2 KORINTHMAI 12
12
Paul vei Zho ea Puhye Ngaopeiyu
1Veiloure ali-a hakhaia, Enou khaophu souvu zülai. Ana chuo Mapao nou Ahi peikhai touyu zhotao ea ngaopeiyutao vanou Enou chi paotalai. 2Khrista hinou buyu mai aliye po kiadai jühinou raki asü chenahi pohah kheyu sü Enou süwe (pfüphao noupu pokheho pfüphao loumosa Ewo sümoe, Ramai likhei nou süwe), 3Enou paopuwe, mai hainaye shofühi pohah khere (Pfüphao noupu pokheho pfüphao loumosa Ewo sümoe, Ramai likhei nou süwe), 4alia sühinou puhnou emai chipaonou paopalou hoyu ea emai malinou paolou shiyu chipaotao sü choue. 5Südonou mai haina vanou Enou khaophu soulai, ana Ehai daizhozhou lelou hosa touyu pongaoyuna sütao vanou baimoa nou, Enou lah Avanou khaophu soulaimoe. 6Enou khaophu souyu züpa louzü, Esü voyumai laimoe, daiolouzü Esü cheche chi paobailai. Ana Enou khaophu soulaimoe, daiolouzü maitaliye panou puhnou Ahinou ngaoyu ea Ahinou chouyu süna jünou koua Eye chopeiyu sü Enou züpa moe.
7Ana Enou khupa tyali ngaoyu sütao vanou Eye panou khaophu soua baotaitai-a talou more donou Avasou hisü shu büa khüyu sou ali peire, sünanou Saitan vei vahlaimai büa Eye dapeire ea panou khaophu soulou more donou vah souloure. 8Süna vanou Enou Mapaowo hinou lüh asü veachi paoe ea süna pota peire donou puh hinou khoe. 9Ana puhnou Ahi paopeie, “Avei zhuvea nou neye donou khrabaie, daiolouzü nenou lelouhoa buyu hinou Avei khouko hai khoushoa bue.” Khrista vei khouko hai Apei hi buloure donou Avei lelou hoyu hisü Enou koulihsou lesa-a khaophu soupulai. 10Südonou Khristaye donou lelou hoyu hia, sou ahrao peiyu hia, touso raiyu hia, souvea peiyu hia, alia kaozhou ashi hia Esü lesa-a bue. Daiolouzü Enou lelou hoyu pha hinou, Esü khouwe.
Paul nou Korinthmai donou Tsücho Peiyu
11Ehai voyumai büloure! Neletao nou nutailoua süsü panou Eye soue. Eye ae-ao toupeiyu pongao peiresü neletao nou souzüe. Daiolouzü Ehai hazholia mokhaia, Esü neletao vei “Veiveilai sei-atamai” puletao jünou khaia lelou hoyu soumoe. 12Shameayu alao noupu sheetaonou, khupa tyali ea mainou souloho vahtaonou koa Ehai checheyu sei-atamai alie touyu vei sheetao hai neletao hrohinou soungao peire. 13Daiolouzü neletaoye panou thou-sha soukha peire hinou Enou neletaoye souvea khaimoyu süthe baimoa lüloumaimetao kukhe jünou Enou neletaoye kahinou leshiyu khaitare? Soumahyu haina vanou leshia Eye khaipeio!
14Chuo haisü Enou neletaoye tave zhure donou soudayu lüh asü chenare, alia Enou neletao hinou halia kholai moe. Enou züpayuwo louzü neletao baie, neletao vei pousha moe. Daiolouzü nahmai taonou pfüpuomai donou kini podzüwu laimoe, ana pfüpuo mainou puletao nahmai donou podzülai. 15Eletaoye soukhare donou Enou Avei buyu teitei ea lah Apfüzho-a sashoa peilai. Enou neletaoye alaosou leshi peiyu donou neletao nou Eye khai-a leshi peilaiwu?
16Süthaisü, Enou neletaoye southou kou süpeimoe touyu sü neletao-a aetouwulai. Ana mai kamainou Ehai do kaishowe ea dadoua neletaoye niloure tea paowe. 17Ana kabüa? Enou neletao hi seiveyu maitali vanou Enou neletao hinou zhiloure phoulouwu? 18Enou Titaye tapeio tea khoe, alia Enou puhye koa kukhe thaihou jüraiye seive-e. Tita nou neletao hinou zhiloure phouloure tea neletao nou paowu? Ahaisü tsü alikhei hinou vah soubai mowu ea ludu alikhei hinou tabai mowu?
19Enou lah Eh vanou neletao nghojünou dua chi paobaie tea neletao nou cho vuzübaiwu? Khrista nou Ehye panou Ramai nghojünou paonüyu chi sünanou Ehnou paobaie, alia leshiyu samaitao, Ehnou souyu teitei hai neleye soukhare donou soubaie. 20Daiolouzü Enou velouzü neletaoye Aleli büa ea neletao nou Eye neletao vei leli büa ngaolou paimoe tea Enou piwe, alia sühisü züvayu, maiye ngaoraiyu, lekhayu, loküyu, maiye sou ahrao peiyu, mai chi paoshiyu, khaophu souyu ea bvüroyu haitao hai ngaolou shulai tea Enou ngaopiwe. 21Enou naki vepu khaiyu kisü Aramainou Eye neletao nghojünou southou natai peishulai ea raiki mah souwu-a puletao vei kezhe züpayu hinou ea khulou vah hinou le dalou moyu sheemoyu vah sütao vanou Ehai do-a krashulai tea ngaopiwe.
Currently Selected:
2 KORINTHMAI 12: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.