2 KORINTHMAI 10
10
Paul nou Puhvei Kuvah vanou Du-a Chi paoyu
1Neletaoye koa bubuki sü nataiyu, ana koa bukhaimoa doutakhaie khuvei shoyu Paul, lah Enou Khrista vei nataiyu ea kaonayu hinou neletao hi khowe! 2E velouzü Eye panou poushia chi paoloure donou nutsü peiso tea Enou neletao hi khowe; daiolouzü Eh hai deiphao vei tsüdo hinou vah soubaie tea paoyu puletaoye sü Enou khuveia dulou süe tea louchewe. 3Daiolouzü Ehsü deiphao hinou hrükhaia, Ehsü deiphao vei zhaido hinou reih soumoe. 4Ehnou reih züyuki seiyu baseitao sü deiphao vei basei moe, ana chihyu reihmaibuh taoye souhare donou Ehnou seiyu süolouzü khouko buyu Ramai vei baseitaoe. 5Madayu chi veivayutao ea Ramai tsüye ngaoraia khuyu khaophu souyu tsü teiteiye Ehnou souphe-soukhowe; Ehnou tsü teiteisü nibewu-a panou Khrista chi züwe. 6Alia neletao vei paoyu züyu sü chekhoure toulouzü, Ehnou paoyu zümoyu teiteiye tudeire donou souda-a bue.
7Neletaowo vakounou buyu nataoyenou zhuwe. Mai kamainou puh hai Khrista hi bue tea louche-a bulouzü, puhye panou puhnou Khrista hi buyu büa Eh-a bue tea liloukhaio. 8Daiolouzü Mapao nou Eh hi neletaoye souhare donou moa soudupa peire donou peikhai touyu khouko vanou khaophu soule phoukhaia Ewo ahraomoe. 9Avei seikotaonou neletaoye soupiyu büa panou cholou more donou haisü Enou paowe. 10Daiolouzü puletao kamainou paoe, “Puhvei seikotao hai chi süshowe ea chi souwe, anou puh pfüzhonou Ehye koa bubu kisü, puhsü lelouhoe ea puh chipaosü raohabaie.” 11Sübüyu maitao nou süloukhaio süolouzü Ehnou habuki Ehvei seiko hinou rüyu sünasü Ehnou neletao hi buyuki soulaiyu süjünou halia takuyu hae.
12Daiolouzü lahye paoshoyu puletaoye koa Ehnou me souku paloure moa poda-a zhuloure khuhae. Ana puletao nou lah puletao vei tsünou linou liye podouyu kisü ea puletao lahnou linou liye poda-a zhuyu kisü, puletaosü daizhozhou vosa! 13Ana Ehwo khaophu soulah laimoe, anou süsü Ramai nou Eh hi vah soure khadapei khaitouyu sühinou bubailai, alia khadapei khaitouyu süsü neletao hrohinou Ehnou vah soure süna-a louwe. 14Daiolouzü Ehnou nelehi vemoyu büa Ehnou Ehvei khaophu sü soulawu laimoe; daiolouzü Khrista vei Ko Avei naye koa nelehi veyu hai Ehnou raikai baie. 15Khada peikhai touyu jünou koua Ehnou lou kukhemai vei kuvah hinou khaophu soumoe; ana Ehnou rei-a buyu sünawo louzü, neletao vei lü pukheyu sünaye koa Ramai nou khada peiyu süna hinou Ehnou neletao hronou dukoushoa lou kuvah souloure sünasüe. 16Süthaisü Ehnou Ko Avei nasü nele jünou doua buyu teidei kukhetaohi paodouta lousüe ea mai kukhenou soucheyu kuvah buh sünavei vah donou khaophu soukhai laimoe.
17Ana sheeyu larübvü nou paoyu büa, “Maitalinou khaophu sounü louzü, puhye panou Mapaowo nou soucheyu süna vanou panou khaophu souloukhaio.” 18Daiolouzü maitalinou lah puhye paoshoyu hinou moa Mapaowo nou paosho peiyu mai sünaye nou ae-ao tea popeire.
Currently Selected:
2 KORINTHMAI 10: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.