1 KORINTHMAI 7
7
Sheenghiyu vei Zütao
1Chuo neletao nou rüveyu chi sütao vanou phalai. Mai aliye donou shee moyu nanou veie. 2Ana khulou vah souloure athao buyu donou poutumai hrülainou lah lahvei chapfü sü buloukhaio, alia naotumai hrülainou lah lahvei chaa sü buloukhaio. 3Mai alinou chaa ali soua puhnou soure vah nasü souvete loulai, alia naotumai alinou chapfü ali soua puhnou soure vah nasü souvete loulai, alia sübüa puhai alinou li rukha sü soupeilai. 4Chapfü hai puh lah puh pfüphao vei paopu moe, ana puh chaanoue; sübütoua chaa hai puh lah puh pfüphao vei paopu moe, ana puh chapfünoue. 5Lah nelenou leipua veachi paore donou teile phajütou alinou li hinou raloure ae-ao touyu sü likhei baimoa alinou liye bayu ali-a souso; ana süthaisü khailou kilo souyu hrüna hisü hrüloukhaio, molouzü lah pfüphaoye tukhalou hoyu vanou neletaoye Saitannou thaowu shulai.
6Haisü kharochi ali büa Enou neletao hi paomoe ana souloua bailai tea Enou paobaie. 7Chekhaoyuwo louzü neletao hrülai hai E büa buyu sü Enou züpawe; ana mai hrülainou lah lahvei takushoyu sapeina, alinou tya ali hinou ea kukhe alinou tya kukhe ali hinou Ramai hinou ngaoloure.
8Chuo Enou kilo soumoyu ea meamaipfü taohi paowe süolouzü neletaoye donou E büa lia buyu sünanou veikouhie. 9Ana neletao nou lah neletao vei züpa nasü tukhalou holouzü, sheenghi louwo. Daiolouzü züpa nou choroa buyu jünou sheenghiyu nanou veikouhie.
Sheenghiyu hi Soure Vahtao
10Sheenghiyu maitao hi Enou chikha peiwe, süsü Enou moe ana Mapaowo nou peiwe, süolouzü chapfü alinou puh chaa hinou rata laimoe; 11ana puhnou soure toulouzü, puhsü mi-a bubailai molouzü puh chaa hi khaive zholoulai; alia chaa alinou puh chapfüye rawu laimoe.
12Kukhe taohi Enou paowe (haisü Enou paobaie, Mapao nou moe); süolouzü thaihou jüraimai tali vei lü louche moyu chapfü bue toulouzü ea puhnou puh chaaye koa buyu aetouwe toulouzü, puhnou puhye sü phawulaimoe. 13Alia naotumai tali vei lü louche moyu chaa bue toulouzü ea puhnou puh chapfüye koa buyu aetouwe toulouzü, puhnou puh hinou ratawu laimoe. 14Daiolouzü lü louche moyu chaa sünaye sü puhvei chapfü vanou soushee peire, alia lü louche moyu chapfü sünaye sü puhvei chaa vanou soushee peire. More toulouzü puhai vei nahmaitao sü sheelaimoe, ana sübüa souloure toulouzü, puletao sü sheeloure. 15Sütoukhaia lü louche moyu sünanou rayu züpawe toulouzü; puhye panou süsü souloutheo. Haikuyu paitya hisü, thaihou jürai, chaa moa chapfü taliye nuyu hae. Daiolouzü Ramai nou Eletaoye panou kaona-a buloure donou kuloure. 16Oh naotupai, nenou ne chaaye khailu loulai, khailulou laimoe touyu sü kakua süe? Oh poutupu, nenou ne chapfüye khailu loulai, khailulou laimoe touyu sü kakua süe?
Ramai nou Kulouyu Süna hinou Hrülo
17Ana mai hrülainou Mapaowo nou puh hi zhihpei khaitouyu ea kupei khaitouyu süna thaifüa hrülo. Haisü Enou lüloumaime pfüphou hi doupeiyu zhai nasüe. 18Hee rodeyu mailiye Ramai nou kulouwu? Puhnou hee rodeyu shee nasü souhare donou tewuso; hee rode moyu mailiye Ramai nou kulouwu? Puhnou hee rodere donou tewuso. 19Daiolouzü mai alihai hee rodeyu, rode moyu sünanou soukuyu halia hae, ana soukure louzü Ramai vei chikha züyu sünasüe. 20Mai hrülainou lah lahye kulouyu hrü süna hinou hrüa bulou khaio. 21Neye kilai ali soua buyu hinou kulouwu? Süvanou le veawuso. Ana nenou do souloure kao-zhou avei bue toulouzü, teile süsü soutaosoua seitoulo. 22Daiolouzü kilai ali soua Mapao nou kulouyu puhsü Mapao vei do soulouyu mai baie, süzhaibüa do soua buyu hinou kulouyu puhsü Khrista vei kilaibaie. 23Ramai nou neletaoye muhnou hrüloure; südonou emai kilai soudata khaiso. 24Athaihou jürai maitao, neletao ali linou neletaoye kulouyuki hrüa buyu hrü süna hinou Ramaiye koa bulo.
Sheenghi moyu ea Meamaipfütao vanou Doupeiyu
25Chuo neletao nou sheenghi moyu maitao vanou chi nouyu süna vanou Enou Mapaowo hinou chikha ngaolou moe, ana Mapao vei zhuveana vanou louchelou veiyu mai ali kua Enou Avei lelisü paowe.
26Chu teilehi veahoyu haina sü licholoua mai ali donou puhnou hrüa buyu sübüa bubaiyu sünanou veikouhie tea Enou chowe. 27Newo chapfü burewu? Sükulouzü puhye phare donou teso. Newo sheemohiwu? Sükulouzü sheere donou chapfü phouso. 28Ana nenou sheelouzü, newo mah soumoe; alia loumaina alinou nghilouzü puhsü mah soumoe. Ana sheenghiyu maitao sü deiphao hi vei veahoyu daolai, alia Enou neletaoye panou sühinou palou nüwe.
29Athaihou jürai maitao, Enou paoyu kowo louzü haire: apaokhaitouyu teile nasü jüsho loure, chu shonou chapfü buyu maitao nou hayu büa hrülouwo; 30alia krayu maitao nou kramoyu büa, alia sayu maitao nou samoyu büa, alia na hüyu maitao nou halia hayu büa, 31alia deiphao hi natao vanou tsü loushoa bah deiyu maitao nou halia chokhai moyu büa bulo. Daiolouzü chu deiphao haina zhaisü thashoa talaire.
32Neletao nou le choroa buyu sü Enou züpa moe. Sheemoyu mai sünanou Mapao vei kuvah donou, kabüa Mapaowoye le sousa laisa tea tewe. 33Ana sheelouyu mai sünanou deiphao vei vahtao donou, kabüa puh chapfü le sousa laisa tea tsüchowe; 34alia sübüa puhvei lenou nasü ahai soua zhire. Nghimoyu naotupai moa loumaina puhnou lah puhvei Mapaowo kuvah donou kabüa pfüphao-a rako-a sheetoua bulai tea tsü chowe; ana nghitayu naotupai sünanou, kabüa puh chaa le sousa loulai tea choa deiphao vei hrümai vanou doa bue.
35Enou chi haisü neletaoye soukha nüyu vanou paowe, neletaoye panou sheenghi khailaimoe tea numoe. Ana Enou neletaoye panou kao-züyu nasü sounüwe, alia lah neletao hrümai teitei hai panou tsü vakukhaimoa Mapaowo kuvah souyu sü Enou züpae.
36Maitalinou puhnou noutokhai touyu naotupai hisü zhai kaomoa tare toulouzü ea puhvei kezhe züpa hai dushoa buloure toulouzü ea puhai sü sheenghi molouzü shire tea puhnou cholouzü, süthaisü puhnou liyubüa puhaiye panou sheenghi loukhaio. Sühisü mah hae. 37Ana maitalinou nutaiyu hinou moa puh lekhe hinou sheelaimoe tea latou loure toulouzü, alia puh leli hai tukhatsüa khaiwua puhnou nouto khaitouyu paiye sü panou lou-a bubailai tea puh le hinou laloure toulouzü, süsü veishoe. 38Südonou puhnou noutokhai touyu loumaina sünaye nalouyu puhsü veia souloue, ana sheemoa buyu puhnou veikoua souloue.
39Chapfü ali hai puh chaanou hrisasü puh hi phukhaitoua bue; ana puh chaa hai thaire toulouzü, süthaisü puhsü puh züpamai ali kihi nghive-a bailai, ana mai sünasü Khristamai ali souvu zülai. 40Ana Avei chikuyuwo louzü, puhnou nghipu khaimoa bulouzü puhye donou vapu bailai. Alia Enou paoyu haisü Ramai vei Rakonou kozhopeia paoe tea Enou chowe.
Currently Selected:
1 KORINTHMAI 7: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.