EZEKIEL 47
47
Rathoki hinou Reidzü Küyu
1Mai nanou Eye sa-a Rathoki hi taloure bomü hi dakhaive khaipeie. Sükhevai nou dzünghou küpawe ae Rathoki nghoujülo, süsü teinghei palova kütawe. Dzü nanou Rathoki vei khelova nou deikhe vainou küpoa posheelabu vei khelova kütawe. 2Süthaisü mai nanou Eye Rathoki hinou sapoa reilova rokhubomü hinou vakou sapaloure ae Eye teinghi palova rei-a buyu rokhubomü nasü sa-a nou sühaota-e. Rokhubomü sünavei khelova nou reitou taitouli hai küpawe. 3Mai nanou puhvei dousüü nou reitou nasü teinghi palova mitar kaihngou hai doupoa nou kou-e ae puhnou Eye dzü hinou sa-a ta-e. Dzü hai phichoro pha hi khe-a baie. 4Süthaisü puhnou mitar kaihngouli hai doupue, ae dzü sü akhoubou pha hi khere. Süthai-a mitar kaihngouli hai doupu khaie, dzü sü avei khya hi khere. 5Süthai-a puhnou mitar kaihngouli hai doupu khaie, dzü hai thouleloua E sü talou hore. Chuo reidzü hai thouleloua dzü dapoa koubai deinou kalou hore. 6Puhnou ahi paoe, “Thai-a bailaiyu mainare, hai khesü soutaosoua zhutou tulo.”
Süthaisü mai nanou Eye sa-a reipe hi dakhaipa loure, 7ae Enou sühi palouyu phaki, reipe hi hai süübe alao bua nou ngao-e. 8Puhnou ahi haibüa paoe, “Reidzü haina hai teinghi palova nou küpoa kou Jordan Deikho hisü loulai, ae süthaisü Athai Zai hi kouloulai. Dzü hai nanou Athai Zai hi koulou louyu phaki taidzü khesü dzü veiyu hi soudapa peilai. 9Reidzü hai nanou kütayu veishi hisü hrikhaona ae khah tyatyali bulai. Reidzü hai nanou Athai Zai hi dzü khesü souvei dakhai peilai, ae hai nanou küve peiyu teitei hisü ahri hai pove peilai. 10Engedi Dzüla payu hinou poa Eneglaim Dzüla payu hi koute hai khahphoumai nou zaipe hinou khah phoulai, ae puletao nou khahbesah khesü phuthea nou bulai. Sühisü Mediterranean Zai hi büa khah hai tyatyali bulai. 11Ana dzüta ae zaibvü hi buyu dzü louzü dzü aveih hi soudathou peilai moe, sütao hiolouzü tai sü panou bubailai. 12Reipe teitei hi hai süübe tyatyali panou paopalai ae touso sü panou peilai. Süübe sütao vei süünghou hai deraikhai toulai moe, ae tobai soumoa rashithou hai shipei koute-a bulai. Khouh palou hai rashithou ngaotou koutelai, daiolouzü sütao hai Rathoki hinou küpayu reidzü sünou dzüzü peiwe. Süübetao nou touso hai peilai, ae süünghou khenou maikhe maiye souvei peilai.”
Teidei vei Deiraitao
13Ramai Mapao nou haibüa paoe, “Israel mai khü kiahai nou teidei thaoloure vei deirai sü haitao-e. Josef nou zha ahai ngaolai. 14Neletao nou teidei hai raibütoua zha zhilo. Enou neletao vei puopao maitao hi teidei hai nasü panou puletao vei souloulai tea chaachou soua paoh peiwure.
15“Neletao vei deirai hai reilova nou Mediterranean Zai hinou poa teinghi palova kou Hethlou nuhdu, Hamath Ludu hinou Zedad nuhdu, 16Berothah nuhdutao ae Sibraim nuhdu (sütao hai Damaskas ae Hamath maivei vedei kohinou bue), ae Tikon nuhdu (haina hai Hauran vei vedei deirai hinou bue) hi koutelai. 17Südonou reilova deirai hai Mediterranean Zai hinou poa Enon nuhdu hi koute-e, süsü Damaskas maivei deirai ae Hamath maivei reilova deirai hi khetelai.
18“Teinghi palova vei deirai Damaskas ae Hauran kohinou khelova kouwe, süsü Jordan Rei nou Israel maivei teinghi palova Athai Zai hi kouloua Tamar#47.18 Larübvü ali hi Tamar; Hebrew hi sheesha moe. hi koute-e.
19“Khelova vei deirai hai Tamar vei khelova nou teinghei loulova kouloua Ejipt maivei deirai hi kouloua Mediterranean Zai hi koute-e.
20“Teinghi loulova vei deirai hai Mediterranean Zai hinou poa reilova khe Hamath Ludu hi khete-e.
21“Teidei haitao hai neletao vei khü khü thaifüa dadezhilo; 22haisü teisa neletao vei soulai. Neletaoye koa nou hrüzho-a buyu vakou maitao ae hai hinou tounah hrülouyu maitao vei zha hai-a neletao nou teidei dade zhipeio. Puletao-a Israel mai ali bütoua popeilai ae Israel maitao nou rako zhua teidei zhiyu hisü puletao-a panou loulai. 23Vakou maitao-a puletao nou velou hrüa buyu khü hisünou koa puletao vei dei zha hai ngaolai. Haisü Ramai Mapao Enou paopawe.”
Currently Selected:
EZEKIEL 47: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
