2 KORINTHMAI 2
2
1Daiolouzü neletao le souvea pumore donou Enou neletaoye tave zhupu khailai more tea Ale laloure. 2Daiolouzü Enou neletaoye le souveawu louzü, Enou le souveayu neletao baimoa Eye le sousa peiremai thaoh buwe? 3E veyu kisü Ale sousa peire maitao nou Ale souvea more donou seiko sünasü Enou rüe. Daiolouzü Enou lesayu kisü neletao hrülai-a koa lesawe touyu sü Enou sütouwe. 4Daiolouzü Enou veahoshoa ea lepe-a, alia nghidzü alaosou koua neletao hi rüwe. Enou rüyu hai neletaoye le souveare donou moe ana daizhozhou Enou neletaoye leshisa touyu sü panou neletaoye süloure donou rübaie.
Mahyu Maiye Khaipeiyu
5Chuo maitalinou kamaiye le souveawu louzü, puhnou süsü Ahi soupeimoe, ana Enou süvanou tateishoa mai süna pei hi chi paomokhaia, zha taoli hinou neletao hrülaiye daikhaire. 6Maisounou koa haibüyumai pei hi motouyu sünanou puh pei hi tudee peiyu sü khare. 7Sütoukhaia chuo neletao nou puhye sü khaipeilai ea le souva peilai, molouzü puhsü le veayuleloua ha teitei hinou shita shulai. 8Alia sübüa neletao nou puhye leshi chechewe touyu sü panou puhye sülo tea Enou neletao hi khowe. 9Daiolouzü ha teitei hinou neletao sü paoyu züzü mosa touyu zhai zhuloua süloure donou Enou seiko sünasü rüe. 10Neletao nou mah khaipeiyu maitaliye sü E-a khaipeire. Enou hatali khaipeire toulouzü süsü neletaoye donou Khrista nghojünou khaipeire, 11molouzü Saitan nou Eletaoye koloure zhou avei ngaolou shulai; daiolouzü Eletao nou Saitan vei do hai süwe.
Troa hinou Paul nou Leveayu
12Enou Khrista vei Ko Aveina paodoure donou Troa hi velouyu kisü, Mapaowo donou sühinou vah souloure kikhu houpei khaitouyu sü Enou ve ngaoloue. 13Ana Eh thaihou jürai Titaye sühinou daomoyu donou Alesü kaonayu ngaokhai more. Südonou sühi bumaitao hi tarayu chi paowu-a Esü Makedonia hi veta baire.
Khrista vanou Kolouyu
14Ana Ramaiye kalo paowe! Daiolouzü Khristaye koa ali soulouyu hinou Ramai nou Eletaoye sü teisanou kolouyu hi süthai salaipeie, alia Eletao vanou Khristaye sülouyu tsü navei kai nüvei nasü buh likihi panou vurao tawe. 15Daiolouzü Eletaowo khailuloua buyutao ea haka-a buyutao hrohinou Khrista nou Ramai hi popeiwuyu nüveiyu kai süna büwe. 16Ha-katayu maitao donou haisü southea loure thailou vei kai nasüe; ana khailuloua buyu maitao donou haisü ahri pove peiyu kai nüvei nasüe, ana haibüyu vah haisü thaohnou soulousüe? 17Eletaowo Ramai chipao souzhoyu kukhemai taoli sütao bümoe; ana Ramai nou Ehye süpeiyu donou puh nghojünou Khrista vei kilaitao büa Ehnou le loushoa chi paowe.
Currently Selected:
2 KORINTHMAI 2: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.