2 KORINTHMAI 7
7
1Asamaitao, apaopeiyu haitao sü Eletao hi soupei khaitoue. Südonou pfüphao moa rakoye souhao peiyu ha teitei hinou lah Eletao sü sousheeloua bulou laikhe, alia Ramaiye pi-a hrüa Eletao sü shee-a bulou laikhe.
Paul nou Lesayu
2Neletao lesü Ehye donou houpeio. Ehnou maitaliye soumah moe; Ehnou maitaliye soushi moe, moa Ehnou maitali hinou zhiloure donou phoumoe. 3Haisü Enou neletaoye mah dukhaire donou paomoe; daiolouzü Enou raikinou paoyu büa Ehnou neleye leshishoe süolouzü Eletao sü thaia, hria teisanou koa bue. 4Enou neletaoye loucheshoa bue; Enou nele vanou khaophu soushoa bue! Ewo levayu nou phoua bure. Ehnou veahoyu pfüphou hia Ewo lesashoa bue.
Ko Avei Navei Sayu
5Ehnou Makedonia hi velouyu thaia, Ehsü sokhai moe ana buh liki hinou souveayu daoa—vakounou züvayu ea Eh lekhe hinou piyu sü daoe. 6Ana le veayu maiye souva peiyu Ramai nou Tita velouyu hinou Ehye le soudu peie. 7Ehye le sousa peiyu hai puhnou velouyu vanou likhei baimoe, ana kazhaibüa neletao nou puhye le soudu peisa touyu vanou puhnou ve paongao peiyu süna donoue. Neletao nou daizhozhou Eye daonüsa, neletaosü daizhozhou levea-a buresa ea kabüa neletao nou Ehye khupeire donou soudasa touyu sü puhnou Eh hi paongao peie; südonou chuo Esü vashopu tare.
8Daiolouzü Avei seiko sünanou neletaoye le souvea khaia, süna rüyu vanou E leveayu hae (süsü Enou levealou veikhaia), daiolouzü seiko sünanou neletaoye le souveakhaia phajü donou bailai touyu sü Enou ngaoe. 9Ana chuo Esü saloure—süsü Enou neletaoye le souveayu donou moe, anou neletao vei le veayu sünanou neletaoye le souda peire. Leveayu süsü Ramai nou poa vah souwe, alia südonou Ehnou nelehi hashilia soumoe. 10Daiolouzü Ramai hilonou veayu sünanou ledayu povewe ea sünanou khailu peiyu hi süthailou peiwe—alia sühisü lengaiyu halia hae! Ana deiphao hilovei veayu sünanou athai povewe. 11Neletao vei veayu haina hinou Ramai nou dai soupeiresa touyu sü zhukhaio: hainanou neletaoye panou daizhozhou lenou peisa, neletao vei mahsü daizhozhou sousheelou nüsa! Daizhozhou lekhasa, daizhozhou pisa, daizhozhou zhia busa, daizhozhou lenousa, daizhozhou mahyu maiye tudee peire donou soudasa! Ha teitei hinou neletaosü mah hae touyu sü lah neletao nou zhopaoh soua bue.
12Südonou Enou seiko sünasü neletao hi rükhaia, süsü soumahyu puh donou rümoe, moa soumah peiyu donou veahoyu puhye donou rümoe, ana neletao nou Ehye donou lenouyu nasü Ramai nghojünou neletao hi pongao peire donou rüe. 13Sübüyu donou Ehye sü le souva peire.
Ehye le souva peiyu likhei baimoe; ana Ehnou Tita vei asahna vanou lesashoa bue daiolouzü neletao hrülainou puh lesü southou naphi peiwure. 14Daiolouzü Ehnou puh hi neletao vanou kathechi paore toulouzü, Eye sü panou ahraomoe; ana Ehnou neletao hi paoyu teiteisü chekhaoyu sübütoua, Ehnou Tita nghojünou kathe souyu süsüa chechewe touyu sü zhopaoh soupeire. 15Alia südonou neletao hrülainou kabüa puh chi züre donou soudasa ea kabüa neletao nou pi-hia puhye sasa-a shepeisa touyu sü licho loukhaie neletaoye leshiyu puhvei lesha hai dulailai loure. 16E hai daizhozhou lesasa, daiolouzü ha teitei hinou Enou neletaoye lüa bulou süre!
Currently Selected:
2 KORINTHMAI 7: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.