2 KORINTHMAI 11
11
Paul ea Madayu Sei-atamaitao
1Enou voyumaili büa chi paokhaia, neletao nou Eye koa shamea peishulai tea Enou rei-a bue. Leshinou Eye koa shamea peikhaio! 2Ramai nou doyu sübüa Enou neletao phao doshoa bue; daiolouzü nghirepai sheetouyu loumaina aliye puhvei chaahi peilaiyu büa, Enou neletaoye Khrista ki noutore. 3Ana nghou nanou puhvei doshinou Efye lawuyu büa, neletao vei tsühai Khrista hi latoua buyu ea sheetoua thoa buyu hinou sümawu peire sü Enou piwe. 4Daiolouzü Ehnou paodou moyu kukhe Jisu li vanou paodoua neletao hi veyu maitaliye sü neletao nou koa sashoa shamea peiwe. Alia Eh hinou Rako ea chipao avei ngaolouyu süna jünou kuvouyu rako ea chipao aveinaye sü neletao nou popeie!
5Neletao vei, “Veishoyu Sei-atamaitao,” tea kuyu puletao jünou Ehai tai-nou kouhie tea Enou halia chomoe! 6Enou chi-la hinou paolou sümoa bua malae, ana tsühiwo louzü sütou khaimoe; haisü teisanou Ehnou neletao hi ha teitei hinou paosheesha peire.
7Enou Ramai vei Ko Aveina neletao hi paodou peiyuki, ha muhlia Enou neletao hinou pomoe; neletaoye soudu peiloure donou Enou lah Eye sü sounaloue. Süsü Enou soumah rewu? 8Enou neletao hrohinou vah soubu kisü, Eye sü lüloumaime kukhenou zhopeia soukhapeie. Paolai toulouzü neletaoye soukhare donou Enou puletao hinou saoloue. 9Alia Enou neletaoye koa bubukihi thou-sha moshilaiyu kisü, Enou neletaoye panou Eye soukha peire donou hakia souvea khaimoe; Makedonia hinou veyu thaihou jürai maitao nou Enou moshilaiyu teiteisü povepeie. Raiki büa, thaikhai hia Enou neletaoye souveakhai laimoe! 10Khrista vei acheche nasü Ahi buyu donou, Avei khaophu souyu hainasü Akhaia teidei buh talikia panou paikhaimoa buyu soulaimoe tea Enou le laloure. 11Haisü Enou neletaoye leshi moyu donou paowu? Enou neletaoye leshiyu Ramai nou süwe!
12Kukhe “Sei-atamaitaoye” panou khaophu souloure qo alia phouha loure donou ea Ehnou vah souyu büa puletao-a souwe tea panou paolou more donou, chu Enou souyu süsü Enou thaokhaimoa soulai. 13Daiolouzü mai sütaosü checheyu sei-atamai moe, puletao hai puletao vah vanou madayu ea Khrista vei checheyu Sei-atamai khaokhao soua laiyu madayu sei-atamaitao baie. 14Alia sühisü khupa loure hae! Saitan puhlah koutenoua ava vei rakivamai zhu raia soudalou süe! 15Südonou puhvei kilaitaonou acheche vei kilaitao khaokhao soua talouzü sühisü ha sütholia hae. Akhaiki sü puletao nou puletao vei vah nanou ngaozüyuna thaifüa ngaolai.
Paul nou Sei-atamai Alisoua Veahoyu
16Enou paopukhaiwe: maitalinoua Eye avomai tea chopeiwuso. Ana neletao nou chopei louzü, Eye panou khaophu daotu souloure donou, Eye avomai tea popeio. 17Ovai, chu Enou paoyu hainasü Mapaowo vei leli thaifüa paomoe; khaophu souyu vah haina hisü, Esü chekhaoa voyumai alibüa chipaowe. 18Mai alaonou vasou thaifüa kathe chi paoyu donou, E-a kathe chi paolai. 19Daiolouzü lah neletao sü tsü veishoyu donou, neletao nou sasa-a voyumaiye koa shamea peiwe! 20Daiolouzü maitalinou neletaoye puhvei qila souyu kisü, moa neleye nitou louzü, moa nele vanou kao avei phoulouyu kisü moa lah khaophu soulouzü, moa neleye pahnou phapeiyu kisü, neletao nou sütaosü koa shamea peiwe. 21Vah sübüyutao soure donou Ehsü khu hayulere tea Enou ahraoa paopawe!
Ana maitalinou hatali vanou khuvei-a khaophu soulousüe toulouzü, E-a sübüa khuvei-a khaophu soulou süe tea Enou voyumai büa chi paowe. 22Puletao sü Ebria maiwu? E-a sübaie. Puletao sü Israelmaiwu? E-a sübaie. Puletao sü Abraham tyaonah maitaowu? E-a sübaie. 23Puletao sü Khrista vei kilaiwu? Enou voyumai büa chi paowe—ana puletao jünou Enou kilaivei nahie! Enou kou-noua vahsou kouhie, Enou hukhahi loukouhie, Eye südanou dakouhie, alia Enou thainonoyu daokhai daokhaihie. 24Jihudi mainou süda shiroukü lüh angou koute dapeie; 25Rom mainou Eye lüh asü südanou dapeie; alia lühli chuhnou deipeie. Lüh asü Esü dzüluki pepoyu daoe, alia lüh ali hisü Esü dzü hinou teilecho kaidai bue. 26Aveihdu taoli hisü dzüdu hinou, maivei saotoumai bah hinou, lah Amaitao hinou ea tahrüh kukhemai hinou rakoshi daoe; nuhdutao hinou, rekounou, zai hinou ea madayu thaihou jüraimai hinou rakoshi daoe. 27Te-a vah sou-a ea veaho-a hrüe; lüh taoli zhai he-a bue; Esü lüh taoli rei-dzüyu, alia touso, baiyubuh ea sabanüh hayu daoe. 28Alia veahoyu kukhetao vanou paomokhaia, Esü lüloumaime pfüphou donou teisanou do-a bue. 29Mai kamainou lelouhoyu kisü, E-a koa lelouho-a bue; mai kamaiye mah hi süthouyu kisü, Esü leveashoa bue.
30Enou khaophu souvu zülai toulouzü, Ehai daizhozhou lelouhoe touyu pongaoyuna sütao vanou khaophu soulai. 31Teisanou paoshoa bulaiyu Eletao Mapao Jisu Khrista Puo ea Ramai puhnou Ehai madamoe touyu sü süwe. 32Enou Damaska hi bubu kisü, Aretas veo khehinou buyu teideikhowo nou Eye niloure donou nuhdu vei romütao hisü reihmaiye panou khoa bue. 33Ana nuhdu bouvou hi kulu ali hinou Eye ro hinou deiphi hi phakouwu-a panou puh bah hinou tupa loure.
Currently Selected:
2 KORINTHMAI 11: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.