2 KORINTHMAI 13
13
Akhaisoua Tukhayu ea Khurüyu Chidoh
1Zhovu Enou neletao hi velaiyu hainanou lüh asü chenare. Sheeyu larübvü nou paoyu büa, “Mah dukhaiyu talihai zhopaohmai ahai moa asü vei chi sünanou laloulai.” 2Raiki mah souyu maitaoye ea kukhemai hrülaiye tukha-a Enou paowe, alia Enou neletaoye lüh ahai chena ve zhuyu ki paoyu büa chu Enou habuki hinou puletao hi tukha-a paopuwe, süolouzü Enou veyu kisü, puletao sü tudee peiyu hinou halia tupa louhoe. 3Khrista nou Avanou chi paowe touyu vei zhopaoh neletao nou züpayu nasü Enou ve peilai. Khrista nou neleye koa vah souyu kisü, puh hai lelouho moe; ana puhnou puhvei khouko hai neletao hrohi ngaopeie. 4Daiolouzü lelou hoyu hinou puhye sü kros vanou southeawu khaia, puhsü Ramai khouko hinou hriwe. Puhye koa ali soulouyu hinou Eletao-a lelouhoe; ana Ehnou neleye koa tyarai soulouyu hinou Eh-a puhvei hrümai hinou Ramai vei khouko nasü zha ngaozholai.
5Neletao hai lühi bubu mosa neletao lahnou zhai zhukhaio ea chikukhaio. Neletao nou zhai zhuyu süna hinou laloumo baiyuwo deinou, Khrista Jisu hai neletao hi bue touyu sü veimosoua neletao nou süwe? 6Eh hai laloumoyutao moe touyu sü neletao nou süwulai tea Enou louchewe. 7Ana neletaoye panou soumahlou more donou Ehnou Ramai hinou veachi paowe, süolouzü Eh hai zhai zhuyu hinou laloure touyu pongaore donou moe anou Eye sü lalou moyu büa ngaokhaia neleye panou cheche nasü souloure donoue. 8Daiolouzü Ehnou chechenaye motoua hatalia soulou hoe, ana sünaye donou likhei ha teitei soubaie. 9Ehnou lelou hoyu kisü sawe, ana neletaowo khouwe. Alia südonou neleye panou liche loure donou-a Ehnou veachi paowe. 10Daiolouzü Mapao nou Ahi hakhaore donou moa soudu paloure donou peikhai touyu soulousü khouko nasü E veyuki Enou sei-a neletao hi poushi chi paolou more donou hainasü Enou neletao hinou doua bubukinou rüwe.
11Akhai hinou, thaihou jürai maitao, vei-a buwo! Liche loure donou telo; Enou khoa buyu hisü keipeikhaio; alinou liye aetoupeio; kaona-a hrüpeio. Alia leshi ea kaonayu vei Ramai nou neletaoye koa bupeilai.
12Thaihou jüraiye leshia mü muyu zhai süna hinou alinou liye khurükhaio.
13Sheeyu maitao hrülainou puletao vei khurüyu chidoh neletao hi seiwe.
14Mapao Jisu Khrista zhuvea, Ramai leshi, alia Rako Mashinou koa bupeiyu sünanou neletao hrülaiye koa bupeiyu souloutheo. Amen.
Currently Selected:
2 KORINTHMAI 13: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.