EZEKIEL 48
48
Israel maivei khütao nou Teidei Zha Zhiyu
1-7Reilova deirai hai Mediterranean Zai vei teinghei palova nou poa Hethlon nuhdu, Hamath vei vedei deirai hi koute-e. Israel mai khü alili nou teinghei palova deirai hinou poa teinghei loulova Mediterranean Zai hi koute hai reilova nou poa khelova hai haibüa nou shoshonou ngaolai:
Dan
Asher
Naphtali
Manasseh
Ephraim
Reuben
Judah
Teidei Tsüla hinou Zha Dadekupa Khaitouyu
8Teidei süthaitao hai matsüsho-a poa vah soure donou dadekupa khailo. Haisü reilova nou khelova koute hai kilomitar kiahaida hai jha dulai, ae khü ali hi peiyu bütoua teinghi palova nou teinghi loulova koute sa sotoua nou peilai. Rathoki hai hinou soulai. 9Teidei hai hinou kilomitar kiahai-da sa shoyu ae kilomitar kirou#48.9 Hai nanou kaoyu phae (phoure 45.1 hia zhukhaio) kilomitar kirou; Hebrew kilomitar angou. jha duyu sü Mapao ye donou soukupa peilai. 10Napao maitao-a sheeyu hai hinou puletao vei zha ngaolai. Puletao vei zha soure donou kilomitar kiahaida hai teinghi palova nou teinghi loulova koute hai peilai, ae kilomitar angou hai reilova nou poa khelova koute peilai. Mapao vei Rathoki hai fühao haitao vei toutsü hinou soulai. 11Fühao haitao hai Zadok vei tyaosholea hinou hüveyu napao maitaoye donou peilai. Puletao hai chilee chechetou tea nou avei kuvah sü souwe, ae Israel mai kukhetao nou vah ashi souyu alia Levi mai kukhe nou kaozü moyu vah souyu hisü louzho moe. 12Südonou puletaoye sü Levi maivei teidei thaisho, sheekayu füdei nasü puletao hi peilai. 13Levi maitao-a napao maitao vei khelova nou füdei hai veisho-a nou peilai. Puletao vei füdei-a teinghei palova nou teinghei loulova koute hai kilomitar kiahai-da, ae reilova nou khelova koute hai kilomitar angou peilai. 14Mapao hi sousheeloua peithoukhai touyu teideitao hai veikayu teidei-e, südonou teidei haitao sü mai linoua zhotoulai moe, moyuma poa füdei kukhe lealai moe, moa mai hi peidalai moe. Haisü sheewe ae Mapao vei baie.
15Pokupa khaitouyu füdei vei nalova kilomitar kiahai-da sa shoyu ae duyu nou kilomitar ahai-da hai sheemoe, ana haisü vah kukhe poa soure donou khailai. Nuhdu nasü füdei haitao vei tsülü hinou soulai, 16ae haisü sa-jha-a panou deitou toulai, süsü holo-a ae hailo-a mitar 2,250 noulai. 17Nuhdu vei pehao veishi hisü mitar 125 hai dei sakhai-a nou khailai. 18Sheeyu vei dei buyu thaitao, shokhaitoua buyu deitao, teinghei palova nou poa teinghei loulova kouyu kilomitar angou ae duyunou kilomitar ahai-da hai nuhdu hinou hrüyu maitao panou tatah toulai. 19Nuhdu hinou hrüa buyu mai taralia füdei hai hisü tadaotoua bailai.
20Südonou toutsü hinou pokupa khaitouyu füdeitao hai nuhdu soure donou peiyutao noupu loua sa-jha hai kilomitar kiahai-da bulai.
21-22Teinghei palova nou poa teinghei loulova buyu füdei haitao hinou Rathoki souyu füdeitao hai loulai, napao maitao vei füdei, Levi maitao vei alia nuhdu vei füdeitao-e, süthaisü shokhai toua buyu füdeitao hai veo nahpoutu vei-e. Haisü teinghei palova deirai hi koute-e, ae teinghi loulova sü Mediterranean Zai hi koute-e, alia reilova Judah maivei deirai hi khe-e ae khelova hai Benjamin maivei teidei hi kou-e.
Khü Kukhe Maitao vei Teidei
23-27Dei dekupa khaitouyu hinou khelova buyu teideitao hai ngaolou moa buyu khü alili nou dei zha alili hai teinghei palova deirai hinou teinghei loulova Mediterranean Zai hi koute ae reilova nou poa khelova koute hai haibüa khü alili nou ngaolai:
Benjamin
Simeon
Issakar
Zebulun
Gad
28Gad maitaoye peikhai touyu teidei khelova deirai hai Tamar hinou teinghei loulova kou Kadesh vei dzübvü buyu hi koute, süthaisü teinghei loulo reilova hai Ejipt maivei deirai hinou Mediterranean Zai hi koute-e.
29Ramai Mapao nou haibüa paoe, “Hai zhaibüa Israel maitao nou teidei sü khü khü nou zhiloulai, ae hai khesü puletao vei soulai.”
Jerusalem vei Rokhubomütao
30-34Jerusalem nuhdu hi taloure hai rokhubomü kiahai bue. Kivo adai dai hinou mitar 2,250 bue, ae kivo alili hinou rokhubomü asüsü bue, ae rokhubomü sütao hai Israel maivei khütao zhih nou sapei khaitoue. Reilova nou buyu kivo hi rokhubomütao zhih hai Reuben, Judah, ae Levi; teinghei palova kivo hi buyu rokhubomütao zhih nou Josef, Benjamin, ae Dan; khelova kivo hinou buyu rokhubomütao zhih nou Simeon, Issakar, ae Zebulun; ae teinghei loulova kivo hinou buyu rokhubomütao zhih nou Gad, Asher, ae Naphtali toue. 35Nuhdu vei kivo khohao khaitouyu veishi hai sa shoyu mitar thekü bue. Nuhdu sünavei zhih hai chu thainou “Mapao Sü HAIHI BUE!” tea kutalai.
Currently Selected:
EZEKIEL 48: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
