2 KORINTHMAI 6
6
Veahoyu Kuvah
1Südonou Ramaiye koa vahsoumaitao soua, nelenou Ramai vei zhuvea hai raoha-a ngaolou more donou Ehnou nele hinou khowe. 2Ramai nou dai paosa touyu sü keilo:
“Aetou peiyu teile hinou Enou neye keipeire,
alia khailu peiyu teitheki hinou Enou neye soukha peire.”
Zhukhaio! chuhai aetou peiyu teile-e; zhukhaio, chuhai khailu peiyu teithe-e.
3Ehvei kuvah hi maitaliye panou mah phoupalou more donou, Ehnou maitaliye panou phisü loure halia soumoe. 4Süjüwo Ehnou ha teitei hinou lah Ehhai Ramai kilaitao baie touyu sü chihshoa shameayu hinou, souvea peiyu hinou, toure-shore hayu hinou ea pepoyu ve daoyu hinou zhopaoh souwe. 5Ehye sü dapeie, hukha hi thoupeie, soubvüroyu daoe; te-roua vah soue, zhai heyu moa khü-a buyu daoe. 6Ehnou sheeyu hinou, tsü hinou, shameayu hinou ea zhuvea peiyu hinou, Rako Mashi nou phoupeiyu hinou ea cheche-a leshiyu hinou, 7chechevei chipao hinou, alia Ramai vei khouko hinou lah Ehhai Ramai vei kilaitaoe touyu zhopaoh soue. Duloure ea khuloure donou lah Ehvei acheche vei basei bue. 8Ehye tsükhou peie ea sou ahraopeie; Ehye paoshi peie ea paosho peie. Ehye madayumai tea chopeie, sütoukhaia Ehnou chechenasü paowe; 9Ehye sü mainou süpeimoyu maitao büa popeikhaia mai hrülainou Ehye sü sükhaiwe; Ehye thaimai büa chopeie, ana zhukhaio, Ehsü hria bue. Ehye tudee peikhaia, southeawu moe; 10le souvea peiwukhaia, Ehsü teisanou le sawe; Ehhai toure hayu bükhaia, mai taoliye Ehnou southou hanipeie; halia hayu büa bukhaia Ehsü ha teitei buchewe.
11Korinth hi buyu leshiyu samaitao! Ehnou nelehi dukhya-a chi paowe; Eh lehai nelehi houpha papei khaitoua bue. 12Nelehi Eh le khuyu hai Ehnou moe; Eh hi nelevei le khuyuhai neletao nou baie. 13Neletao hai Anahmaitao büa chuo Enou chi paowe: Ehnou neleye leshiyu büa, Eh hia sübüyu le nasü ngaopeiwo. Neletao le-a houpha papeikhaio!
Lüloumaitao hai Ramai vei Rathokie
14Lüloumo maiye koa ali kheisoua kou pfüzhoso, daiolouzü süsü souloushie. Kabüa checheyu ea chechemoyu sü koa meimelai? Kabüa ava ea teizhi nasü koa hrüloulai? 15Khrista ea Rashi kolehi ae-ao touyu dai bue? Moa lüloumai alinou lüloumomai aliye koa samai soure dai bue? 16Alia Ramai vei rathoyuki hai basharataoye koa ae-ao touyu dai bue? Daiolouzü Eletao hai hriyu Ramai vei rathokie! Haisü lah Ramai puhnou paoyu kue,
“Aki hai Amaitaoye koa soulai ea puletao hronou hrülai;
Esü puletao vei Ramai soulai;
ea puletaosü Amai soulai.”
17Alia haibüa Mapaowo nou paoe,
“Neletao puletaoye thaovuzüwo ea lah neletaosü puletao hinou souku palo,
Sheemoyu sünaye halia deikhaiso,
süthaisü Enou neletaoye popeilai.
18Esü neletao Puo soulai,
alia neletaosü Anahpoutu mai ea Anah naotumaitao soulai tea khoukhoulai Mapaowo nou paoe.”
Currently Selected:
2 KORINTHMAI 6: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.