2 KORINTHMAI 8
8
Khrista Mainou Peiyu
1Eh thaihou jürai maitao, Makedonia hi buyu lüloumaitaohi Ramai vei zhuvea nanou dai soupei khaitousa touyu sü neleye panou Ehnou sülou nüwe. 2Puletaoye sü puletao hi vedaoyu tatei sho-a veahoyu sünanou zhai zhupeire; ana puletao vei sayu sünanou dusholoua, puletao hai toure hazhikhaia mai kukhehi ha peinüyu sü dushoa bue. 3Daiolouzü Enou soutaosou lapei lousüe süolouzü puletao nou peilousü nasü pei-a bue, alia puletao nou peilou süyu jünou koua peiwe. Lah puletao nou do soua 4Eh hinou khoa paowe ea Judea hi buyu sheeyu maitaoye soukha peire hisü koa zha ngaozho loure teile aveina ngaoloure donou Eh hinou lenoua khowe. 5Haisü Ehnou rei-a buyu jünou kousho hie! Raikaia puletao nou lah puletaoye sü Mapaowo hi thoupeie; alia süthaisü Ramai leli hinou puletao nou lah puletaoye Eletao hi thoupeie. 6Südonou vah haina soushuyu Tita hinou vah hainasü thaokhaimoa soure donou ea zhuvea peiyu vah avei hainasü neletao hrohinou souche peire donou Ehnou khowe. 7Chuo neletao nou ha teitei hinou veikou shoyu donou, süolouzü lü hinou, chipao hinou, tsü hinou, maiye soukha peire lenouyu hinou ea Ehye leshiyu hinou koua buyu donou— zhuvea vah hainahi-a veikou loure donou zhutoulo.
8Enou hainasü chikhali büa paomoe; anou neletao vei leshi hai cheche-e touyu sü mai kukhevei lenouyu sünaye poda-a zhai zhure sü Enou züpae. 9Neletao nou Eletao Mapao Jisu Khrista vei zhuvea nasü süwe; süolouzü puhsü hanikhaia, neleye donou puhsü toure haloure, sübüa puhvei ha hayu süna vanou neletaoye panou hani loure süsüe.
10Alia Avei leli süolouzü neletao nou daoko soushuyu süsü chuo souche khowuyu veika baie. Neletaosü vah souyu hithe baimoa sounüa souyu hia neletao nou raikaibaie. 11Südonou chuo süsü thaokhaimoa souwo ea vah süsü souchewuwo! Vah süsü soureki lenouyu büa chu souchere hia lenoulo, alia süsü chu neletao hi bu buyu sünanou koa soulo. 12Neletao nou peinüsho louzü, neletao vei sapeina nasü, neletao vei hayu thaifümoa, buyu thaifüa Ramai nou popeilai.
13Kukhemaiye kou southea peiwu-a neletaoye kou sousü peire donou Enou temoe; 14ana chu phahihai neletao hi alaosou buyu donou, neletao nou moshilaiyu puletaoye soukha peizüe. Süthaisü neletao nou haloua puletao nou alaosou buyu kisü, puletao nou neletaoye soukha peilai. Sübüa ahai haisü kheihao-a bulai. 15Haisü sheeyu larübvü nou paoyu kue, “Alaosou podzü louyu puh-a halia limoe, alia daotu podzülou baiyu puh-a chemoyu soumoe.”
Tita ea Puh Samaitao
16Daizhozhou Ramaiye kalo paosa, daiolouzü Ehnou le nouyu kua puhnou Tita lekhe hia neletaoye soukhare lenouyu nasü peie! 17Daiolouzü puh hai Enou khoyu likhei donou baimoa lah puh züpa thaifüa neletao hi tare donou le laloure. 18Puhye koa Ko Avei paodouyu puhvei vah hinou lüloumaime pfüphou hrohinou zhih tashoa buyu Eh thaihou jürai puhye Ehnou neletao hi seivewe. 19Süthe baimoa, Mapao vei kathe donou ea Ehnou neleye soukha nüwe touyu pongao peire donou, Ehnou leshivei kuvah haina souyu hisü Ehye koa veihdu hi tare donou puhye sü lüloumaime taonou dopeire ea buh thoupeire.
20Ehnou kuvah souanou buyu peinü-a peiyu sapeina haina vanou maitalinou Eh pei hi mah paoka peimore donou Ehnou zhutoua bue. 21Daiolouzü Ehvei lelina louzü Mapao nghojühi likhei baimoa emai nghojü hia chechenou souyu süsüe.
22Südonou puletaoye koa Ehnou Eh thaihou jüraiye seiwe; Ehnou puhye sü phasho zhai zhue ea teisanou puhye sü maiye soukha nüshoa ngaoloue. Alia chuo puhnou neletaoye loucheshoa bue ea raiki jünou koua soukha nüshoa bue. 23Tita donou louzü, puh hai neletaoye soukha peire kuvah hi Eye koa laiyu ea vah souzhoyu Asae; puhye koa laiyu kukhe thaihou jüraimai taowo louzü, lüloumaimetao süh soua laiyu ea Khrista kathe pove peilaiyu maitaoe. 24Südonou lüloumaimetao nghojünou neletao vei leshi ea Ehnou nele vanou kathe souyu sü cheche-e touyu sü zhopaoh soure donou puletao hi neletao vei leshisü pongaopeio.
Currently Selected:
2 KORINTHMAI 8: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.