DANIEL 1
1
DANIEL ALIA PUHVEI SAMAITAO KO
(1.1—6.28)
Veo Nebukhadnezzar vei Chiku Ki hi Nahlemaitao
1Veo Jehoikim nou Judah hi vekoulouyu po asü kousü Babilon hi veo Nebukhadnezzar nou Jerusalem hi reih hulou poloure. 2Mapao nou Judah hi veo Jehoikim ye sü panou nüloure ae rathoki hi buyu paikhao khesü panou poloure. Puhnou hukhamai-a taoli nüpoa tare alia rathoki hinou polouyu natao sü puhnou pove puhvei rathoki hisü khaiwure.
3Süthaisü veo nou puh khenou vah souyu peikhowo Ashpenaz hi nüpoa veyu Israel maitao hrohinou vemai moyuma nuh teidei khoa buyu maitya hinou nahlemai taoli dopaloua puh hi savewo tea kharochi peie. 4Puletao hai shovai laimoe, zhurao veilai, hüvei sholai, alia tsüdo aveih mai, le lahyu mai, ae veo ki hinou vah soulou süyu mai ali soulai. Puletaoye Babilon maivei la hai Ashpenaz panou doupeilai. 5Veo nou puletaoye touso aveih, vemai nou tousoyu touso ae zhaoh nou peio tea kharochi peie. Puletaoye po asü doupeilai, alia sübüyu teile chere toulouzü puletaoye veo nghoujü save lahlai. 6Dokupa khaitouyu nahlemaitao hrohisü Judah khü hinou hrüveyu Daniel, Hananiah, Mishael, ae Azariah hai maitao-e. 7Peikhowo nou puletaoye zhih ashu haibüa sapeie: Daniel zhih sü Belteshazzar, Hananiah zhih sü Shadrak, Mishael zhih sü Meshak, alia Azariah zhih nou Abednego tea sapeie.
8Ana Daniel nou puhye vemai vei touso aveih ae zhaoh panou souzhailai moe tea tsücho loure. Südonou puhnou Ashpenaz hinou puhvei soukha khoe. 9Ramai nou Ashpenaz tsüle hisü panou Danielye zhuvea leshiyu sü thoupeire. 10Ana Ashpenaz nou Daniel hi paoe, “Neye panou tousore touso sü avei paopu nou peio tea kharochi peikhai toue, süsü nenou toumoa ne hai nevei samai kukhe jünou hüboshia bailouzü E ngaopi-e, süthaisü veo nou Eye southa shulai.”
11Süthaisü Daniel nou taho puh ae puhvei samai asütao peikhowo Ashpenaz hisü paoe, 12“Teithe kirou lihai Etaoye panou vupou toua ae dzü likhi nou ke-e nenou zhuwo. 13Süthaisü vemai vei touso toua buyu nahlemaitao alia Etao thaonou pfüphao veipusa touyu nenou zhukhaio, alia nenou ngaoyu thaifüa ne kilai Etao hi nenou daie souzü touyu nasü souwo.”
14Puhnou haibüa paoyu sü aetou peia teithe kirou lihai zhue. 15Teithe kirou cheyu thaisü, puhnou zhuyu phaki puletao hai veo maivei touso aveili tousoyu nahlemaitao jünou veipua ngaoloure. 16Südonou puletao peikhowo nou süzhou teithe hinou puletaoye vemai vei touso sü peimore, ana puletao nou jüpa-a khoyu vupou nou peia baire.
17Ramai nou nahlemai haitao adai hisü tsüvei, larü süyu ae ratsü sü peie. Süjünoua pua Daniel hisü zho ngaoyu ae me paolalou süyu tsüdo hai-a peie.
18Veo nou teile dadepei khaitouyu po asü cheyu phaki, Ashpenaz nou nahlemai teitei nou saloua veo Nebukhadnezzar nghoujü hisü saloue. 19Veo nou nahlemai hrülaiye chiphayu phaki, puhnou Daniel, Hananiah, Mishael ae Azariah mai haitao adaiye mai kukhe jünou veipua ngaoloure. Südonou puletao hai veo vei chikuyu ki hinou pa vah soure. 20Veo nou puletao hi chi tyatyali soua nouyu phaki, puletao mai adai hai puhvei vedei teitei hinou hrüyu keingumai alia vepare süyu mai jünou zha kirou phali hai süpua ngaoloure. 21Parsia hi veo Sairas nou reih soulou Babilon polouyu koute Daniel nou veo vei chiku apeimai ali soua bue.
Currently Selected:
DANIEL 1: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.