1 KORINTHMAI 15
15
Khrista nou Hrishu Louyu
1Athaihou jürai maitao, Enou neletao hi paodou peikhaitoua neletao nou polouyu ea süvanou neletao vei lü soushu palouyu Ko Avei sünasü chuo Enou neletaoye panou li-cholou nüwe. 2Enou neletao hi paodouyu chipao sünasü Ko Avei sünasüe. Neletao nou Ko Avei haina hai potouloua bulouzü, sünanou neletaoye khailu peire— molouzü neletao sü raohanou louchebaire.
3Daiolouzü E-a ngaolouyu matsü tsülaina süsü Enou neletao hi thoupeire, süolouzü sheeyu larübvü thaifüa Khrista nou Eletao mah donou thaipeire, 4süolouzü sheeyu larübvü thaifüa puhye sü povure ea teithe asüzhou puhsü hrishu loure; 5alia puhnou Kephas hi ea süthainou sei-atamai kiahaitao hi ngaopeie. 6Süthaisü puhnou lüh ali hinou thaihou jüraimai kaihngoujü lah-a buyu taohi ngaopeie, puletao hronou poulo chukoute hrihie, ana kamaiwo zhitare. 7Süthaisü puhnou Jems hi ngaopeie, alia süthaisü sei-atamai hrülai hi ngaopeie.
8Alia akhai khailai hinou, hrü chemoa nakouyu nah büyu Ahi-a puhnou ngaopeie. 9Daiolouzü Ehai sei-atamai tea kuzü moyu, sei-atamaitao hrülai hronou tai-noukayu nasüe, daiolouzü Enou Ramai vei lüloumai meye souveapeie. 10Ana chu Enou haibüa hrüa buyu hai Ramai zhuvea vanou baie, alia puhnou Ahi peikhai touyu zhuveana hai hakonou moe, daiolouzü Enou sei-atamai kukhe hrülai jünou khoupua vah souloure; ana chechenou süsü Enou soumoe, anou süsü Eye koa buyu Ramai vei zhuvea sünanoue. 11Südonou haisü Ahinou ve-a, puletao hinou ve-a, Eletao hrülainou paodouyu nasü hainare, alia sübüa neletao nou louche loure.
Eletao vei Hrishuyu
12Chuo Khrista hai athai hinou hrishu loure tea Ehnou paodou louzü, kabüa neletao hronou kamainou thaimai hai hrishu laimoe tea paowe? 13Thaimai donou hrishuyu hae toulouzü, süthaisü Khrista-a hrishu loumoe; 14alia Khrista hai hrishu loumoe toulouzü, süthaisü Ehnou paodouyu hai hako baire, ea neletao vei lü-a hako baire. 15Süjünou koua Ehye sü Ramai vei amada zhopaoh maitao tea ngaopeire, daiolouzü Ehnou Khristaye Ramai nou athai hinou souhrishu peie tea paoe, ana thaimai hai hrishumoe touyu hai chekhao louzü, süthaisü puhnou Khristaye souhrishu peimoe. 16Daiolouzü thaimai hai hrishu molouzü, Khrista-a hrishu moe. 17Alia Khrista hai hrishu molouzü, süthaisü neletao vei lü hai hakobaie ea neletao hai chu koutea neletao vei mah hinou buhie. 18Süthaisü Khrista hinou zhitayu puletao-a ha-kare. 19Chu hrü haina donou likhei Eletao nou Khrista hi rei-a bubailouzü, Eletaowo deiphaomai kukhe hrülai jünou zhuvea kayu maitaoe.
Hrishu Vuzülaiyu
20Ana athai hinou zhia buyu maitao hai hrishu vuzülai touyu lapeiyupao soure donou Khrista hai athai hinou hrishu cheche loure. 21Daiolouzü mai ali vanou athai veyu sübüa, mai ali vanou thaimainou hrishuyu-a veloure. 22Daiolouzü Adam vanou mai hrülainou thaiyu süzhaibüa, Khrista vanou mai hrülaiye souhri peiwulai. 23Ana mai ali lisü lah shoshonou hrishulai: Khrista nou mai hrülai jünou raikaie; süthaisü puhmaitao soua buyu puletao nou puh veyuki hrishulai. 24Süthaisü akhai teile sü velai; sükisü Khrista nou teidei khomaitao, soulousü zü ea khouko teiteiye koloulai, alia süthaisü Vedei nasü Puo Ramai bah hi thoupeiwulai. 25Daiolouzü Ramai nou Khristaye ngaobamai hrülaiye koloua puletaoye Khrista phihi pove khaimo koutesü puhnou Veo soua bulai. 26Puhnou souhare akhai khailai ngaobamai süolouzü athai sünasüe. 27Daiolouzü sheeyu larübvü nou paoe, “Ramai nou ha teitei sü puh phihi pove khaipeire.” Sütoukhaia haisü sheetoubaie, süolouzü “ha teitei” touyu hisü Khrista phihi ha teitei pove khaipeiyu Ramai puhwo loumoe. 28Ana ha teitei hai Khrista khakhe hi pove khaiyu kisü, lah Nahpoutu puh-a ha teiteiye puh khakhe hi pove khaipeiyu Ramai puh khakhe hi ve bulai; alia ha teitei pei hi sü Ramai nou tukha khouloua bulai.
Hrishu Züyu-zümoyu vanou Tsü chodayu
29Chuo thaimai sühsoua dzükhao dayu puletao sü kabü khailai? Thaimai hai hrishu khailaimoe toulouzü, daidonou puletao sühsoua maikhe mainou dzükhao dawe? 30Daidonou Eh hai teilecho tsünou hakalou veiyu hi buwe? 31Athaihou jürai khemai, teithetsünou Esü athaiye daoa buwe! Eletao nou Eletao Mapao Khrista Jisu ye koa ali soulouyu hinou neletao hi Akathe soulou vei buyu süna vanou Enou chi haisü paowe. 32Enou emai zhaido hinou Ephesa hi khaosoutaoye reihzü bailouzü, sünanou Eye donou dai zhiyu bue? Alia thaimaitao sü hrishu molouzü, süthaisü haibüa paoyu kua, “Eletao sü tou-sho laikhe, daiolouzü Eletao hai doso thaibailai.”
33Maiye panou lawuso, “Samai ashinou zhai avei souhawu baiwe.” 34Leikeiyu tsü hi khaivelo ea neletao vei mah ludusü thaowuwo. Haisü Enou neletaoye panou ahrao loure donou paowe, daiolouzü neletao kamaisü Ramaiye sümoe.
Hrishuyu Pfüphao
35Ana kamainou noukhailai, “Kabüa thaimainou hrishulai? Dai pfüphaonou pfüa puletao sü velai?” 36Voyu maitaore! Neletao nou thoutai vuthouyu kisü, süsünou thaitamo koutesü paopata moe. 37Alia neletao nou vuthouyu süsü thaikhai hi paopare süübe süna moe, ana thoutai likhei süolouzü southou tai moa kukhe thoutai talibaie. 38Alia Ramai nou puh leli thaifüa thoutai sünaye sü pfüro ali peiwe alia puhnou thoutai alili hisü lah lah pfüro chekhai peiwe.
39Daiolouzü vasou teitei hai zhobaimoe; ana emai vei vasounou tya alie, khaosouvei vasounou kukhe tya alikhaie, reihoutao veinou tyali khaie ea khah veinou kukhe tya alikhaie.
40Alia raki hilovei pfüphaotao ea deiphao vei pfüphaotao-a bue; ana raki hilo pfüphao zhuvei süna hai deiphao pfüphao vei zhuvei süna jünou tyakuhie. 41Teinghi vei avali bue ea khou vei ava kukheli bue, alia teivutao vei ava kukheli bue; alia teivuhtao hrohia kukuyu ava bue.
42Thaimainou hrishuyu kisü süzhaibü bailai. Pfüphaoye povuyu kisü, süsü hakalouvei pfüphao baie; hrishuyu kisü, süsü haka laimoyu pfüphao baie. 43Povuyu kisü süsü zhu shishoe ea lelouhoe; hrishuyu kisü, süsü zhu veisholai ea khousholai. 44Povuyu kisü, süsü vasouvei pfüphao baie, hrishuyu kisü, süsü rakovei pfüphaolai. Vasouvei pfüphao bulouzü, rako vei pfüphao-a bue. 45Daiolouzü sheeyu larübvü nou paoe, “Mai raina Adam sü hrirai pfüyu mai ali souloure;” ana Adam nanawo hrirai peilouyu rako souloure. 46Rako hilovei nanou veraimoe, ana vasou hilo vei nanoue, alia süthainou rako hilovei nasü ve. 47Nainou souyu Adam raina sü deiphao hinou ve; Adam ahai chena sü raki vanou ve-e. 48Deiphao hilonou veyu maitao sü, nainou soukhai touyu mai sünaye raiwe; raki hilo maitao sü rakinou veyu puhye raiwe. 49Eletao nou chu nainou soukhai touyu mai sünavei kheihaoyu zhu pfüyu büa, Eletao sü raki hilovei mai sünavei kheihaoyu zhu-a pfülai.
Hrishuyu Nanou Reih Kolouyu
50Athaihou jürai maitao, haisü Enou neletao hi paowe, süolouzü ke-zhenou koa Ramai Vedei hisü ve zha ngaozho louhoe, moa ha-kalou veiyu sünanou ha-kalou hoyu sünaye koa zha ngaozho louhoe.
51Zhukhaio! Enou neletao hi kheitsüli paongaowe. Eletao hrülaisü zhikhai laimoe, ana Eletao hrülaisü 52katou hinou, nghiphei alikho hinou, bekho nakaiyu na hinou datakhailai. Daiolouzü be houpayu kisü, thaimaitao sü ha-ka khailai moyuhi hrishulai, alia Eletao hrülai sü data bailai. 53Daiolouzü hakalou veiyu zhai hainasü ha-kalai moyu hi data bailai; alia thailou veiyu zhai hainasü thailai moyu hi data vuzü bailai. 54Südonou ha-kalou veiyu nanou ha-kalai moyuna bahnouyu kisü, alia thailou veiyu nanou thailai moyuna bahnou louzü, süthaisü sheeyu larübvü hinou paoyu nasü cheche-a velai: “Athainaye souhare; kolouyu hai chekhoure!”
55“O Athaiwo, nevei kolouyu hai daiki bue?
O Athaiwo, ne kei kahi bue?”
56Athaivei kei hai mah nasüe, alia mahvei khouko hai razhai baie. 57Ana Eletao Mapao Jisu Khrista vanou Eletaoye panou reih kolouyu Ramai puh hisü kalo paokhaio!
58Südonou leshiyu Athaihou jürai khemai, latoulo ea lükhaiso. Mapaowo donou vah souyu hisü kou-noulo, daiolouzü Mapaowo donou te-a vah souyu hai hakia raohamoe touyu sü neletao nou süwe.
Currently Selected:
1 KORINTHMAI 15: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.