EZEKIEL 46
46
Veo Nahpoutu ae Khonütao
1Ramai Mapao nou haibüa paoe, “Teinghi palova nou chikubu lüvai talouyu rokhubomü nasü vah souyu teithe arou koute hai hroulai moe, ana Soteithe zhou ae khouh ashu vei khonüh hi houlai. 2Veo nahpoutu nou vakou chikubu hinou talouyu kide hisü rokhubomü hinou taloulai ae rokhubomü vei deka hinou napao nou meideia posheela peiyu phaki la-a nou bulai. Puhnou rokhubomü sühinou ratholai ae süthaisü sühinou dakhai talai. Rokhubomü süna hai koukhe koute khulai moe. 3Soteithe zhou ae khouh ashu vei khonüh nüyu chüsü maikhe mainou rokhubomü nghoujü nou pei pfüa nakou khurülai ae Mapao ye tholai.
4“Soteithe zhou veo nahpoutu nou Mapao hi meideia posheela peire hai chaa hayu zhaoti arou ae zhaotsü ali peilai. 5Zhaotsü ali posheela peiyu hisü thou sühcho kianaida hai koa nou peilai, ae zhaoti alili hinou puhnou peinüyu nakukhe koa nou posheela peilai. Thoudzü vei posheela hai oliv theadzü sühchovou asü koa nou posheela peilai. 6Khouh Ashu vei khonüh hi puhnou chaa hayu chode ali, zhaotu arou, ae zhaotsü ali hai posheela peilai. 7Chode ali hi ae zhaotsü ali hinou thou sücho kianai-da hai koa nou posheela peilai, ae zhaotu alili hinou puhnou peinüyu na taralinou koa posheela peilai. Thoudzü vei posheela peiyu hisü oliv theadzü sühchovou asü hai koa nou posheela peilai. 8Veo vei nahpoutu nanou talouyu phaki, kikha taloure kide vei rokhubomü hinou taloulai, ae ludu süna hinou dakhai talai.
9“Khonüh tarali hia maikhe mainou tave Mapao ye thoyu phaki, puletao nou reilova rokhubomü hinou talou louzü ratho chelouyu thai puletao nou khelova rokhubomü hinou tapalai, ae khelova rokhubomü hinou talou louzü, reilova rokhubomü hinou tapalai. Mai taralia puhnou talouyu ludu hinou tapalai moe, ana puhnou alilo vanou tapalai. 10Veo nahpoutu-a maikhe mai velouyu teile hinou veloulai, ae mai tayu teile hinou talai. 11Khonüh nüyu teile hi ae khonüh nüyu phaki chode moa zhaotsü naye koa thou hai sühcho kianai-da hai posheela peilai, süpei hinou maikhe mainou zhaotuye koa puletao nou peinüyu khesü popeia bailai. Thoudzü vei posheela peiyu koa nou oliv theadzü sühchovou asü hai posheela peilai.
12“Veo nahpoutu nou Mapao hi posheela hai peinüa peilai toulouzü, süsü meideia posheela peiyuho moa chavei lathao-a buloure vei posheelayuma chikubu khevai talouyu rokhubomü nasü puhye donou houpeilai. Puhnou Soteithe hi posheela peiyu bütoua posheela hai peilai, ae puhnou tapayu thai rokhubomü sü khuwulai.”
Teithechü vei Posheela
13 Mapao nou paoe, “Shona tsüsü chaa hayu zhaotu ali hai Mapao hi meidei-a posheela peilai. Posheela hai nasü teithechü posheela peilai. 14Süpei hinou sou sühcho ahai ae oliv theadzü sühchovou ali hai sou hi thouhrüloua shona chüsü posheela peilai. Mapao ye haibüa posheela peiyu zhai hai nasü teisa nou soupfülai. 15Zhaotu ali, sou, ae oliv theadzü hai teisa nou shona chüsü Mapao hi posheela peilai.”
Veo Nahpoutu alia Nuhteidei
16Ramai Mapao nou haibüa kharochi peie, “Hakinou veo nahpoutu nou puhvei teidei hai puh nahmaitao hi sapeina soua peilouzü, füdei sünasü nahpoutu sünavei teisa nou soua bailai. 17Ana veo nahpoutu nou puhvei kuvah souyu mai tarali hi puhvei füdei taralia peilouzü, füdei sünasü Podakhai louyu Po#46.17 podakhai louyu po: Po raingou tsü sü, Israel mai hrülai nou maitaralia touha sohayu donou maipao maizho khalou hoa qila soure donou zhothou khaitouyu mai hrülaiye sü panou lado souloulai; ae ki-lu hai-a lah paopu hi dakhai peilai (Lev 25.8-55 hi zhukhaio). hi kou veo nahpoutu vei soua bailai. Hai nasü puhvei baie, südonou puhvei nahpoutu maitao likhei nou füdei nasü teisa vei soua bailai. 18Nuh teidei khasa-a buyu veo nahpoutu nou maivei füdei hai poloulai moe. Füdei taralia puhnou puhvei nahmaitao hi peilai toulouzü, puhye peikhai touyu teidei hinou peia bailai, sükulouzü puhnou avei maitao füdei sü polai moe ae souchorolai moe.”
Rathoki vei Hakhoki
19Süthaisü mai nanou Eye kikha taloure kide, reilova rei-a buyu khelova vei rokhubomü hisü saloure. Sheeyu kide haitao hai napao maitao donoue. Puhnou teinghei loulova buyu kide ali hi bah teloua 20haibüa nou paoe, “Buh hai hinou napao maitao nou mah vei posheela peiyu vei posheela souh sü kholai, ae sou posheela peiyu khesü hai hinou raokhao khaolai, sükulouzü sheeyu na taralia vakou popa maikhe maiye soushilai moe.”
21-22Süthaisü puhnou Eye vakou nou buyu chikubu hisü sapaloure, ae Eye taiyu chikubu kainghou adai hai sa shoyu nou mitar kai ae mitar kiangou jha dua nou soukhaitoue. 23Sütao hai chuh nou kivo khokhai toue, ae kivo va hisü mei souyu buh hai soukhaitoue. 24Mai nanou ahi paoe, “Maikhe mainou pove sheela peiyu khesü rathoki hi kilai maitao nou hai hinou hakho toulai.”
Currently Selected:
EZEKIEL 46: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
