2 KORINTHMAI 1
1
Zhu shingaoyu
1Ramai leli hinou Khrista Jisu vei sei-atamai ali soulouyu Paul, alia Eletao thaihou jürai Timothi hinou—
Korinth hi buyu Ramai vei lüloumaime hi, alia Akhaia teidei teitei hi buyu sheeyumai hrülai hi rüwe:
2Eletao Puo Ramai ea Mapao Jisu Khrista nou neletao hi zhuvea ea kaonayu peiyu sü souloutheo.
Paul nou Ramai hi Kalo Paoyu
3Eletao Mapao Jisu Khrista vei Ramai ea Puo, zhuvea peilousü Puo ea ha teitei hinou le souva peiyu Ramai puhye sü Eletao nou kalo paolaikhe! 4Lah Eletaoye Ramai nou le souva peikhai touyu vayu sünanou Eletao nou kukhe veahoyu tyatyali buyu puletaoye le souva peiloure donou puhnou Eletaoye Eletao vei veahoyu teitei hisü le souva peire. 5Daiolouzü Eletao nou Khrista vei veahoyu hisü koa zha alaosou ngaozhoyu sübüa, Khrista vanou Eletao nou Ramai vei souva peiyu hia koa lou zha alaosou ngaozho loure. 6Ehye souvea louzü, süsü neletaoye souva peire alia khailu peiloure donoue; alia Ehye souva peilouzü, süthaisü neletaoye-a souva peire ea Ehnou shamea louyu veahoyu sübüyu veahoyu nasü neletao nou shamea loure donou neletao hi khouko peire. 7Südonou Ehnou nele hinou rei-a buyu sü hakia khaitamoe; daiolouzü neletao nou Eh veahoyu hi koa lou zha ngaozhoyu sübüa, Ehnou vayu hia neletao nou koa lou zha ngaozholai touyu sü Ehnou süwe.
8Daiolouzü, thaihou jürai maitaore, Ehnou Asia teidei hinou daoyu veahoyu sünasü panou neletaoye lipulou nüwe. Eh pei hi kou pokhai peiyu süsü duzhule ea süzhuleyu vanou Ehsü hria bushulai hie tea halia chokhai more. 9Chechenou, panou thaire donou Eh pei hi chikuchere tea Ehnou choe. Ana haisü Eletao nou lah Eletaoye moa thaimaiye souhrishu peiyu Ramaiye likhei lüloure donou paloure. 10Haibüyu ngaopi shoyu athai vei rakoshi hinou puhnou Eletaoye khaipapeie, alia Eletaoye khailu peilai; alia puhnou Eletaoye khailu pupei khailai tea Ehnou puh hinou rei-a bue, 11neletao noua Ehye donou veachi paopeia koa soukhapei vuzükhaio. Südonou Ehye donou veachi alaosou paokha peiyu süsü Ramai nou noupeilai, alia Ehye sü hapeilai; alia mai alaonou Ehye donou puh hi kalo pao-a puletao paisü shapalai.
Paul vei Aroh Datayu
12Ehnou khaophu souyu qowo louzü, Ehnou deiphao hinou hrüa buyu haina hai, koulih soua Ehnou neleye koa sa-pa soua hrüyu hai Ramai hinou leishoa ea sheetoua, deiphao vei tsü hinou moa Ramai vei zhuvea khouko vei khakhe hinou hrübaie touyu sü Ehvei lekhetsü nanou zhopaoh souwe. 13Daiolouzü Ehnou nelehi nelenou phoulou süyu ea sülou süyu likhei rübaie. Ana chu nelenou Ehye zha alikhei süpeibai khaia, 14Eletao Mapao Jisu vei Teithe kisü Ehnou nele vanou khaophu souyu büa nele-a Eh vanou khaophu souloure donou, nelenou Ehye soutaosoua süpei shulai tea Enou rei-a bue.
15Enou hai teitei sü sütouwe süolouzü neleye panou zha ahai koua rakovei ngaoloure donou raikaia Enou neletaoye ve zhure donou soudae. 16Daiolouzü Makedonia hi tare veihdu hinou Enou neletaoye tave zhunüwe, alia neletaoye panou Eye Judea hi tare veihdu hi soukha peire donou Makedonia hinou khaiveyu kia neletaoye tave zhunüwe. 17Haisü Enou soulai tea cholouyu kisü, Esü latoulou moa buwu? Enou lüh ali hinou, “Ae, Ae,” alia “Moe, Moe” tea pao-a vasou thaifüa Enou souda-a vah souwu? 18Ana Ramai hai chechevuzü baiyu donou, Ehnou nelehi paoyu chipaosü “Ae” alia “Moe” toumoe. 19Daiolouzü Sailas, Timothi ea Enou neletao hrohinou paodouyu Ramainah Poutu Jisu Khrista hai “Ae” alia “Moe” touyuna moe, ana kuvou-a puhwo Ramai vei “Ae” touyu nasüe; 20daiolouzü Ramai vei apaopeiyu teitei hai puh hinou Ae-Ao touyu sü ngaoloue. Südonou Ramai kathe souloure donou Ehnou Jisu Khrista vanou “Amen” tea paowe. 21Ana neleye koa Ehye Khrista hinou soutsü peiyu ea Ehye seitapeiyu haisü Ramai nou baie. 22Puhnou puhvei paoshee hai Eletao pei hi noupeiwure ea puh rakosü Eletao lethounou panou lapeiyupao soua bure donou Eletao hi peiwure.
23Azhopaohmai soure donou Enou Ramaiye kuwe; puhnou Ale süwe süolouzü Enou Korinth hi takhai laimoe tea le layu hai neletao le souvea nümoyu donoue. 24Haisü Ehnou neletao vei lü pei hi paopu sounüyu donou moe; neletao lesare donou Ehnou neleye koa vah soubaie, daiolouzü neletao hai neletao vei lü hinou latoua bure touyu sü Ehnou süwe.
Currently Selected:
2 KORINTHMAI 1: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.