nou Achi sü keipei laimoe.”
22Südonou sütho la paoyu sapeina nahai lüloumaitao vei sheemoe ana lüloumomaitao vei baie; ana rachi paopayuwo lüloumomaitao vei moe ana lüloumaitao vei baie.
23Südonou hakinou lüloumaime teiteinou vedzüa bulouzü ea mai hrülainou la süthonou paoshua bulouzü, alia vakoumai moa lüloumomai kamai sü tavelou louzü, puletao nou neletaoye sü voe tea paolai mowu? 24Ana lüloumo mai kamaitao moa vakoumai kamainou tavelouyu kisü, maikhemai hrülai nou rachi paopa-a bulouzü, puhnou keilouyu süvanou puhye sü paothou louche peilai. Puhnou keilouyu sütao pfüphou nou puhye sü chikulai, 25puhvei kheitsü nasü popa ngaopeiwulai, alia sübüa puhnou puhpei pfüna kouloua Ramaiye tholai ea chechenou Ramai hai neletao hrohi bue tea shapalai.
Shodzünou Rako vei Sapeinatao Seiyu
26Athaihou jürai maitao, Enou paoyu kowo louzü haire. Neletao nou rathore donou vedzüyu kisü, mai kamainou lou soulai, kamainou doupeilai, kukhe linou Ramai nou moshilaia ngaopeiyu sü paongaowulai, kamainou la süthonou paolai moa kamainou la dapalai. Haitao teitei sü lüloumaime soudupa loure donou souloukhaio. 27Mai kamainou sütho lanou paolai toulouzü, sühisü mai ahai moa moshilai louzü mai asüye panou paokhaio, alia süsü panou shoshonou paokhaio, alia kamai alinou paoa buyu süsü la dapa vuzülai. 28Ana sühisü la dapa peiremai hae toulouzü, la sütho paoa buyu puletaoye panou lüloumaime hronou ngasoua buloukhaio ea panou lah hi ea Ramai hi likhei paoyu souloukhaio. 29Rachi paolamai ahai molouzü asüye panou chi paokhaio, alia paoyu süsü panou kukhe maiye chikukhaio. 30Ana ngheikinou chobua buyu kukhemai alihi Ramai nou ngaopeiyu bue toulouzü, chi paoa buyu puhye panou paikhaimoa bukhaio. 31Daiolouzü mai hrülaiye panou süloua le soudu peiloure donou, neletao hrülainou shoshonou paopa lousüe. 32Alia rachi paolamaitao vei rakotao hai rachi paolamaitao khakhehi hrüvu zülai, 33daiolouzü Ramai hai pha-bei sümoyu Ramai moe ana kaonayu Ramai baie.
Sheeyumaitao vei lüloumaime pfüphou hi tayu zhaibüa, 34naotumaitao nou lüloumaimetao vei rathoyu meime hisü paikhaimoa bulai. Daiolouzü puletaoye sü chi paore donou aetou peimoe, ana razhai hinou paoyu büa, puletao sü khakhe hinou buyu zü bailai. 35Puletao nou sünüyu hatali bue toulouzü, puletaoye panou lahki hinou puletao chaamaitao hinou nouloukhaio. Daiolouzü naotumai ali donou lüloumaime hronou chi paoyu hai ahraoyu alie.
36Molouzü Ramai chipao hai neletao hinou paraiwu? Moa Ramai chipao veyu hai neletao hi likhei veibaiwu? 37Maitalinou puh hai rachi paolamai alie tea cholouzü, moa rako vei sapeina buyu mai alie tea cholouzü, Enou neletao hi rüyu haisü Mapao vei chikhae tea puhnou sülou vuzülai. 38Ana maitalinou haina hai popei molouzü, puhye sü popeiso.
39Südonou Athaihou jürai maitao, rachi paopare donou lenoushoa züpalo, alia sütho la paoyu sü nuso; 40ana ha teitei sü zhai veitoua ea shoshonou soulou vuzülai.
Currently Selected:
1 KORINTHMAI 14: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.