2 KORINTHMAI 4
4
Le sheetoua Kuvah Souyu
1Südonou Ramai nou puhvei zhuvea hinou kuvah hainasü souloure donou Eletao hi peikhaitoue, südonou Ehnou lekhaiyu soumoe. 2Ehnou kheikhei souyu ea ahraoyu vah teitei thaowure; Ehnou mada-a vah soumoe, moa Ehnou Ramai chipao sü mah-a doupei moe. Acheche vei dukhyayu ava hinou Ehsü Ramai nghojünou hrüwe ea lah Ehye mai hrülai vei veishoyu lekhe tsühi thoupeire donou Ehnou tewe. 3Daiolouzü Ehnou paodouyu chipao avei hainasü kukhaire toulouzü, haisü hakalaiyu puletao nghojühi likheithe kukhaibaie, 4Puletao nou louche moe, daiolouzü deiphao haina vei rashi nanou puletao tsüsü teizhi hinou bengi khaire. Puhnou puletaoye sü Ramai zhu raitouyu Khrista vei khouko ava vei Ko Aveina hinou veyu ava sünaye ngaolou more donou pokhaire. 5Daiolouzü Ehnou lah Eh vanou paodoumoe, ana Ehnou Jisu Khristaye nou Mapaowo süe tea paodoue, alia lah Ehye nou Jisu vanou neletao kilaitao tea paowe. 6Khrista vei zhu hinou va-a buyu Ramai vei khouko ava navei tsü nasü Eletao hi pove peire donou, “Teizhi hisü ava nanou valoutheo,” tea paoyu Ramai puhsü Eletao lekhehi puhvei avanou vapeiyu Ramai puh baie.
7Sütoukhaia veikou shoyu khouko haina sü Ramai hinou vebaie, Eletao hinou vemoe touyu sü pongao peire donou rako vei kini haina Eletao sü nai leetao bübaie. 8Ha teitei hinou Ehye sü souvea peie, anou souphe-soukho moe; Ehye southou boha peie ana hakia le pemoe; 9Ehye sü souvea souhopeie, anou Ehye hakia samai ha-a thaopeimoe; Ehye dakhao peie ana souhawumoe; 10Jisu vei ahri hai Eletao vei Pfüphao hinou panou ngaoloure donou teisanou Jisu vei athaihai Eletao vei pfüphao hinou pfüa bue. 11Daiolouzü Jisu vei ahri sü Eletao vei thailou veiyu vasou hinou ngaoloure donou Eh hrümai sü teisanou Jisu ye donou thailou vei rakoshi hi thoupeiwu-a bue. 12Südonou athainou Eh hinou vah soua bue, anou ahrina nou neleye koa vah soua bue.
13Sheeyu larübvü nou paoe, “Enou chi paowe daiolouzü Enou louche-e.” Haibüyu lüvei rako hinou Eh-a chi paowe daiolouzü Ehnou louchewe. 14Ehnou süwe süolouzü Mapao Jisu ye souhrishu peiyu Ramai puhnou Jisu ye koa Eletaoye-a souhrishu peilai ea Ehye neleye koa puh nghojühi save peilai. 15Haitao pfüphou hai neleye donou baie; alia Ramai zhuvea nou maikhe mai hi poulailaia velouyu kisü, maikhe mainou Ramai kathe souloure donou kalo paoyu vei veachi nasü koushoa paotalai.
Lü vanou Hriyu
16Südonou Ehnou hakia le khaitayu soukhaimoe. Eletao vei vakouhi buyu mai haina hai shoshonou raitakhaia, khele hi buyu mainawo louzü teithetsünou nalelailai tawe. 17Daiolouzü teile phajüvei daotu veahoyu hainanou Eletaoye donou veahoyu haina jünou dukou shoyu paosha louhoyu veiveilai teisavei khouko ava nasü souda peiwe. 18Daiolouzü Ehnou ngao-a buyu natao vahi zhu-a bumoe; anou ngaomoyu nataoye zhua buwe; daiolouzü ngao-a buyu nataowo teile phajü donou baie; ana ngaomoyu nataowo teisa bulai.
Currently Selected:
2 KORINTHMAI 4: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.