1 KORINTHMAI 16
16
Lüloumai Thaihou-jürai Maitaoye Soukha Peiyu
1Chuo neletao nou Judea hi buyu sheeyumai taoye pousha soukha peire vanou chi nouyu süna vanou phalai. Enou Galatia hi buyu lüloumaime hi paopeiyu sübüa neletao-a souvu zülo. 2E veyuki pousha khata more donou, neletao nou Mapao vei teithetsü hisü, lah lahnou ngaolouyu süna thaifüa pousha daodaotu pokupa podzü khailouwo. 3Alia Enou veyu kisü, neletao nou ae-ao touyu mai sütaoye sü Enou zhu shingaoyu vei seiko sü peiwu-a puletaoye panou neletao vei sapeina nasü Jerusalem hi pove peire donou seitalai. 4Eye donou tare koyu bue toulouzü, süthaisü puletao nou Eye koa talai.
Paul vei Aroh
5Enou Makedonia hi taveloua neletaoye ve daolai, daiolouzü Esü Makedonia hi tavere bue, 6alia E hai neletao hi phajü ve chao-a bua malae, molouzü saikiphao vebua malae, alia süthaisü Enou tavere veihdu tali hisü neletaoye panou soukha peilai. 7Daiolouzü chu Enou neletaoye ludu chonou tave daoyu züpa moe, ana Mapaowo nou aetou peilouzü Enou neletaoye koa ve phaso buyu sü zhia bue.
8E Ephesa hai hinou Pentekos teithe koutesü chao-a bulai, 9daiolouzü buh haihisü ngaobamai alao bukhaia, Eye donou vah du-sho soulou vei phasü houpei khaitoua bue.
10Timothi hai neletao hi velou louzü, puhye sü shetoupeio, daiolouzü puhsü E büa Mapaowo donou vah souwe. 11Südonou maitalinoua puhye ngaophou moyu souwuso, anou puhvei veihdu hai kaona-a taloure donou neletao nou puhye soukhapeio, sübüa puhye panou Ahi khaivelo; daiolouzü puhnou thaihou jüraimai taoye koa khaiveyu sü Enou zhia bue.
12Eh thaihou jürai Apollos vanou louzü, Enou puhye sü thaihou jüraimai kukheye koa neletaoye tave daore donou süshoa bure, ana puhsü chu neletao hi vere rokhai mohie. Sütoukhaia puhnou teile kaozhou avei ngaolouyu kisü neletao hi velai.
Akhai Chipaotao
13Leikeilo, lü hinou latoulo, khu veilo ea khou-chilo. 14Neletao nou sou-pfüyu teitei sü leshi hinou soulo.
15Thaihou jürai maitao, Stephanas kikhamai hai Akhaia teidei hinou raikaia lou Khristamai soulouyu maitaoe ea lah puletao hai sheeyumaitao vei kuvah donou le loushoa vah souwe touyu sü chuo neletao nou süloure. 16Enou neletao hi khowe süolouzü haibüyu maitao ea puletaoye koa te-a vah souyu maitao thaisü fülo.
17Stephanas, Fortunatas ea Akhaikas puletao velouyu donou Enou lesawe, daiolouzü neletao hakhaia neletao buh hisü puletao nou tave thaoloure, 18alia puletao nou neletaoye le sousa peiyu büa Eye-a le sousa peire. Haibüyu maitaoye sütou peikhaio.
19Asia teidei hi lüloumaime taonou neletao hi khurüyu chidoh seiwe; Aquila ea Priskilla, alia puhai kinou vedzüa rathoyu lüloumaimenou Mapaowo zhih hinou sasa-a neletao hi khurüyu chidoh seiwe. 20Haihi buyu thaihou jüraimai hrülainou khurüyu chidoh seiwe.
Thaihou jüraiye leshia mümuyu zhai süna hinou alinou liye khurükhaio.
21Paul, Enou lah Abah vuzünou khurüyu chidoh haisü rüwe.
22Maitalinou Mapaoye leshi molouzü, puhsü cha ngaotheo!
Maranatha — Eh Mapao, thala-a vepeio!
23Mapao Jisu vei zhuvea neletaoye koa buyu soulouwo.
24Khrista Jisu hinou Avei leshisü neletao hrülaiye koa buyu sü souloutheo. Amen.
Currently Selected:
1 KORINTHMAI 16: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.