2 KORINTHMAI 3
3
Vo Ashu vei Kilaitao
1Ehsü lah Eh vanou kathe paopu tarewu? Moa kukhe kamaitao kua Ehnou aetou peiyu larü neletao hi peire moa neletao hinou poloure moshilaiyu buwu? 2Lah neletao hai mai hrülaiye panou süloure ea phouloure donou Eh lethou hi rüthoukhai touyu Ehvei aetou peiyu seikoe; 3haisü sheetoue süolouzü Khrista lahnou seiko hainasü rüloua panou Ehyenou seitae. Seiko hainasü larüdzünou moa hriyu Ramai Rakonou koa rükhaitoue, alia chuhkhaotao vahi moa emai lethou vahi rükhaitoue.
4Khrista vanou Ramai hilosü Ehvei haibüyu lü bue. 5Vah haina hai Ehnou soulousüe tea Ehnou halia paolou hoe. Ehnou soulou süyu khouko hai Ramai hinou vebaie; 6puhnou Eletao hi Vo Ashu naye kuvah souloure khouko sü peie. Vo Ashu hainasü bahnou rüyu razhaina moe ana rako veie. Bahnou rüyu razhai nanou athai povewe, ana rakonou souhri peie.
7Razhaina sü chuhkhao vahi chahnou daothoue, alia süna peiyu kisü Ramai vei khouko ava-a koa ve ngaopeie. Moses zhu hi varuyu nasü khailoukhaia, sünasü chihleloua maikhe mainou puh zhusü zhupailou hore. Athai poveyu razhai nanou vah soubuki sübüyu khouko avanou koa velouzü, 8Rako vei vah souyu hisü daizhozhou khouko ava sü dukoushoa bulai? 9Daiolouzü athai poveyu kuvah nahi khouko ava hai bulouzü; daizhozhou koua khailu peiyu poveyu kuvahna hisü khouko ava bulai! 10Chechenou chu Vo Ashuna vei vakou shoyu khouko ava süna vanou raiki vashoyu khouko ava sünasü hatare. 11Daiolouzü phajü donou baiyu sühi khouko ava bulouzü, daizhozhou koushoa teisa bulaiyu süna hisü khouko ava bulaisa!
12Eletao hi areih haina buyu donou, Ehsü khu veishoa bue. 13Ehwo Israel maitaoye panou khouko ava hatayu akhai nasü ngaolou more donou puh pah hi pah-hosah pohoyu Moses bümoe. 14Chechenou puletao tsü sü petei tare; alia zhou koute-a puletao nou Vo Araina sü phoua bukhaia puletao tsü sü raiki pah-hosah sünanou hoteipoa bue. Mai alinou Khristaye koa ali soulouyu hinou likhei pah-hosah nasü hapa loulai. 15Zhou koute-a puletao nou Moses vei Razhai phoua busasü, puletao tsü hai pah-hosah nanou hopoa bue. 16Ana Moses vanou sheeyu larübvü nou paoyu büa pah-hosah süsü hapalou süe, süolouzü: “Puhnou Mapaowo hi reiveyu kisü, puhvei pah-hosah nasü halaire.” 17Chuo Mapaowo sü Rakoe, alia Mapaowo vei Rakonou buyu buh sühisü mado soupeiyu bue. 18Südonou Eletao hrülaisü pah homoa Mapao vei khouko ava nasü ngao-a bue; alia Rako baiyu Mapaowo hinou veyu khouko ava sünanou Eletaoye sü dukoulailaiyu khouko ava nahi puh zhu kheihao-a soudathou peire.
Currently Selected:
2 KORINTHMAI 3: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.